Read Lengua Sur Jonás 3 Bible Online

Jonás 3 - Lengua Sur bible

Jonás 3

¹Appaqhetchásekxeyk axta makham Wesse' egegkok Jonás. Aptáhak axta apcháneya s'e:

²“Emhók sa' tegma apwányam Nínive, ellegés sa' énxet'ák sekmako nak ko'o altennaksek xép.”

³Apxegkek axta Jonás apmahágko m'a Nínive, ekhawo m'a aptáhakxa axta apcháneya Wesse' egegkok. Nínive axta apteme xama tegma apwányam apyawe apagko', ántánxo ekhem axta kammohok nenxega agwomok napwa'a. Aptaxneyk axta Jonás tegma apwányam, xama ekhem axta nahan apxega yetlo apteme appeywa ekyennaqte agko' se'e: “¡Cuarenta ekhem kéméxcheyk kólmasséssók Nínive!”

⁵Axta elya'ássekmok Dios ma'a énxet'ák apheykha axta tegma apwányam, cham'a apkelwányam nak, tén han ma'a apketkók nak. Apkelxénchek axta elanagkok ma'a manto nak nento, apkelántaxneykxeyk axta han apáwa sẽlwáxaqxamo, magkenatchesso éllapwámegko.

⁶Xama axta nahan ekwokmo amya'a aphakxa m'a wesse' apwányam Nínive, apkempákxeyk axta néten aptaháno, aplekkek axta aptaxno aptaqmalma, aptaxneykxo m'a apáwa sẽlwáxaqxamo nak, keñe axta apha náxop.

⁷Yetlókok axta nahan apkeltémo kóllegaksek apyókxoho énxet'ák apheykha nak tegma apwányam wesse' apwányam appeywa, tén han ma'a appasmeykha nak chá'a aptamheykha ektéma nak se'e: “Méko sa' xama énxet enxoho apwanchek etwok apto. Megkólwanchek sa' nahan kólagkok ektéyak kélnaqtósso weyke, essenhan ma'a kélnaqtósso nepkések, megkólwanchek sa' nahan kólagkok yegmen.

⁸Kólántaxnekxa sa' ma'a apáwa sẽlwáxaqxamo nak, magkenatchesso sẽllapwámegko, nágkóleysagkoho aqsa kólwónmakha m'a Dios, kólwátésák sa' ma'a kéltémakxa élmasagcha'a nak, tén han ma'a kélteméssesseykmohóxma ekmaso nak kélmók, kélláneykegko nak chá'a s'e kaxwo nak;

⁹lapmaxcheyk sa' kexaha eyaqmagkasek apmakókxa nak etnehek Dios, tén han kamaskok aplo, keñe sa' magmassehe'.”

¹⁰Apwet'ak axta Dios aptamhágkaxa énxet'ák Nínive, ekmassa apkelánegko m'a apkeltémakxa ekmaso nak, tén axta ekxéna apwáxok metnéssessamók exma ekmaso, apxénakxa axta etnéssesek.