Read Lengua Sur Números 1 Bible Online

Números 1 - Lengua Sur bible

Números 1

¹Appaqhetchessek axta Wesse' egegkok Moisés yókxexma meykexa énxet nak Sinaí, cham'a kélpakxanma apchaqneykekxexa axta chá'a énxet'ák, émha amonye' ekhem, aptáhakxa axta apqánet pelten, apwokmo axta apqánet apyeyam apkelánteyapma israelitas ma'a Egipto. Aptáhak axta apcháneya s'e:

²“Kólnaqtáxésák sa' weykcha'áhak apkelwesey apyókxoho israelitas, cham'a apnámakkok apancha'awo nak chá'a, tén han ma'a ekheykha nak chá'a apxagkok, yaqwayam enxoho kólya'asagkohok apkelwesey, tén han apwánxa apxámokma m'a apyókxoho nak apkelennay'a,

³cham'a ekwayam nak chá'a veinte apyeyam apagkok néten, apmopwancha'a nak yempakha', enaqtáxésak sa' ma'a ektáhakxa nak chá'a apkelxegexma'a apagko' ma'a sẽlpextétamo, Aarón sa' ewhánho',

⁴tén han xama apkemha apmonye' chá'a m'a ektáhakxa nak apnámakkok apkeñama nak chá'a nepyeseksa énxet'ák apagkok.

⁵Keso apkelwesey apkelámha apmonye'e yaqwayam nak chá'a ewhánhok se'e: “Elisur, apketche nak Sedeúr, apteme nak Rubén énxet'ák apagkok.

⁶“Selumiel, apketche nak Surisadai, apteme nak Simeón énxet'ák apagkok.

⁷“Nahasón, apketche nak Aminadab, apteme nak Judá énxet'ák apagkok.

⁸“Natanael, apketche nak Suar, apteme nak Isacar énxet'ák apagkok.

⁹“Eliab, apketche nak Helón, apteme nak Zabulón énxet'ák apagkok.

¹⁰“Keñe m'a José apketchek nak énxet'ák apagkok: Elisamá, apketche nak Amihud, apteme nak Efraín énxet'ák apagkok; tén han Gamaliel, apketche nak Pedasur, apteme nak Manasés énxet'ák apagkok.

¹¹“Abidán, apketche nak Guidoní, apteme nak Benjamín énxet'ák apagkok.

¹²“Ahiézer, apketche nak Amisadai, apteme nak Dan énxet'ák apagkok.

¹³“Paguiel, apketche nak Ocrán, apteme nak Aser énxet'ák apagkok.

¹⁴“Eliasaf, apketche nak Reuel, apteme nak Gad énxet'ák apagkok.

¹⁵“Ahirá, apketche nak Enán, apteme nak Neftalí énxet'ák apagkok.”

¹⁶Cháxa apkelámha apmonye'e apkelyésamap axta nepyeseksa apheykegkaxa israelitas, yaqwayam etnahagkok apkelámha apmonye'e nepyeseksa m'a apnámakkok apancha'awo nak chá'a.

¹⁷Apchánchesákxeyk axta Moisés tén han Aarón xa énxet'ák nak, ektáha axta apkelyéseykha m'a Dios, émha amonye' ekhem apqánet pelten axta m'a apyeyam nak, tén han ma'a apyókxoho énxet'ák. Apkelyetsáteykxeyk axta m'a apyókxoho israelitas, apnaqtáxésagkek axta chá'a apkelwesey ektáhakxa enxoho chá'a apnámakkok apancha'awo', tén han ma'a apwánxa axta chá'a apyókxoho m'a apkelennay'a ekwayam nak chá'a veinte apyeyam apagkok néten,

¹⁹ekhawo m'a apkeltamhókxa axta Wesse' egegkok etnehek ma'a Moisés. Cháxa eknaqtáxésamaxche nak weykcha'áhak apkelwesey énxet'ák, axta kelánamáxcheyk ma'a yókxexma meykexa nak énxet Sinaí.

²⁰Xama axta ekpenchásexko eknaqtáxésamaxche apkelwesey m'a ektáhakxa nak chá'a énxet'ák apagkok, tén han apnámakkok apancha'awo', tén han eknaqtáxésamaxche chá'a apkelwesey xama xama tén han apyókxoho m'a apkelennay'a apwayam nak chá'a veinte apyeyam apagkok néten, keso ekwánxa axta ekwetamaxche ekyókxoho apkelwesey s'e: Cuarenta y seis mil quinientos apkelennay'a axta apwokmok apyókxoho kélyetsete m'a Rubén nak énxet'ák apagkok, apketche átnaha apketkok axta m'a Israel, cham'a apmopwancha'a nak chá'a yempakha'.

²²Cincuenta y nueve mil trescientos axta apwokmok kélyetsete apyókxoho m'a Simeón nak énxet'ák apagkok.

²⁴Cuarenta y cinco mil seiscientos cincuenta axta apwokmok apyókxoho kélyetsete m'a Gad nak énxet'ák apagkok.

²⁶Setenta y cuatro mil seiscientos axta apwokmok apyókxoho kélyetsete m'a Judá nak énxet'ák apagkok.

²⁸Cincuenta y cuatro mil cuatrocientos axta apwokmok apyókxoho kélyetsete m'a Isacar énxet'ák apagkok.

³⁰Cincuenta y siete mil cuatrocientos axta apwokmok apyókxoho kélyetsete m'a Zabulón nak énxet'ák apagkok.

³²Keñe axta José aptawán'ák neptámen, cuarenta mil quinientos axta apwokmok kélyetsete apyókxoho, cham'a Efraín nak énxet'ák apagkok. Keñe axta treinta y dos mil doscientos ma'a Manasés nak énxet'ák apagkok.

³⁶Treinta y cinco mil cuatrocientos axta apwokmok apyókxoho kélyetsete m'a Benjamín nak énxet'ák apagkok.

³⁸Sesenta y dos mil setecientos axta apwokmok kélyetsete apyókxoho m'a Dan nak énxet'ák apagkok.

⁴⁰Cuarenta y un mil quinientos axta apwokmok apyókxoho kélyetsete m'a Aser nak énxet'ák apagkok.

⁴²Cincuenta y tres mil cuatrocientos axta apwokmok apyókxoho kélyetsete m'a Neftalí nak énxet'ák apagkok.

⁴⁴Cháxa apwánxa axta ekwetamaxche apyókxoho kélnaqtáxéseyak apkelwesey weykcha'áhak apkelane axta m'a Moisés, tén han Aarón, tén han ma'a doce apkelámha apmonye'e nak israelitas, ektáha axta chá'a apkelámha apmonye'e énxet'ák apagkok, tén han apnámakkok.

⁴⁵Seiscientos tres mil quinientos axta apwokmok apyókxoho israelitas ekwayam nak chá'a veinte apyeyam apagkok néten, apmopwancha'a nak chá'a yempakha'.

⁴⁷Axta kólyetsáteykekxak apwánxa levitas nepyeseksa m'a pók énxet'ák nak,

⁴⁸hakte axta aptemék apkenagkama Wesse' egegkok Moisés se'e:

⁴⁹“Apkelyetsátekxeyk sa' agkok apwánxa m'a israelitas, ná elyetsátekxa aqsa m'a Leví nak énxet'ák apagkok.

⁵⁰Levitas sa' etnéssesagkok apkeltaqmelchesso m'a ekyetnamakxa nak yántéseksek ekhémo mók nélpaqhetchásamáxkoho Dios, tén han ma'a ekyókxoho aqsok apagkok kélmeykegkaxa nak chá'a m'a kélpakxanma, tén han ma'a ekyókxoho aqsok ekheykegkoho nak chá'a m'a kélpakxanma nak. Sa' etnehek han chá'a apkelso kélpakxanma m'a, tén han ma'a ekyókxoho aqsok kélmeykha nak, tén han ma'a ekyókxoho aqsok apkelmeykegkaxa nak chá'a eltemeykha. Elpakxenagkok sa' nahan chá'a m'a nepyáwa nak kélpakxanma.

⁵¹Peyk sa' agkok chá'a kólsók, sa' etnehek chá'a apleklo m'a, sa' etnehek nahan chá'a appakxeneykekxa m'a kélpakxenwánxa enxoho chá'a. Apyepetchegwokmók sa' agkok énxet ma'a kélpakxanma nak, metne nak levita, ematñekxak sa'.

⁵²Keñe sa' ma'a nápakha nak israelitas elyaqyesagkok sa' apheykha apkelpakxenéyak, xama sa' chá'a m'a ektáhakxa nak chá'a appakxanma apagko' yetlo bandera apagkok.

⁵³Keñe sa' levitas elpakxenagkok chá'a m'a nepyáwa nak kélpakxanma ekyetnamakxa nak yántéseksek ekhémo mók nélpaqhetchásamáxkoho Dios, elanha sa' nahan chá'a m'a, yaqwayam sa' meltaqnaweygkehek chá'a Wesse' egegkok ma'a israelitas.”

⁵⁴Apkelánegkek axta israelitas ekyókxoho m'a apkeltamhókxa axta etnehek Wesse' egegkok ma'a Moisés.