Read Lengua Sur Números 10 Bible Online

Números 10 - Lengua Sur bible

Números 10

¹Appaqhetchessek axta Wesse' egegkok ma'a Moisés. Aptáhak axta apcháneya s'e:

²Elána sa' ánet kélaqkahasso sawo ekmope ekmomnáwa kéltekpagéyak nak sawo ekyentaxno, yaqwayam sa' etnehek apkelmeykha apkenchesso chá'a apcháncháseykekxa énxet'ák, tén han apchaqkahássesso chá'a énxet'ák yaqwayam yának elxog.

³Kélaqkahássek sa' agkok chá'a ánet kélaqkahasso, apyókxoho énxet'ák sa' chá'a yaqnekxak aphakxa exchep, cham'a átog nak kélpakxanma apchaqneykekxexa énxet'ák.

⁴Kélaqkahássek sa' agkok chá'a xama kélaqkahasso, wánxa sa' aqsa chá'a yaqnekxak ma'a apkelámha apmonye'e nak chá'a nepyeseksa énxet'ák apagkok.

⁵Keñe sa' kélaqkahasa enxoho kélaqkahasso, ekyetlómo ekyennaqte kélpáxameykha, elxog sa' ma'a apkelpakxenéyak nak teyapmakxa ekhem,

⁶keñe sa' mók ekpáweykekxa kélaqkahasso, elxog ma'a apkelpakxenéyak nak nepyeyam. Sa' katnehek magkenatchesso yaqwayam kalxegaxchek ma'a kélpáwasso nak kélaqkahasso ekyetlómo kélpáxameykha ekyennaqte.

⁷Keñe sa' ma'a kélaqkahasso nak aqsa axakkók ma'a kélaqkahasso nak, katnehek sa' magkenatchesso yaqwayam kólánchásekxak ma'a énxet'ák.

⁸Apkelmaxnéssesso Dios énxet'ák apagkok sa' nahan etnahagkok apkelaqkahasso m'a kélaqkahasso nak, cham'a Aarón aptawán'ák neptámen nak. Cháxa yaqwayam sa' katnehek kéxegke segánamakxa kélagkok megkamassegwayam xa.

⁹“Apketamokmek sa' agkok kélenmexma m'a kañe' xapop kélagkok nak, keñe sa' peya enxoho kólántépok kólnapaxchek kéxegke m'a, kólaqkahés sa' ma'a kélaqkahasso nak, kólpáxamha sa' nahan ekyennaqte agko'. Keñe sa' ko'o kaxénwakxohok ewáxok kéxegke, ko'o sektáha nak Dios Wesse' kélagkok, alwagkasek sa' nahan teyp nepyeseksa kélenmexma.

¹⁰Kólpáwés sa' nahan kélaqkahasso m'a ekhem ekpayheykekxexal'a egwáxok, ektémól'a m'a ekhem kélessawássessamókxal'a, essenhan ma'a pelten aphaxnagkok, kélméssamakxal'a m'a aqsok élwatnamáxche' tén han ektekyómakxa nak kélnaqtósso ekyaqmageykekxa sẽlásekheykekxoho. Keñe sa' kaxénwakxohok ko'o ewáxok kéxegke, ko'o sektáha nak Dios Wesse' kélagkok.”

¹¹Meyákxeyk axta néten yaphope ekyetno axta m'a néten nak kélpakxanma appagkanamap ekhémo mók nélpaqhetchasamáxkoho Dios, cham'a ekhem veinte, ektáha axta apqánet pelten, apqánet apyeyam.

¹²Apkelxegákxeyk axta makham ma'a israelitas, apkelántekkek axta m'a yókxexma meykexa nak énxet Sinaí. Yetnakmek axta yaphope m'a yókxexma meykexa nak énxet Parán.

¹³Aptamhágkek axta apkelxega m'a apkeltamhókxa axta Wesse' egegkok etnahagkok, apchásenneykekxo axta eltennaksek ma'a Moisés,

¹⁴apmonye'e axta apkelxegak ma'a sẽlpextétamo apheykha axta ekpayhókxa apkemhakxa m'a Judá bandera apagkok, Nahasón axta eyke apkemha apmonye' apagkok, Aminadab apketche nak.

¹⁵Natanael axta eyke apkemha apmonye' apagkok ma'a Isacar énxet'ák sẽlpextétamo apagkok, cham'a Natanael, Suar apketche nak.

¹⁶Keñe axta Eliab apkemha apmonye' apagkok ma'a Zabulón énxet'ák sẽlpextétamo apagkok, cham'a Eliab, Helón apketche nak.

¹⁷Tén axta kélleya m'a kélpakxanma appagkanamap, apkelxegkek axta nahan ma'a Guersón aptawán'ák neptámen nak tén han ma'a Merarí, apteme axta chá'a apkelánémap elsók.

¹⁸Yetlókok axta nahan apkelxega m'a sẽlpextétamo apheykha axta ekpayhókxa apkemhakxa m'a Rubén bandera apagkok, Elisur axta eyke apkemha apmonye' apagkok ma'a, Sedeúr apketche nak.

¹⁹Selumiel axta eyke apkemha apmonye' apagkok ma'a Simeón énxet'ák sẽlpextétamo apagkok, cham'a Selumiel, Surisadai apketche nak.

²⁰Eliasaf axta eyke apkemha apmonye' apagkok ma'a Gad énxet'ák sẽlpextétamo apagkok, cham'a Eliasaf, Reuel apketche nak.

²¹Yetlókok axta nahan apkelxega m'a Quehat aptawán'ák neptámen, apkelso axta chá'a m'a aqsok kélmeykegkaxa élpagkanamaxche nak. Xama axta apkelwokmo m'a, apkelwetágwokmek axta appenchásekpo m'a kélpakxanma appagkanamap.

²²Tén axta apkelxega nahan ma'a sẽlpextétamo apheykha axta ekpayhókxa apkemhakxa m'a Efraín bandera apagkok, Elisamá axta eyke apkemha apmonye' apagkok ma'a, Amihud apketche nak.

²³Gamaliel axta eyke apkemha apmonye' apagkok ma'a Manasés énxet'ák sẽlpextétamo apagkok, cham'a Gamaliel, Pedasur apketche nak.

²⁴Abidán axta eyke apkemha apmonye' apagkok ma'a Benjamín énxet'ák sẽlpextétamo apagkok, cham'a Abidán, Guidoní apketche nak.

²⁵Tén axta axayók agko' apkelxega m'a sẽlpextétamo apheykha axta ekpayhókxa apkemhakxa m'a Dan bandera apagkok, Ahiézer axta eyke apkemha apmonye' apagkok ma'a, Amisadai apketche nak.

²⁶Paguiel axta eyke apkemha apmonye' apagkok ma'a Aser énxet'ák sẽlpextétamo apagkok, cham'a Paguiel, Ocrán apketche nak.

²⁷Ahirá axta eyke apkemha apmonye' apagkok ma'a Neftalí énxet'ák sẽlpextétamo apagkok, cham'a Ahirá, Enán apketche nak.

²⁸Cháxa apkelánémakpexa axta chá'a etnahagkok sẽlpextétamo israelitas, apkelxegákxo enxoho chá'a.

²⁹Xama ekhem axta aptáhak apcháneya apepye Moisés se'e, cham'a Hobab, Reuel apketche, apteme nak Madián énxet: —Peyk negko'o ólmahagkok ma'a apchókxa sẽltennassamakxa nak hegmések ma'a Wesse' egegkok, hẽlyetlow sa', antaqmelchesek sa', hakte apxeyenmeyk Wesse' egegkok eltaqmelchesek yetlo apkelásekhayo m'a énxet'ák Israel.

³⁰Tén axta Hobab aptáha apchátegmowágkokxo s'e: —Ma', ekpekheyha ko'o ataqhohok makham ma'a señémeykxa axta, ekheykegkaxa nak ma'a énámakkok.

³¹Aptáhak axta apchátegmowágkokxo Moisés se'e: Ná hegkexa aqsa. Apya'ásegkók xép yókxexma yaqwánxa enxoho chá'a ólpakxenwók ma'a meykexa nak énxet, xeyep sa' etnehek sempékessáseyak chá'a ámay.

³²Ẽlyetlókek sa' agkok negko'o exchep, ólmések sa' nekha m'a ekyókxoho aqsok éltaqmalma sẽlmésso nak chá'a m'a Wesse' egegkok.

³³Apkelántekkek axta apkeleñama m'a Wesse' egegkok egkexe apagkok nak, apkelxegkek axta ekweykmoho ántánxo ekhem. Amonye' axta nahan kélxegkásak ma'a Wesse' egegkok yántéseksek apagkok, ekhémo mók nélpaqhetchásamáxkoho nak, yaqwayam kalyahássesha yaqwánxa ellókassók apkelyampe.

³⁴Xegamchek axta aqsa nahan apyetseksa'ák ekhem ma'a Wesse' egegkok yaphope apagkok, cham'a apkelxegákxo enxoho chá'a.

³⁵Xama axta emáwhok chá'a elxegekxak ma'a apkelseykha axta chá'a yántéseksek. Axta etnehek chá'a Moisés se'e: “¡Wesse' egegkok, exatakha'! ¡Yexpánches sa' ma'a apkelenmexma! ¡Yenyahagkok sa' apwet'a enxoho m'a aptaqnagko nak chá'a exchep!”

³⁶Keñe axta kélpekkenwokmo enxoho chá'a m'a yántéseksek nak. Axta etnehek chá'a Moisés se'e: “¡Wesse', éxyem makham, apheykegkaxa nak apxámokma apagko' sẽlpextétamo Israel!”