Read Lengua Sur Números 13 Bible Online

Números 13 - Lengua Sur bible

Números 13

¹Appaqhetchessek axta Wesse' egegkok Moisés. Aptáhak axta apcháneya s'e:

²“Eláphés sa' nápakha énxet'ák elanok ma'a xapop nak Canaán, yaqwánxa sa' ko'o agkések ma'a israelitas. Yáphés sa' chá'a xama énxet ektáhakxa nak chá'a apkemha apmonye' nepyeseksa m'a énxet'ák apagkok.”

³Apkeláphássek axta Moisés apkeleñama m'a yókxexma meykexa énxet nak Parán, ekhawo m'a apkeltamhókxa axta etnehek ma'a Wesse' egegkok. Apkeláneykpók axta apyókxoho m'a énxet apkelámha apmonye'e nak chá'a nepyeseksa m'a israelitas.

⁴Keso apkelwesey axta s'e: Samúa, Zacur axta apketche, apkeñama axta nepyeseksa m'a Rubén énxet'ák apagkok;

⁵Safat, Horí axta apketche, apkeñama axta nepyeseksa m'a Simeón énxet'ák apagkok,

⁶Caleb, Jefuné axta apketche, apkeñama axta nepyeseksa m'a Judá énxet'ák apagkok;

⁷Igal, José axta apketche, apkeñama axta nepyeseksa m'a Isacar énxet'ák apagkok;

⁸Oseas, Nun axta apketche, apkeñama axta nepyeseksa m'a Efraín énxet'ák apagkok;

⁹Paltí, Rafú axta apketche, apkeñama axta nepyeseksa m'a Benjamín énxet'ák apagkok;

¹⁰Gadiel, Sodí axta apketche, apkeñama axta nepyeseksa m'a Zabulón énxet'ák apagkok;

¹¹Gadí, Susí axta apketche, apkeñama axta nepyeseksa m'a José énxet'ák apagkok (cham'a Manasés nak énxet'ák apagkok);

¹²Amiel, Guemalí axta apketche, apkeñama axta nepyeseksa m'a Dan énxet'ák apagkok;

¹³Setur, Micael axta apketche, apkeñama axta nepyeseksa m'a Aser énxet'ák apagkok;

¹⁴Nahbí, Vapsí axta apketche, apkeñama axta nepyeseksa m'a Neftalí énxet'ák apagkok;

¹⁵Gueuel, Maquí axta apketche, apkeñama axta nepyeseksa m'a Gad énxet'ák apagkok;

¹⁶Cháxa apkelwesey axta énxet'ák apkeláphasso axta Moisés elanok ma'a apchókxa. Apyaqmagkassessek axta nahan apwesey m'a Oseas, Nun apketche, Josué axta aptemessáseykxak apwesey.

¹⁷Xama axta apkeláphasa Moisés elanok ma'a xapop nak Canaán. Aptáhak axta apkeláneya s'e: —Kólmohók sa' ma'a ekpayho nak Négueb, keñe sa' kólpéwhok ma'a yókxexma ekxámokmakxa nak meteymog élekhahéyak.

¹⁸Kóllano sa' ektémakxa m'a apchókxa nak, tén han ma'a énxet'ák apheykha nak ma'a kañe' nak, apmelyéhe'ék kexa essenhan apkelyelqákpo, apqántawók kexa nahan, essenhan apxámo'.

¹⁹Kóllano sa' ektémakxa m'a apchókxa apheykegkaxa nak, tásek kexa essenhan asagko', kóllano sa' ma'a tegma apkelyawe apagkok nak meyke kélhaxtegkáseyak nepyáwa kexa essenhan meteymog ekyennaqte kélhaxtegkáseyak ma'a nepyáwa nak,

²⁰tásek kexa m'a xapop essenhan asagko', yetneyk kexa m'a yenta'a élyawe essenhan méko. Nágkóle' aqsa; kólsanta sa' mók xama yámet ekyexna éleñama m'a yókxexma nak. Chaqhémók axta nahan ektéma eknakxamáxchexal'a émha amonye' ekyexna anmen yámet xa.

²¹Apkelxegkek axta m'a énxet'ák, apkelanawók axta apchókxa eyeynamo m'a yókxexma meykexa nak énxet Sin, ekpayho nak nepyeyam, ekweykekxoho m'a Rehob, ekpayho nak nexcheyha, ekpayho nak nentaxnamakxa m'a Hamat.

²²Apkelántaxneyk axta m'a ekpayho nak Négueb tén axta apkelwokmo m'a Hebrón. Cha'a apheykegkaxa axta nahan Ahimán, Sesai, tén han Talmai ma'a, Anac axta aptawán'ák neptámen. Siete apyeyam axta nahan weykmok apkelánamap ma'a tegma apwányam Hebrón, amonye' apkelánamap axta Soan ma'a Egipto.

²³Apkelwokmók axta m'a alwáta' étkok nak Escol, apyaqténwokmek axta nahan xama aktog anmen yámet yetlo ekyexna m'a, apqánet axta nahan apsákxak apmakheyáseyncha'a néten yámet appatmeykxo. Apnakxeygkek axta nahan ma'a yántakyexna, tén han ma'a higos ekyexna.

²⁴Escol axta nahan apteméssásak ekwesey xa alwáta étkok nak, eñama apyaqténwayam axta xama aktog anmen yámet yetlo ekyexna israelitas ma'a.

²⁵Cuarenta ekhem axta weykmok apkelányo m'a xapop nak, tén axta apkeltaqhémo makham

²⁶ma'a Cadés, yókxexma meykexa nak énxet ma'a Parán. Cha'a aphakxa axta nahan Moisés ma'a tén han Aarón, tén han ma'a apyókxoho israelitas. Apkeltennáseyha axta nahan ektáhakxa apkelwete aqsok ma'a, apxekmóssek axta han ma'a yámet ekyexna éleñama m'a apchókxa nak.

²⁷Aptáhak axta apcháneya Moisés se'e: —Nélwokmek axta negko'o m'a xapop sẽláphasakxa axta exchep, naqsók ekteme xapop ényahamakxa weyke nagkeygmenek, tén han yányawhéna' apyegmenek ektémól'a kanyehek ma'a yegmen. Keso ekyexna ektáha nak élántekkesso m'a.

²⁸Apmelyéhe'ék eyke énxet apheykha nak ma'a kañe' nak, élyawa agko' nahan ma'a apkelókxa nak, cham'a tegma apkelyawe apagkok nak, kalyéhe'ék nahan meteymog kélhaxtegkesso m'a nepyáwa'. Negwetágwokmek axta han Anac aptawán'ák neptámen ma'a, xama énxet apwenaqte axta.

²⁹Keñe m'a yókxexma Négueb apheykencha'a m'a amalecitas. Keñe m'a yókxexma ekxámokmakxa nak meteymog élekhahéyak apheykencha'a m'a hititas, jebuseos tén han ma'a amorreos, keñe m'a nekha nak wátsam ekwányam, ekpayho nak ma'a wátsam Jordán apheykencha'a m'a cananeos.

³⁰Tén axta Caleb apkelwanmeyásekxo m'a énxet'ák apchaqneyncha'a axta apmonye' m'a Moisés. Aptáhak axta apkeláneya s'e: —¡Ólmahagkok heykxa m'a xapop nak! ¡Agmok sa'! ¡Egwanchek sa'!

³¹Keñe m'a énxet'ák ektáha axta apkelyetlo apkelányo yókxexma, aptáha apkelátegmowágko s'e: —¡Mogwanchek negko'o agketamagkok ma'a énxet'ák nak! Apmelyehe'e', maghawok negko'o.

³²Apkeltennáseyha axta han israelitas ektáha ekmaso m'a apchókxa apkelmahágkaxa axta apkelano. Aptáhak axta apkeláneya s'e: —Kalnáphok énxet apheykha nak kañe' m'a xapop nélmahágkaxa axta negko'o nenlano, apyapmók nahan apyókxoho énxet negwetágwokmo axta negko'o m'a.

³³Negwet'ak axta han énxet apkelwenaqte, Anac aptawán'ák neptámen. Xénche nak la'a egwáxok anxohok séta anchaqnágwók ma'a ekpayhókxa apchaqnágkaxa, cha'a katnehek nahan henlanok negko'o m'a.