Read Lengua Sur Números 16 Bible Online

Números 16 - Lengua Sur bible

Números 16

¹Apkenmexeykekxeyk axta Moisés xama levita, aptáwen neptámen axta m'a Quehat, apwesey axta Coré, Ishar axta apketche, tén han apqántánxo Rubén énxet'ák apagkok, apwesey axta Datán, Abiram, Eliab axta apketchek, tén han On, Pélet axta apketche. Appasmeykekxeyk axta nahan doscientos cincuenta m'a nápakha nak israelitas, cham'a énxet apkelámha apmonye'e nak nepyeseksa énxet'ák, aptáha nak apkeleñama nepyeseksa m'a apkelámha apmonye'e apkelyésamap, tén han ektaqmalma nak chá'a apkelxénamap ekyókxoho yókxexma.

³Apyókxoho axta apchaqnákxak xa, apkenmexa m'a Moisés tén han Aarón. Aptáhak axta apkeláneya s'e: —¡Wánxa kólteme kéltémo kóltéhek ekha kéláyo! Apyókxoho énxet'ák apteme apkelpagkanchásamap ma'a Dios, aphegkek han negyeseksa negko'o negyókxoho m'a Wesse' egegkok. ¿Yaqsa ektéma kéxegke kéltéma nak kélámha kélmonye'e ekyawe kéláyo nepyeseksa m'a Wesse' egegkok énxet'ák apagkok?

⁴Yetlókok axta nahan apháxaheykenta Moisés ekwokmoho aptekxeya ekpayhakxa nápat xapop apleg'a xa,

⁵aptáhak axta apcháneya Coré, tén han ma'a ektáha axta appasmeykekxa: —Saka axto'ók agko' sa' hegya'ássesagkohok Wesse' egegkok, yaqsa kexaha ektáha apagkok, tén han yaqsa kexaha apkelpagkanma, tén han ekmowána keypetchegwomho'. Wánxa sa' aqsa apwanchek épetchegwomhok ma'a ektáha nak apkelyéseykha.

⁶Kólteme sa' se'e: kólsanta sa' apxata nak chá'a aqsok ánek ekmátsa ekpaqneyam éten agkok ma'a Coré, tén han ma'a apkelxegexma'a nak,

⁷kólxátem sa' átex, tén sa' kólxatmok nahan ma'a aqsok ánek ekmátsa nak ekpaqneyam éten agkok, kólpekken sa' axto'ók ma'a nápaqtók Wesse' egegkok. Énxet apkelyéseykha enxoho m'a Wesse' egegkok, cháxa ektáha appagkanma m'a. ¡Énxet'ák levitas, wánxa kólteme kélteme néten nepyeseksa énxet'ák!

⁸Tén axta Moisés aptáha makham apcháneya Coré s'e: —Levitas, héleyxho sekxo':

⁹¿Kélanagkamcheya kexyókók kéxegke apkelyéseykencha'a axta Israel Dios apagkok nepyeseksa m'a énxet'ák Israel, tén han kélhama chá'a ketók ma'a, tén han kéltéma kéltamheykha m'a Wesse' egegkok nak kélpakxanma appagkanamap apagkok, kéllánéssama chá'a aqsok ma'a énxet'ák?

¹⁰Apmenyeyk xép Wesse' egegkok exek ma'a ketók aphakxa, tén han ma'a nápakha nak énxet'ák apagkok levitas, keñe kaxwók kélámenyého kóltéhek apkelmaxnéssesso Dios énxet'ák apagkok.

¹¹Kélxénáha agkok kéxegke ekmaso m'a Aarón, cháxa kélenmexeyncha'a m'a Wesse' egegkok, xép, tén han m'a apkelxegexma'a nak.

¹²Tén axta Moisés apkeltamho kólyentawakxak ma'a Datán, Abiram, Eliab apketchek nak, tén axta aptáha apkelátegmowágko s'e: —Magmakók negko'o ólxog.

¹³¿Apkenagkamcheya kaxyókak xép sẽlántekkessama m'a apchókxa ényahamakxa nak weyke nagkeygmenek, tén han yányawhéna' apyegmenek, ektémól'a kanyehek ma'a yegmen, yaqwayam helnáhapwak se'e yókxexma meykexa nak énxet, tén han apmáheyo etnehek xép apkemha apmonye' egagkok, ekha kéláyo?

¹⁴Mehennaqlók xép xama enxoho m'a apchókxa ényahamakxa nak weyke nagkeygmenek, tén han yányawhéna' apyegmenek, ektémól'a kanyehek yegmen, mehegméssók han ma'a yókxexma, tén han ma'a émhakxa nak anmen yámet. ¿Apmenyéya exchep yohok aqsa enaqlók apyókxoho énxet ektémól'a m'a meyke apaqta'ák la'a? Ma', mólxegek negko'o m'a.

¹⁵Aplókók apagko' axta m'a Moisés. Aptáhak axta apcháneya Wesse' egegkok se'e: —¡Ná ema aqsa takha' aqsok apkelmésso naqsa apkelseykentegkesso xa énxet'ák nak! Malyementamák ko'o xama enxoho yámelyeheykok apnaqtósso m'a, matnéssesseykmohok nahan exma ekmaso xama enxoho m'a.

¹⁶Tén axta Moisés aptáha apcháneya Coré s'e: —Emyenta sa' saka nápaqtók Wesse' egegkok yetlo apkelxegexma'a. Aarón sa' nahan ewakxak ma'a.

¹⁷Kélxama sa' chá'a kólsanták ma'a kélxata nak chá'a aqsok ánek ekmátsa ekpaqneyam éten agkok, kólxátem sa' ma'a aqsok ánek ekmátsa nak ekpaqneyam. Eswok sa' xépxa m'a apxata nak chá'a aqsok ánek ekmátsa ekpaqneyam éten agkok tén han ma'a Aarón, kólnegkenek sa' nápaqtók Wesse' egegkok yetlo m'a doscientos cincuenta énxet'ák nak.

¹⁸Apkelsánteyk axta chá'a xama m'a apxata nak chá'a aqsok ánek ekmátsa ekpaqneyam éten agkok, apxatmégkek axta átex, tén han ma'a aqsok ánek ekmátsa nak ekpaqneyam, apnegkenágkek axta m'a átog nak kélpakxanma apchaqneykekxexa nak chá'a énxet'ák, aphakxa axta m'a Moisés tén han ma'a Aarón.

¹⁹Appenchessek axta apcháncheseykekxa Coré apyókxoho énxet'ák ma'a átog nak kélpakxanma apchaqneykekxexa nak chá'a énxet'ák. Tekkek axta Wesse' egegkok élseyéxma apagkok nápaqta'awók ma'a apyókxoho énxet'ák.

²⁰Aptáhak axta Wesse' egegkok apcháneya Moisés tén han Aarón se'e:

²¹—¡Kólántép sa' nepyeseksa xa énxet'ák nak, amasséssók sa' ko'o ekmanyehe agko'!

²²Apkelháxahanteyk axta eyke ekwokmoho apkeltekxeya élpayhakxa nápaqta'a xapop ma'a. Aptáhak axta s'e: —Oh Dios, xép apteme apmésso apkelyennaqte apyókxoho énxet'ák. ¿Péya eltaqnaweygkok apyókxoho énxet, eñama apkelane mey'assáxma xama énxet?

²³Aptáhak axta Wesse' egegkok apchátegmowágkokxo Moisés se'e:

²⁴—Yána elyetnakhak apyókxoho israelitas ma'a kélpakxanma, aphakxa nak ma'a Coré, Datán, tén han Abiram.

²⁵Apchampákxeyk axta néten Moisés, apkelyetlókek axta nahan ma'a apkelámha apmonye'e nak Israel apmahágko m'a aphakxa axta Datán tén han Abiram.

²⁶Tén axta aptáha apkeláneya énxet'ák se'e: —Kólántép apkelpakxeneykegkaxa nak xa énxet'ák élmasagcha'a nak apkeltémakxa, nágkólpaknegwomho aqsa xama enxoho m'a aqsok apagkok nak, hakte kóletsapok katnehek kéxegkáxa, eñama melya'assáxma xa énxet'ák nak.

²⁷Apkelyetnakha'ak axta énxet'ák ma'a apheykegkaxa axta m'a Coré, Datán, tén han Abiram. Apháha axta átog apkelpakxenéyak ma'a Datán tén han Abiram, yetlo apnaqteyegka'a, tén han apketchek.

²⁸Aptáhak axta makham Moisés se'e: —Sa' eyke kélya'ásegwokmo aptáha ko'o seyáphasso Wesse' egegkok apkeltémo alának se'e ekyókxoho aqsok nak, tén han megkatnaha sekmáheyo ahagko' ko'o alána'.

²⁹Apkeletsekkek agkok chá'a s'e énxet'ák nak, apkeletsapma apagko' enxoho chá'a, ektémól'a m'a apyókxoho énxet'ák, eyke megkatnaha ko'o seyáphasso m'a Wesse' egegkok.

³⁰Sa' eyke m'a apkelana sa' Wesse' egegkok aqsok magweteya nak katnehek, ekmayheykxo enxoho xapop, élweykeságko sa' ma'a énxet'ák, yetlo m'a ekyókxoho aqsok apagkok ekyetnakxa nak, appallakmo enxoho yetlo apaqta'ák ma'a kañók agko' nak xapop, keñe sa' kólya'ásegwók kéxegke apkelwanyeykha Wesse' egegkok xa énxet'ák nak.

³¹Xama axta appenchesa appaqmeyesma m'a Moisés, mayhékxeyk axta xapop kóneg aphágkaxa,

³²kelweykeságkek axta apyókxoho énxet'ák ektáha axta appasmeykekxa m'a Coré, yetlo aphawóxama, tén han ma'a ekyókxoho aqsok apagkok ekyetnakxa nak.

³³Yetlo apaqta'ák axta appallakmok ma'a kañók agko' nak xapop, ekyókxoho aqsok apagkok, tén axta ekwánaqmákxo makham ma'a xapop. Cháxa ektáhakxa axta kélmasséssekmo m'a nepyeseksa israelitas.

³⁴Xama axta eklegáxko élpayheykha apatña'ák, apkenyahágkek axta m'a apyókxoho israelitas apheykha axta m'a neyáwa apheykegkaxa. Aptáhak axta apkelpaqmeta s'e: “¡Hẽlweykesagkok katnehek negko'óxa kañe' xapop!”

³⁵Apcháphássek axta han táxa Wesse' egegkok, kelnapchek axta m'a doscientos cincuenta énxet'ák apkelseykekxésso axta m'a aqsok ánek ekmátsa nak ekpaqneyam éten agkok.

³⁶Appaqhetchessek axta Wesse' egegkok ma'a Moisés. Aptáhak axta apcháneya s'e:

³⁷“Yána elhaxyawássekxak neyseksa táxa eyáléwe kélxata nak chá'a aqsok ánek ekmátsa ekpaqneyam éten agkok ma'a Eleazar, Aarón apketche nak, yána sa' epalchessók makhawók ma'a átex éleymomáxche nak makham ma'a kañe' awáxok.

³⁸Élpagkanamaxche táhak apxata nak chá'a aqsok ánek ekmátsa ekpaqneyam éten agkok xa énxet'ák nak, apkeletsapa nak eñama melya'assáxma, hakte kélmeykha axta chá'a yaqwayam kólnegkenwók nahaqtók ko'o m'a aqsok ánek ekmátsa nak ekpaqneyam éten agkok. Kólpeykásekxa sa' xa sawo nak yaqwayam sa' kólyepetchesek émpehek ma'a ekwatnamáxchexa nak aqsok, yaqwayam sa' katnehek ekxénweykekxoho chá'a apkelwáxok kéleysso m'a israelitas.”

³⁹Apchánchesákxeyk axta kélxata nak chá'a aqsok ánek ekmátsa ekpaqneyam éten agkok sawo élyexwase m'a apkelmaxnéssesso Dios énxet'ák apagkok Eleazar, apkelseykekxa axta m'a énxet'ák apkeletsapa axta eñama élwatno m'a táxa, apkeltamhók axta kólpeykásekxak yaqwayam kólyepetchesek émpehek ma'a ekwatnamáxchexa nak aqsok.

⁴⁰Cháxa ekteme axta éltennáseykekxoho chá'a eyeysso m'a israelitas, megkamopwána épetchegwomhok chá'a ekwatnamáxchexa aqsok egkések Wesse' egegkok ma'a aqsok ánek ekmátsa nak ekpaqneyam éten agkok, metnaha enxoho Aarón aptawán'ák neptámen; hakte aptemék agkok xa, kaxhok sa' ektáhakxa m'a ektáhakxa axta Coré, yetlo m'a apkelxegexma'a nak. Apyókxoho axta nahan apkelánegkok, ekhawo apkeltamhókxa axta etnehek Wesse' egegkok ma'a Eleazar, apchásennaya axta eltennaksek ma'a Moisés.

⁴¹Keñe axta mók ekhem, apcheynawo apkelpaqmeteyncha'a apyókxoho énxet'ák Israel aptaqnawaya m'a Moisés tén han Aarón. Axta aptáhak apcháneya s'e: —¡Kélnapchek kéxegke Wesse' egegkok énxet'ák apagkok!

⁴²Apyókxoho axta apwakhegwokmok ma'a aphakxa axta Moisés tén han Aarón; tén axta apkelenmexákxoho m'a kélpakxanma apchaqneykekxexa nak chá'a énxet'ák. Yetlókok axta nahan eyapma yaphope m'a, tekkek axta Wesse' egegkok élseyéxma apagkok.

⁴³Tén axta Moisés tén han Aarón, apkelxega apchaqnágwokmo m'a apmonye' nak kélpakxanma apchaqneykekxexa énxet'ák,

⁴⁴aptáhak axta Wesse' egegkok apcháneya Moisés se'e:

⁴⁵—¡Kólántép sa' nepyeseksa xa énxet'ák nak, amasséssók sa' ko'o ekmanyehe agko'! Apháxahánteyk axta eyke Moisés tén han Aarón ekwokmoho apkeltekxeya élpayhakxa nápaqta'a xóp,

⁴⁶tén axta Moisés aptáha apcháneya Aarón se'e: —Esanta apxata nak chá'a aqsok ánek ekmátsa ekpaqneyam éten agkok, exátem sa' átex éleñama nak ma'a ekwatnamáxchexa aqsok, tén sa' exatmok nahan ma'a aqsok ánek ekmátsa nak ekpaqneyam; emyekxa sa' heykxe m'a aphágkaxa nak énxet'ák, elmaxna sa' Dios meyaqmagkásekxeyk melya'assáxma m'a, hakte aplókek ma'a Wesse' egegkok, tekkek nahan kaxwók ma'a negmasse ekmaso.

⁴⁷Aptemék axta Aarón ma'a aptáhakxa axta apcháneya m'a Moisés, apketchágkokxeyk axta apmeyákxo m'a apchaqnákxexa axta énxet'ák. Tekkessek axta aqsok ekmaso nepyeseksa énxet'ák ma'a negmasse ekmaso apcháphasso axta m'a Dios. Appekkenchek axta Aarón ma'a aqsok ánek ekmátsa nak ekpaqneyam, tén axta apkelmaxneya Dios apkeltamho meyaqmagkásekxeyk melya'assáxma m'a énxet'ák.

⁴⁸Apkenegwokmek axta nepyeseksa m'a apkeletsapma axta, tén han ma'a meletsapma axta makham, tén axta ekmassa m'a negmasse,

⁴⁹catorce mil setecientos énxet axta apkeletsapak, meyke kélyetsáteykekxa m'a apmonye' apkeletsapma axta, apkelsexnenagkama axta m'a Coré.

⁵⁰Xama axta ekmassa m'a negmasse, apmeyákxeyk axta makham Aarón m'a átog nak kélpakxanma apchaqneykekxexa énxet'ák, yaqwayam exnakxohok makham xamók ma'a Moisés.