Read Lengua Sur Números 2 Bible Online

Números 2 - Lengua Sur bible

Números 2

¹Apkelpaqhetchessek axta Wesse' egegkok Moisés tén han Aarón, aptáhak axta apkeláneya s'e:

²“Kéméxcheyk elpakxenagkok chá'a yámmakhawók nepyáwa kélpakxanma apchaqneykekxexa nak chá'a énxet'ák ma'a israelitas, xama xama chá'a m'a apkemhakxa nak bandera apagkok, magkenatchesso chá'a ektáhakxa nak chá'a apnámakkok apagko'.

³“Teyapmakxa ekhem sa' elpakxenagkok ma'a Judá sẽlpextétamo apagkok, apkemhakxa nak bandera apagkok. Nahasón akke apkemha apmonye' apagkok xa sẽlpextétamo apagkok nak Judá énxet'ák apagkok, cham'a Nahasón apketche nak Aminadab,

⁴setenta y cuatro mil seiscientos apkelennay'a axta apyókxoho m'a, cham'a apwánxa axta kélnaqtáxéseyak apkelwesey m'a weykcha'áhak.

⁵Isacar sẽlpextétamo apagkok sa' nahan elpakxenagkok ma'a nekha nak apkelpakxenéyak, aptáha nak apkemha apmonye' m'a Natanael, Suar apketche nak,

⁶cincuenta y cuatro mil cuatrocientos apkelennay'a axta apyókxoho m'a, cham'a apwánxa axta kélnaqtáxéseyak apkelwesey weykcha'áhak.

⁷Elpakxenagkok sa' nahan xamók ma'a Zabulón énxet'ák sẽlpextétamo apagkok, ektáha nak apkemha apmonye' m'a Eliab, apketche nak Helón,

⁸cincuenta y siete mil cuatrocientos apkelennay'a axta nahan apyókxoho m'a, cham'a apwánxa axta kélnaqtáxéseyak apkelwesey weykcha'áhak.

⁹Cháxa peya sa' etnehek ántánxo apheykegkaxa m'a Judá énxet'ák nak sẽlpextétamo apagkok, ciento ochenta y seis mil cuatrocientos apkelennay'a sa' emmok apyókxoho, yaqwayam sa' elxog apmonye'e m'a israelitas.

¹⁰“Nepyeyam sa' elpakxenagkok ma'a Rubén nak sẽlpextétamo apagkok apkemhakxa nak ma'a bandera apagkok. Elisur akke apteme apkemha apmonye' apagkok ma'a Rubén énxet'ák sẽlpextétamo apagkok nak, Sedeúr apketche nak,

¹¹cuarenta y seis mil quinientos apkelennay'a axta apyókxoho m'a, cham'a apwánxa axta kélnaqtáxéseyak apkelwesey weykcha'áhak.

¹²Elpakxenagkok sa' nahan xamók ma'a Simeón énxet'ák sẽlpextétamo apagkok, ektáha nak apkemha apmonye' apagkok ma'a Selumiel, apketche nak Surisadai,

¹³cincuenta y nueve mil trescientos apkelennay'a axta nahan apyókxoho m'a, cham'a apwánxa axta kélnaqtáxéseyak apkelwesey weykcha'áhak.

¹⁴Elpakxenagkok sa' nahan xamók ma'a Gad énxet'ák nak sẽlpextétamo apagkok, aptáha nak apkemha apmonye' apagkok ma'a Eliasaf, apketche nak ma'a Reuel,

¹⁵cuarenta y cinco mil seiscientos cincuenta apkelennay'a axta nahan apyókxoho m'a, cham'a apwánxa axta kélnaqtáxéseyak apkelwesey weykcha'áhak.

¹⁶Cháxa peya sa' etnehek ántánxo apheykegkaxa m'a Rubén énxet'ák sẽlpextétamo apagkok, ciento cincuenta y un mil cuatrocientos cincuenta apkelennay'a sa' emmok apyókxoho, yaqwayam elxog axayo'.

¹⁷“Keñe sa' levitas elxog nepyeseksa m'a hawók nápakha apkelpakxenéyak nak, eswok ma'a kélpakxanma apchaqneykekxexa nak chá'a énxet'ák. Eleywekxak sa' elxog ma'a hawók nápakha apkelpakxenéyak nak, cham'a ektáhakxa axta chá'a apkelpakxenéyak, apkemhakxa nak chá'a m'a bandera apagkok.

¹⁸“Taxnegwánxa ekhem sa' elpakxenagkok ma'a Efraín nak sẽlpextétamo apagkok, apkemhakxa nak bandera apagkok. Elisamá akke apkemha apmonye' apagkok ma'a Efraín énxet'ák nak sẽlpextétamo apagkok, cham'a apketche nak Amihud,

¹⁹cuarenta mil quinientos apkelennay'a axta nahan apyókxoho m'a, cham'a apwánxa axta kélnaqtáxéseyak apkelwesey weykcha'áhak.

²⁰Elpakxenagkok sa' nahan xamók ma'a Manasés énxet'ák nak sẽlpextétamo apagkok, ektáha nak apkemha apmonye' apagkok ma'a Gamaliel, apketche nak Pedasur,

²¹treinta y dos mil doscientos apkelennay'a axta nahan apyókxoho m'a, cham'a apwánxa axta kélnaqtáxéseyak apkelwesey weykcha'áhak.

²²Elpakxenagkok sa' nahan xamók ma'a Benjamín énxet'ák sẽlpextétamo apagkok, ektáha nak apkemha apmonye' apagkok ma'a Abidán, apketche nak ma'a Guidoní,

²³treinta y cinco mil cuatrocientos apkelennay'a axta nahan apyókxoho m'a, cham'a apwánxa axta kélnaqtáxéseyak apkelwesey weykcha'áhak.

²⁴Cháxa peya sa' etnehek ántánxo apheykegkaxa m'a Efraín sẽlpextétamo apagkok. Ciento ocho mil cien apkelennay'a sa' emmok apyókxoho, yaqwayam elxog axayo' aptáhakxa nak apqántánxo apkelxega.

²⁵“Nexcheyha sa' elpakxenagkok ma'a Dan nak sẽlpextétamo apagkok, apkemhakxa nak bandera apagkok. Ahiézer akke apkemha apmonye' apagkok ma'a Dan énxet'ák nak sẽlpextétamo apagkok, apketche nak Amisadai,

²⁶sesenta y dos mil setecientos apkelennay'a axta apyókxoho m'a, cham'a apwánxa axta kélnaqtáxéseyak apkelwesey weykcha'áhak.

²⁷Elpakxenagkok sa' nahan xamók ma'a Aser énxet'ák sẽlpextétamo apagkok, aptáha nak apkemha apmonye' apagkok ma'a Paguiel, apketche nak Ocrán,

²⁸cuarenta y un mil quinientos apkelennay'a axta nahan apyókxoho m'a, cham'a apwánxa axta kélnaqtáxéseyak apkelwesey weykcha'áhak.

²⁹Elpakxenagkok sa' nahan xamók ma'a Neftalí énxet'ák sẽlpextétamo apagkok, ektáha nak apkemha apmonye' apagkok ma'a Ahirá, apketche nak ma'a Enán,

³⁰cincuenta y tres mil cuatrocientos apkelennay'a axta nahan apyókxoho m'a, cham'a apwánxa axta kélnaqtáxéseyak apkelwesey weykcha'áhak.

³¹Cháxa peya sa' etnehek ántánxo apheykegkaxa m'a Dan sẽlpextétamo apagkok, ciento cincuenta y siete mil seiscientos apkelennay'a sa' emmok apyókxoho, yaqwayam sa' elxog axayók agko', neptámen ma'a apkemhakxa nak bandera apagkok.”

³²Seiscientos tres mil quinientos cincuenta apkelennay'a axta apwokmok apyókxoho kélnaqtáxéseyak apkelwesey weykcha'áhak ma'a israelitas.

³³Axta eyke kólyetsetak ma'a levitas, ekhawo m'a aptáhakxa axta Wesse' egegkok apkeltamhókxa etnehek ma'a Moisés.

³⁴Apkelyahákxók axta israelitas ma'a ekyókxoho aptáhakxa axta Wesse' egegkok apkeltamhókxa etnehek ma'a Moisés: apkelpakxenágkek axta chá'a m'a ekpayhókxa nak chá'a apkemhakxa m'a bandera apagkok, apkelxegkek axta nahan chá'a xamók ma'a ektáhakxa nak chá'a apnámakkok, tén han apnámakkok apagko'.