Read Lengua Sur Números 23 Bible Online

Números 23 - Lengua Sur bible

Números 23

¹Tén axta Balaam aptáha apcháneya s'e: —Yána sa' ko'o héllanaksek siete élwatnamáxchexa aqsok se'e, henaqlantagkas sa' nahan siete weyke étkók kelennay'a, tén han siete nepkések apkelennay'a.

²Apkelanak axta nahan Balac ma'a apkeltamhókxa axta etnehek ma'a Balaam, apchaqhak axta nahan chá'a xama weyke étkok kennawo' tén han xama nepkések xa apqánet nak, cham'a xama nak chá'a m'a élwatnamáxchexa aqsok.

³Tén axta Balaam aptáha apcháneya Balac se'e: —Exa sa' se'e nekha nak ekhágkaxa kélnaqtósso apkelwatno, axog sa' sekxók ko'o, alanyexmakha m'a Wesse' egegkok. Keñe sa' altennáseták ma'a sey'assásegwayam enxoho ko'o. Apxegkek axta Balaam apmahágko m'a étseksek egkexe meykexa nak énxet,

⁴apxekmowásekpexa axta m'a Dios. Aptáhak axta apcháneya Balaam se'e: Élanak xeyk ko'o siete élwatnamáxchexa aqsok, ekpekkenchek nahan chá'a xama xama weyke étkok kennawo', tén han xama nepkések apkennawo' sélwatno m'a néten nak.

⁵Tén axta Wesse' egegkok apkeltennasa Balaam apkeltamhókxa chá'a etnehek appeywa. Aptáhak axta apcháneya s'e: —Emyekxa sa' makham ma'a aphakxa nak Balac, eltennés sa' se'e sektáhakxa nak seyáneya exchep.

⁶Aptaqháwok axta makham ma'a Balaam, apwetágweykxeyk axta Balac apkenmeyncha'a m'a nekha nak apkelwatnakxa aqsok kélnaqtósso, yetlo apkelxegexma'a m'a apyókxoho apkelámha apmonye'e nak moabitas.

⁷Tén axta Balaam aplegasa s'e ektéma nak amya'a: “Aram axta eñamak seyáneyeykencha'a m'a Balac wesse' apwányam nak Moab, axta eñamak ma'a élámhakxa nak meteymog élekhahéyak ekpayho nak ekteyapmakxa ekhem. Exegma —axta aptáhak seyáneya— yána kaltemégwomhok exma ekmaso énxet'ák Israel, yána kasók apheykha m'a Jacob énxet'ák apagkok.

⁸¿Háxko atnehek ko'o altamhok kaltemégwomhok exma ekmaso m'a meltémo nak kasók apheykha m'a Dios? ¿Háxko atnehek ko'o wámenyéhok kasók apheykha m'a énxet'ák, metnéssesso nak ekmaso apheykha m'a Wesse' egegkok?

⁹Ekwet'ak ko'o neyseksa sénmeykha s'e netnók meteymog ekwenaqte nak, élanawók neyseksa sénmeykha s'e néten egkexe étseksek nak: apteme énxet'ák apheykha apxakcha'awo', megkólpáxaqtésso m'a pók énxet'ák nak.

¹⁰Máxa xapop ánek, ¿yaqsa awanchek kalyetsetek? ¿Yaqsa awanchek kay'asagkohok apwánxa apxámokma? ¡Katnoho annal'a ko'o xa sétsapma ektéma nak xa énxet'ák apkelpéwomo nak, tén katnegwók néxa sekha ektéma nak ma'a!”

¹¹Tén axta Balac aptáha apcháneya Balaam se'e: —¿Yaqsa apkelana exchep? Eyáneyáha axta ko'o exchep yaqwayam yának kaltemegwomhóxma ekmaso m'a sélenmexma nak, keñe exchep apkelmaxnéssesa aqsa aqsok éltaqmela.

¹²Aptáhak axta Balaam apchátegmowágkokxo s'e: —Wánxa eyke aqsa ko'o ewanchek axének ma'a apkeltémo nak axének ma'a Wesse' egegkok.

¹³Aptáhak axta makham Balac apcháneya s'e: —Hétlógma sa', ólmahagkok mók nekha, yaqwánxa sa' étak wánxa nápakha m'a apkelpakxeneykegkaxa nak énxet'ák, háwe m'a apyókxoho nak. Ey'aksek sa' aqsa appeywa makhawo yának kaltemégwomhok exma ekmaso.

¹⁴Apyentegkek axta Balac yókxexma Sofim ma'a Balaam, étseksek axta m'a egkexe Pisgá, apkelanakxa axta siete élwatnamáxchexa aqsok, apkelwatnakxa axta nahan chá'a xama xama m'a weyke étkok kennawo', tén han xama nepkések apkennawo'.

¹⁵Tén axta Balaam aptáha apcháneya Balac se'e: —Exa sa' se'e, nekha nak aqsok kélnaqtósso apkelwatno, axog sa' sekxók ko'o alanyexmakha m'a Dios.

¹⁶Aptahaña'ak axta nahan Wesse' egegkok ma'a Balaam, apkeltennássek axta nahan apkeltamhókxa chá'a etnehek appeywa. Aptáhak axta nahan apcháneya s'e: —Emyekxa sa' makham ma'a aphakxa nak Balac, eltennés sa' nahan sektáhakxa nak ko'o seyáneya exchep.

¹⁷Aptaqháwok axta m'a Balaam, apwetágweykxeyk axta nahan Balac apkenmeyncha'a m'a nekha nak apkelwatnakxa aqsok kélnaqtósso, yetlo apkelxegexma'a m'a apkelámha apmonye'e nak moabitas. Aptáhak axta Balac apkelmaxneyáncha'a s'e: —¿Háxko aptáhakxa apcháneya Wesse' egegkok?

¹⁸Tén axta Balaam aplegasa s'e ektéma nak amya'a: “Balac, Sipor apketche, etaqmelchesho sa' apháxenmo sekpeywa.

¹⁹Maghawok negko'o m'a Dios nentáha nak énxet néletsapmo nak chá'a, metnehek apmopwána amya'a, meyaqmagkassemek nahan mók ma'a aqsok apxeyenma. Apxénchek agkok xama aqsok, elának nahan. Apxénchek agkok nahan élanak xama aqsok, elának nahan.

²⁰Apkeltamhók ko'o almaxnéssesek aqsok éltaqmela, mowanchek ko'o altamhok kaltemegwomhóxma ekmaso, cham'a Dios apkeltémo nak kataqmelhok apheykha.

²¹Méko ekweteya apkeltémakxa apkelmopwancha'a amya'a, tén han melya'assáxma m'a énxet'ák Israel, Jacob énxet'ák apagkok nak. Apheyk nepyeseksa ma'a Dios Wesse' apagkok, apkeltemegkek chá'a wesse' apwányam apagkok.

²²Aphéssamók nahan weyke kennawók kepet'ák ma'a Dios, apkelántekkesso axta m'a Egipto.

²³Megkólwanchek kólónek Jacob. Mopwanchek yohóxma yenmexek Israel. Sa' kóltéhek kaxwók kólxének Israel se'e: ¡Tásók agko' apteméssessamakxa exchep Dios!

²⁴Apkenmexchek agkok énxet, máxa etnahagkok ma'a ektémól'a yámakméwa katnamha, megkeytek ekwokmoho eksawha ekyógkexma, ekwokmoho ekyena éma agkok ma'a eyaqhe nak.”

²⁵Keñe axta Balac aptáha apcháneya Balaam se'e: —¡Mopwanchek sa' agkok yának kaltemégwomhok exma ekmaso xa énxet'ák nak. Ná elmaxnésses han aqsok éltaqmela!

²⁶Aptáhak axta Balaam apchátegmowágko s'e: —Éltennássek axta ko'o exchep, wánxa seyewagko alának ma'a apkeltémo nak alának Wesse' egegkok.

²⁷Tén axta Balac aptáha apcháneya s'e: —Émpoho, eyntamok sa' ko'o exchep mók nekha. Kalkohok sa' kexa apwáxok Dios yának kaltemégwomhok exma ekmaso énxet'ák Israel ma'a.

²⁸Keñe axta Balac apyentama Balaam ma'a étseksek egkexe nak Peor, negweteyókxa nak ekyókxoho m'a yókxexma meykexa nak énxet.

²⁹Cha'a aptáhakxa axta nahan Balaam apcháneya Balac se'e: —Hélanés sa' ko'o siete ekwatnamáxchexa aqsok se'e, hennaqlantagkas sa' nahan siete weyke étkók kelennay'a, tén han siete nepkések apkelennay'a.

³⁰Apkelanak axta Balac ma'a apkeltamhókxa axta elának ma'a Balaam, apchaqhak axta chá'a xama weyke kennawo étkok xama xama m'a ekwatnamáxchexa nak chá'a aqsok, tén han xama nepkések apkennawo'.