Read Lengua Sur Números 24 Bible Online

Números 24 - Lengua Sur bible

Números 24

¹Xama axta apwet'a Balaam ekleyawo apwáxok Wesse' egegkok elmaxnéssesek yaqwayam kataqmelek apheykha m'a énxet'ák Israel, massék axta apmeyncha'a apmopwána yaqwayam ey'asagkohok ma'a Dios appeywa, aptáhakxa axta m'a sekxók axta, appayhékxók axta aqsa apkenmexákxoho m'a yókxexma meykexa nak énxet.

²Xama axta apwet'a Balaam énxet'ák Israel aptéma apkelpakxenéyak apagko' chá'a m'a ektáhakxa nak chá'a énxet'ák apagkok, aptaxneyk axta apwáxok Dios espíritu apagkok.

³Tén axta Balaam aplegasa s'e amya'a nak: “Ko'o sekpeywa s'e sekwesey nak Balaam, Beor apketche nak, sekweteyo nak yáxña'akxoho aqsok,

⁴yetnáha agkok ahaqtek kayágwomhok sekwete yáxña'akxoho aqsok, añak chá'a amya'a, hélxekmóshok nahan chá'a aqsok eñama nak Dios ekha apyennaqte.

⁵¡Jacob, apkeltásek apagko' xép apkelpakxanma! ¡Israel, tásók agko' nak la'a kélpakxeneykegkaxa!

⁶Máxa m'a áxa éléweykekxal'a, ektémól'a kélcheneykekxexa pánaqte exnók neyáwa wátsam, máxa m'a ektémól'a kentem apkeneykekxal'a Wesse' egegkok, ¡ektémól'a yámet cedro élámha nak neyáwa yegmen!

⁷Awanhek sa' katnehek yegmen ma'a Israel yaqwayam énagkok énxet'ák, tén han yaqwayam elexpaqhagkok ma'a aqsok apkeneykekxa. Néten sa' etnehek ma'a wesse' apwányam apagkok, mexók sa' ma'a Agag; kasawhekxohok sa' apteme wesse' apwányam.

⁸Máxa weyke kennawók kepet'ák apteméssessók ma'a Dios apkelántekkesso axta m'a Egipto. Esáwak sa' énxet'ák Israel ma'a apkelenmexma nak, elekkexchesek sa' apexchakkok, elmallahanchessamhok sa' elyátak yágke.

⁹Aphágkek agkok ellókasek apkelyampe, máxa etnahagkok ma'a ektémól'a méwa: méko nahan kamáwhok kanaqxétekhasagkok. ¡Apkeleñémo sa' chá'a kóltéméssesek ma'a ektáha nak chá'a ektaqmalma apxeyenma, sagkek sa' chá'a katnehek apxénamap ma'a apkeltémo nak chá'a katnégwomhok exma ekmaso!”

¹⁰Aptaqnókók apagko' axta Balac ma'a Balaam apleg'a xa, apkeltekpagáha axta apmék aptáha apcháneya s'e: —Eyáneyáha axta ko'o exchep yaqwayam yának kaltemégwomhok exma ekmaso s'e sélenmexma nak, ántánxo aqsa táhak apkelmaxnéssesso aqsok éltaqmela.

¹¹¡Etaqhoho sa' aqsa makham ma'a apxagkok! Éltennássek axta ko'o exchep almések ekxámokma agko' aqsok éltaqmela, makke eltamhók ma'a Wesse' egegkok.

¹²Aptáhak axta Balaam apchátegmowágko s'e: —Éltennássek xeyk ko'o exchep ma'a apkelásenneykha,

¹³hélmések sa' eykhe ekyókxoho sawo élyátekto élmomnáwa, tén han ma'a sawo élmope élmomnáwa ekhágko nak apxagkok, mowanchek eyke ko'o malyahakxék appeywa m'a Wesse' egegkok, mowanchek nahan ko'o alának ahagkok ahagko' ma'a aqsok ektaqmela nak essenhan ma'a aqsok ekmaso nak, wánxa eyke aqsa ewanchek axének ma'a apkeltémo nak axének ma'a Wesse' egegkok.

¹⁴Ataqhohok sa' ko'o makham ma'a seyókxa, amonye' sektaqheykekxa eyke peyk altennaksek xép yaqwánxa etnéssesek énxet'ák apagkok ma'a énxet'ák Israel, keso egmonye' nak.

¹⁵Keñe axta Balaam aplegasa s'e amya'a nak: “Ko'o sekpeywa s'e sekwesey nak Balaam, Beor apketche nak, sekweteyo nak yáxña'akxoho aqsok,

¹⁶yetnáha agkok ahaqtek kayágwomhok sekwete yáxña'akxoho aqsok, sekya'áseykegkoho nak ma'a apya'áseykegkoho nak Meyke nak Ekhémo, añak chá'a amya'a, hélxekmóshok nahan chá'a aqsok eñama nak Dios ekha apyennaqte.

¹⁷Ekwet'ak ko'o yaqwánxa katnehek egmonye', ekwet'ak ko'o makhawók agko' aqsok: yaw'a m'a aptepa nak aphakxa Jacob xama wesse' apwányam ma'a aptepa nak Israel. Eyaqhakkasek sa' apqátek ma'a Moab, eltepelchássesek sa' apqatkok ma'a apyókxoho nak Set aptawán'ák neptámen.

¹⁸Emok sa' ma'a Edom, apagkok sa' etnehek ma'a yókxexma Seír, apagkok nak ma'a apkelenmexma. Kayágwomhok sa' aqsa apyennaqte m'a Israel.

¹⁹Sa' yenyeyk apteyapma xama apmallane m'a Jacob énxet'ák apagkok. Emasséssók sa' apyókxoho m'a apkeleymomap nak tegma apwányam.”

²⁰Keñe axta natámen Balaam apwet'a Amalec, yetlókok axta nahan aplegasso s'e amya'a nak: “Énxet'ák Amalec, apteme apmonye'e apkelyennaqte, kólmasséssók sa' eyke apyókxoho.”

²¹Apkelwet'ak axta nahan ma'a quenitas, yetlókok axta han aplegasso s'e amya'a nak: “Kéxegke Caín aptawán'ák neptámen: yetneyk eykhe kélyexánegweykekxexa ekyennaqte, kélnegkeneykegkek eykhe kélxanák ma'a neyseksa meteymog, kamasséssók sa' eyke táxa xa kélxanák nak, apkelma sa' ma'a énxet'ák Asiria.”

²³Keñe axta aplegasa han se'e amya'a nak: “¿Yaqsa sa' megkatsepek, apkelana sa' Dios xa aqsok nak?

²⁴Kalxegmak sa' yántakpayhe éleñama Chipre yetlo kempakhakma yapmeyk, yetsagkasek sa' ma'a Asiria, tén han ma'a Éber, hakte kólmasséssók sa' nahan ma'a Éber.”

²⁵Aptaqháwók axta makham apxagkok Balaam natámen apteme appeywa xa. Aptaqháwók axta nahan ma'a Balac.