Read Lengua Sur Números 25 Bible Online

Números 25 - Lengua Sur bible

Números 25

¹Xama axta apkelheykmo israelitas ma'a yókxexma Sitim, apkelmáha axta apkelpathetágko m'a kelán'ák moabitas,

²keltamhók axta nahan epasmok élnapma aqsok kélnaqtósso élmésso m'a aqsok éláyókxa nak. Aptókagkek axta han israelitas ma'a ektéyak nak, apkelpeykásawók axta han ma'a aqsok apcháyókxa nak moabitas.

³Cháxa ektáhakxa axta apkelpeykásawo m'a Baal-peor. Keñe axta Wesse' egegkok apkeltaqnaweygko m'a énxet'ák Israel.

⁴Aptáhak axta apcháneya Moisés se'e: —Yánchásekxa sa' apyókxoho apkelámha apmonye'e nak énxet'ák, elnáhap sa' nahaqtók ko'o ekhakxoho ekhem. Keñe sa' kamaskok séltaqnagko ko'o m'a énxet'ák Israel.

⁵Keñe axta Moisés aptáha apkeláneya m'a énxet'ák segyekpelchémo israelitas: —Kólaqha sa' chá'a kélxama kéxegke énxet'ák kélagkok appasmeykekxa nak apkelpeykessamo m'a Baal-peor.

⁶Apyentamákxeyk axta nahan xama israelitas kelán'a madianita, nápaqtók Moisés, tén han ma'a apyókxoho israelitas apchaqnákxo axta m'a, neyseksa apkellekxagweykha axta m'a átog nentaxnamakxa nak kélpakxanma apchaqneykekxexa nak chá'a énxet'ák.

⁷Apkexakkek axta aqsa nahan israelitas Finees apwet'a xa, cham'a Finees, Eleazar axta apketche, aptáwen axta m'a apkelmaxnéssesso Dios énxet'ák apagkok Aarón, apmeyk axta sawhéwa

⁸apkemhágkokxo m'a israelita, ekweykekxoho m'a kañe' kélpakxanma nak, apkelyetxaqkassek axta apwokmo m'a israelita, tén han ma'a kelán'a nak. Cháxa ekmassakxa axta negmasse ekmaso élnapma axta m'a israelitas,

⁹veinticuatro mil axta eyke élnapa.

¹⁰Tén axta Wesse' egegkok appaqhetchesa m'a Moisés. Aptáhak axta apcháneya s'e:

¹¹—Finees ko'o apmasseyásak séltaqnawéyak ma'a israelitas, hakte hawók ko'o ektémakxa nak sélmeyeykha apkelmeyeykha énxet'ák ma'a. Cháxa keñamak mamasséssekmo nak ko'o israelitas meytlákxoho m'a ektémakxa nak seklo sélmeyeykha.

¹²Eltennés sa' sélánésa ko'o xama ekhémo mók nélpaqhetchásamáxkoho meyke ektáhakxa nak egwáxok,

¹³sekmésa ko'o yaqwayam etnehek apkelmaxnéssesso Dios énxet'ák apagkok, tén han aptawán'ák neptámen meyke néxa, hakte élmeyeykha ko'o m'a, apwetássek nahan megkólyaqmagkáseykekxa melya'assáxma m'a israelitas.

¹⁴Zimrí axta apwesey m'a israelita apmatñawo axta xamók ma'a kelán'a madianita, Salú axta apketche, apteme axta apkemha apmonye' nepyeseksa m'a Simeón énxet'ák apagkok.

¹⁵Cozbí axta ekwesey m'a kelán'a madianita, Sur axta apketche, apkemha apmonye' axta nepyeseksa m'a énxet'ák Madián.

¹⁶Aptáhak axta Wesse' egegkok apcháneya Moisés se'e:

¹⁷—Kólchetamák sa' énxet'ák Madián, kólsawhoho sa' kólnápok,

¹⁸ekhawo apteméssesakxa axta kéxegke apketamokmo yetlo élmasagcha'a apkeltémakxa, apkeltamho kólpeykeshok ma'a Baal-peor, ekhawo ekteméssesakxa axta m'a kelán'a ekwesey axta Cozbí, apketche axta m'a apkemha apmonye' nak madianita, étsapa axta kélyetxaya sawhéwa, seyáphasa axta ko'o negmasse ekmaso eñama kélpeykessamo m'a Baal-peor.

¹⁹Massegkek axta m'a negmasse ekmaso,