Read Lengua Sur Números 26 Bible Online

Números 26 - Lengua Sur bible

Números 26

¹Aptáhak axta Wesse' egegkok apcháneya Moisés, tén han Eleazar, apketche nak ma'a apkelmaxnéssesso Dios énxet'ák apagkok Aarón:

²“Kólnaqtáxésák sa' weykcha'áhak apkelwesey énxet'ák ektáhakxa nak chá'a apnámakkok apagko', cham'a apyókxoho israelitas, ekwayam nak chá'a veinte apyeyam apagkok néten, apmopwancha'a nak yempakha'.”

³Keñe axta Moisés, tén han Eleazar apkelpaqhetchesa israelitas ma'a ekpayhegweykenxa nak xapop ma'a Moab, nekha nak wátsam Jordán, keto nak Jericó, apkeltamho

⁴kólnaqtáxésagkok apkelwesey weykcha'áhak apyókxoho m'a ekwayam nak chá'a veinte apyeyam apagkok néten, apkeltamhókxa axta etnehek Wesse' egegkok ma'a Moisés. Keso israelitas apkelánteyapma axta Egipto s'e:

⁵Keso apnámakkok apancha'awók axta Rubén aptawán'ák neptámen se'e, apketche átnaha apketkok axta Israel: Henoc, Falú,

⁶Hesrón, tén han Carmí;

⁷Cuarenta y tres mil setecientos énxet axta apwokmok apyókxoho kélnaqtáxéseyak apkelwesey weykcha'áhak ma'a Rubén aptawán'ák neptámen.

⁸Falú axta apketche m'a Eliab,

⁹keñe axta Eliab apketchek ma'a Nemuel, Datán, tén han Abiram. Datán tén han Abiram cháxa apkelámha apmonye'e apyepetcheykekxo axta Coré, apkenmexeykekxo m'a Wesse' egegkok tén han ma'a Moisés ekweykekxoho m'a Aarón,

¹⁰mayheykxeyk axta eyke xapop, keñe eyápekxo m'a apqánet nak yetlo Coré, apkeletsekkek axta apyókxoho m'a ektáha axta apkelyepetcheykekxa, doscientos cincuenta énxet axta apkeletsapa élwatna m'a táxa. Cháxa élestehegkesa axta m'a nápakha nak énxet'ák.

¹¹Axta eyke eletsapak ma'a Coré apketchek.

¹²Keso apnámakkok apancha'awók axta chá'a m'a Simeón aptawán'ák neptámen: Nemuel, Jamín, Jaquín,

¹³Zérah, tén han Saúl;

¹⁴veintidós mil doscientos énxet axta apwokmok apyókxoho kélnaqtáxéseyak apkelwesey weykcha'áhak ma'a Simeón aptawán'ák neptámen.

¹⁵Keso apnámakkok apancha'awók axta chá'a Gad aptawán'ák neptámen se'e: Sefón, Haguí, Suní,

¹⁶Ozní, Erí,

¹⁷Arod, tén han Arelí;

¹⁸cuarenta mil quinientos énxet axta apwokmok kélnaqtáxéseyak apkelwesey weykcha'áhak ma'a Gad aptawán'ák neptámen.

¹⁹Apkeletsepmeyk axta Judá apketchek ma'a Canaán, cham'a Er, tén han Onán,

²⁰keso apnámakkok apancha'awók axta Judá aptawán'ák neptámen se'e: Selá, Fares, tén han Zérah.

²¹Keso apnámakkok apancha'awók axta Fares aptawán'ák neptámen se'e: Hesrón, tén han Hamul;

²²setenta y seis mil quinientos énxet axta apwokmok kélnaqtáxéseyak apkelwesey weykcha'áhak ma'a Judá aptawán'ák neptámen.

²³Keso apnámakkok apancha'awók axta chá'a Isacar aptawán'ák neptámen se'e: Tolá, Puvá

²⁴Jasub, tén han Simrón;

²⁵sesenta y cuatro mil trescientos énxet axta apwokmok kélnaqtáxéseyak apkelwesey weykcha'áhak ma'a Isacar aptawán'ák neptámen nak.

²⁶Keso apnámakkok apancha'awók axta chá'a Zabulón aptawán'ák neptámen se'e: Séred, Elón, tén han Jahleel;

²⁷sesenta mil quinientos énxet axta apwokmok kélnaqtáxéseyak apkelwesey weykcha'áhak ma'a Zabulón aptawán'ák neptámen nak.

²⁸Keso apnámakkok apancha'awók axta chá'a José aptawán'ák neptámen se'e: Manasés tén han ma'a Efraín.

²⁹Manasés axta apnámakkok apancha'awók ma'a Maquir, keñe axta Maquir apnámakkok apancha'awók ma'a Galaad;

³⁰keñe axta Galaad apnámakkok apancha'awók ma'a lézer, Hélec,

³¹Asriel, Siquem,

³²Semidá, tén han Héfer.

³³Méko xama apwete apketchek apkelennay'a m'a Selofhad, Héfer axta apketche, kelwán'ák axta aqsa, keso élwesey axta s'e: Mahlá, Noá, Hoglá, Milcá, tén han Tirsá.

³⁴Cincuenta y dos mil setecientos énxet axta apwokmok kélnaqtáxéseyak apkelwesey weykcha'áhak ma'a Manasés aptawán'ák neptámen.

³⁵Keso apnámakkok apancha'ák axta chá'a Efraín aptawán'ák neptámen se'e: Sutélah, Béquer, tén han Tahán.

³⁶Keso Sutélah axta aptawán'ák neptámen se'e: Erán apteme axta apnámakkok apancha'awók ma'a eranitas.

³⁷Treinta y dos mil quinientos énxet axta apwokmok apyókxoho kélnaqtáxéseyak apkelwesey weykcha'áhak ma'a Efraín aptawán'ák neptámen. Cháxa ektáha axta chá'a José aptawán'ák neptámen xa, ektáhakxa axta chá'a apnámakkok apancha'awo'.

³⁸Keso apnámakkok apancha'awók axta chá'a Benjamín aptawán'ák neptámen se'e: Bela, Asbel, Ahiram,

³⁹Sufam, tén han Hufam.

⁴⁰Keso apnámakkok apancha'awók axta chá'a Bela aptawán'ák neptámen se'e: Ard, tén han Naamán, Bela axta apketchek xa,

⁴¹cuarenta y cinco mil seiscientos énxet axta apwokmok apyókxoho kélnaqtáxéseyak apkelwesey weykcha'áhak ma'a Benjamín aptawán'ák neptámen.

⁴²Dan axta aptawán'ák neptámen ma'a apnámakkok apancha'awo nak ma'a Suham.

⁴³Sesenta y cuatro mil cuatrocientos énxet axta apwokmok apyókxoho kélnaqtáxéseyak apkelwesey weykcha'áhak ma'a Suham aptawán'ák neptámen nak.

⁴⁴Keso apnámakkok apancha'awók axta chá'a Aser aptawán'ák neptámen se'e: Imná, Isví, tén han Bariá.

⁴⁵Keso apnámakkok apancha'awók axta chá'a Beriá aptawán'ák neptámen se'e: Héber, tén han Malquiel.

⁴⁶Apweteyak axta nahan xama apketche kelwána m'a Aser, apteméssessama axta ekwesey Sérah.

⁴⁷Cincuenta y tres mil cuatrocientos énxet axta nahan apwokmok apyókxoho kélnaqtáxéseyak apkelwesey weykcha'áhak ma'a Aser aptawán'ák neptámen.

⁴⁸Keso apnámakkok apancha'awók axta chá'a Neftalí aptawán'ák neptámen se'e: Jahseel, Guní,

⁴⁹Jezer, tén han Silem.

⁵⁰Cuarenta y cinco mil cuatrocientos énxet axta nahan apwokmok apyókxoho kélnaqtáxéseyak apkelwesey weykcha'áhak ma'a Neftalí aptawán'ák neptámen.

⁵¹Seiscientos un mil setecientos treinta axta apwokmok apyókxoho kélnaqtáxéseyak apkelwesey weykcha'áhak ma'a israelitas.

⁵²Appaqhetchessek axta Wesse' egegkok ma'a Moisés. Aptáhak axta apcháneya s'e:

⁵³“Kaxpánchesaxchek sa' xapop nepyeseksa s'e énxet'ák nak, apwánxa enxoho chá'a apxámokma kélnaqtáxéseyak apkelwesey.

⁵⁴Awanhek sa' chá'a katnehek apxawe xapop ma'a apxámakxa enxoho chá'a, keñe sa' ma'a aptáhakxa enxoho chá'a apqántawo', ketsék sa' chá'a exka'. Exkak sa' chá'a xapop ma'a ektáhakxa nak chá'a aphawóxama apagko', apwánxa enxoho chá'a kélnaqtáxéseyak apkelwesey weykcha'áhak.

⁵⁵Xama aqsok sa' eyke katwasaxchek kaxpánchesaxchek ma'a xapop. Exkak sa' chá'a xapop xama énxet ektáhakxa enxoho chá'a apagkok ma'a apyáp.

⁵⁶Katwasaxchek sa' xama aqsok kamlassaxchek xapop nepyeseksa m'a apxámakxa nak, tén han ma'a aptáhakxa nak apqántawók énxet.”

⁵⁷Keso apnámakkok apancha'awók axta Leví énxet'ák apagkok, kélnaqtáxéseyak axta apkelwesey weykcha'áhak se'e: Guersón, Quehat, tén han Merarí.

⁵⁸Levitas axta apnámakkok apancha'awók ma'a apnámakkok axta m'a Libnitas, hebronitas, mahlitas, musitas, tén han ma'a coreítas. Quehat axta apketche m'a Amram.

⁵⁹Apmomchek axta Amram xama apketche kelwána m'a Leví aptéma aptáwa', ekwesey axta Jocabed, ektéyeykmo axta aphamakxa axta makham Leví m'a Egipto. Amram tén han Jocabed axta étchek ma'a Aarón, Moisés, tén han María.

⁶⁰Keso Aarón axta apketchek se'e: Nadab, Abihú, Eleazar tén han Itamar.

⁶¹Apkeletsepmeyk axta eyke Nadab tén han Abihú, apcháléwássessama axta Wesse' egegkok táxa megkatnaha nak ekpagkanamaxche.

⁶²Veintitrés mil apkelennay'a axta apwokmok apyókxoho Leví aptawán'ák neptámen, ekwayam nak chá'a xama pelten apagkok néten. Axta nahan kólnaqtáxéseykegkok apkelwesey weykcha'áhak xamók ma'a nápakha israelitas nak, hakte axta elxaweykegkok xama enxoho m'a xapop apagkok.

⁶³Cháxa apwánxa axta apyókxoho kélnaqtáxéseyak apkelwesey weykcha'áhak israelitas, apkelane axta Moisés tén han ma'a apkelmaxnéssesso Dios énxet'ák apagkok Eleazar ma'a yókxexma ekpayhegweykenxa nak xapop ma'a Moab, nekha nak wátsam Jordán, keto nak Jericó.

⁶⁴Méko axta xama enxoho ektáxésamaxche apwesey weykcha'áhak nepyeseksa m'a apnaqtáxeseykegko axta apkelwesey weykcha'áhak Moisés tén han Aarón ma'a meykexa nak énxet Sinaí,

⁶⁵hakte apkeltennassegkek axta Wesse' egegkok eletsapwók ma'a yókxexma meykexa nak énxet Sinaí. Wánxa axta aqsa apkeymomákpo m'a Caleb, Jefuné axta apketche, tén han ma'a Josué, Nun axta apketche. Keñe m'a apyókxoho nak apkeletsapma.