Read Lengua Sur Números 31 Bible Online

Números 31 - Lengua Sur bible

Números 31

¹Appaqhetchessek axta Wesse' egegkok ma'a Moisés. Aptáhak axta apcháneya s'e:

²“Eyaqmagkáseykxa sa' xép apkeltémakxa énxet'ák Madián eñama apteméssessamakxa axta m'a israelitas, keñe sa' yetsapok.”

³Keñe axta Moisés aptáha apkeláneya énxet'ák se'e: —Kólána sa' elmagkokxak apkelmeykha kélnápakha kéxegke, yaqwayam sa' kólempakha', kólchetamák sa' ma'a Madián yaqwayam sa' kólyaqmagkásekxak mók apkeltémakxa, yaqwayam sa' ellegássesagkohok Wesse' egegkok eñama m'a apkeltémakxa axta.

⁴Mil énxet sa' chá'a eláphaksek kempakhakma aphawóxama xama énxet.

⁵Apkelyesáha axta chá'a mil énxet aphawóxama xama énxet, doce mil axta apwokmok apyókxoho, yetlo apkelmeykha yaqwayam yempakha'.

⁶Apkeláphássek axta Moisés kempakhakma yetlo apnaqleykha m'a Finees, apketche axta m'a apkelmaxnéssesso Dios énxet'ák apagkok Eleazar, apkelsawa axta m'a aqsok élpagkanamaxche, tén han ma'a kélaqkahasso nak, yaqwayam enxoho yaqkahaksek yának kampakhaxche'.

⁷Apkelnápékpek axta m'a madianitas, apsawhawók axta apkelnapa, ekhawo apkeltamhókxa axta etnehek Wesse' egegkok ma'a Moisés.

⁸Apkelnapchek axta m'a Eví, Réquem, Sur, Hur, tén han ma'a Reba, cinco kelwesse'e apagkok axta m'a Madianitas, apchaqhak axta nahan ma'a Balaam, Beor axta apketche.

⁹Apkelmeyk axta israelitas ma'a kelán'ák Madián yetlo étchek keyetse nak, apkelyementamágkek axta nahan apnaqtósso, weyke, tén han ma'a aqsok élmomnáwa nak;

¹⁰apkelwatnéssek axta nahan ma'a apyókxoho tegma apkelyawe apagkok, tén han ma'a apkelpakxenéyak nak.

¹¹Ekyókxoho aqsok kélyementaméyak axta m'a, cham'a énxet, aqsok kélnaqtósso,

¹²kélnaqlákxéssek axta m'a Moisés, tén han ma'a apkelmaxnéssesso Dios énxet'ák apagkok Eleazar, tén han ma'a énxet'ák Israel, apkelpakxeneykegko axta m'a ekpayhegweykenxa nak xapop Moab, nekha nak wátsam Jordán, ekpayho nak Jericó.

¹³Apkelántekkek axta apkelpakxeneykegkaxa, cham'a Moisés tén han apkelmaxnéssesso Dios énxet'ák apagkok Eleazar, tén han ma'a apyókxoho apkelámha apmonye'e nak chá'a nepyeseksa énxet'ák apagkok, apkelma takha'.

¹⁴Apkeltaqnaweygkek axta eyke Moisés ma'a apkelámha apmonye'e axta chá'a nepyeseksa mil sẽlpextétamo, tén han ma'a apkelámha apmonye'e axta chá'a cien sẽlpextétamo, apkelenyeykta axta m'a émpakháxchexa.

¹⁵Aptáhak axta apkeláneya s'e: —¿Yaqsa ektáha megkólnapa nak kelán'ák?

¹⁶Cháxa élenmexcháseykekxo axta Wesse' egegkok israelitas xa, élyetlama m'a aptémakxa axta apkelanagkama m'a Balaam, apkelpeykessamo axta m'a Baal-peor. Cháxa keñamak apcha'a nak Wesse' egegkok negmasse ekmaso m'a énxet'ák apagkok.

¹⁷Kólnáhap se'e kaxwo' nak, apyókxoho sakcha'a apkelennay'a, tén han ma'a ekyókxoho kelán'ák éltameyéyak nak apkelmeykha énxet.

¹⁸Eyke nágkólnáhap ma'a kelán'ák megkapatheteykegko nak makham énxet, kólmák sa'.

¹⁹Kélyókxoho ekyetno nak kélyógkexma, essenhan kélpaknegweykmoho nak kélhápak, kólhakha sa' chá'a m'a teyp apheykegkaxa nak énxet, ekweykmoho siete ekhem. Kólmópeyásekxak sa' chá'a kélyempe'ék kéxegke ekwokmo enxoho ántánxo tén han siete ekhem tén han ma'a kelán'ák élmomaxche nak.

²⁰Kólmópeyásekxa sa' nahan ma'a apyókxoho kélántaxno, tén han ma'a ekyókxoho aqsok émpe'ék nak, tén han ma'a yát'ay apwa', essenhan m'a yántéseksek nak.

²¹Aptáhak axta apkelmaxnéssesso Dios énxet'ák apagkok Eleazar apkeláneya m'a apyókxoho sẽlpextétamo apkelenyeykta axta émpakháxchexa: —Keso xama segánamakxa apmésso axta Wesse' egegkok Moisés se'e:

²²Aqsok sawo ekyátekto élmomnáwa nak, tén han ma'a sawo ekmope élmomnáwa, tén han sawo ekyexwase, tén han sawo' ekyentaxno, tén han kelyenmaga étkok tén han sawo' ekpexpope,

²³—ekyókxoho aqsok, megkalmeyesma nak kólwatnek, kólmópeyásekxak sa' kólnegkenek ma'a nátex, tén han kólyenyesagkok ma'a yegmen élmópeseykekxoho nak émpe'ék aqsok. Keñe sa' ma'a aqsok élmeyesmo nak kólwatnek, wánxa sa' aqsa kólmópeyásekxak émpe'ék ma'a yegmen.

²⁴Keñe sa' ekwokmo enxoho siete ekhem kólyenyesagkok kélnaqta, tén sa' kólmópekxoho'. Keñe sa' kélwanchek kólántaxnegwakxak ma'a apheykegkaxa nak énxet'ák.

²⁵Aptáhak axta Wesse' egegkok apcháneya Moisés se'e:

²⁶“Elyetsátekxa sa' énxet'ák, tén han aqsok kélnaqtósso kélyementaméyak axta m'a madianitas, apkelmaxnéssesso Dios énxet'ák apagkok Eleazar sa' epasmok, tén han ma'a apkelámha apmonye'e nak chá'a nepyeseksa aphawóxama,

²⁷exnésho sa' chá'a mók apyepto neyseksa, elmésák sa' xama nekha m'a apkelxega axta apkempakhe, keñe sa' nahan xama nekha m'a énxet'ák nak.

²⁸Hélmés sa' ko'óxa nekha: cham'a apkelxawéyak nak ma'a sẽlpextétamo, cham'a kelán'ák élmomaxche nak, tén han ma'a weyke yágkelwán'ák, yámelyeheykok tén han nepkések, xama sa' chá'a emok ma'a quinientos enxoho chá'a ekyókxoho,

²⁹elmések sa' ma'a apkelmaxnéssesso Dios énxet'ák apagkok Eleazar, sélxawe nak chá'a ko'o.

³⁰Keñe sa' ma'a nekha ektáha nak apagkok ma'a israelitas, cham'a kelán'ák élmomaxche nak, tén han ma'a weyke yágkelwán'ák, yámelyeheykok tén han ma'a nepkések, cham'a ekyókxoho kélnaqtósso nak, xama sa' chá'a emok ma'a ektáha enxoho cincuenta ekyókxoho, tén sa' elmések ma'a levitas, apkeltamheykha nak chá'a m'a kélpakxanma appagkanamap ahagkok.”

³¹Aptamhágkek axta nahan Moisés tén han Eleazar ma'a apkeltamhókxa axta etnehek Wesse' egegkok ma'a Moisés.

³²Seiscientos setenta y cinco mil nepkések axta apwokmok apyókxoho kélyementaméyak énxet'ák, meyke kélyetsáteykekxa m'a apkelméyak axta chá'a m'a sẽlpextétamo,

³³setenta y dos mil axta m'a weyke yágkelwán'ák,

³⁴sesenta y un mil axta m'a yámelyeheykok,

³⁵keñe axta treinta y dos mil ma'a kelán'ák megkalpatheteykegko axta makham énxet.

³⁶Trescientos treinta y siete mil quinientos nepkések axta apyókxoho, cham'a xama nekha apkelxawéyak axta m'a sẽlpextétamo,

³⁷apkelmésa axta nahan Wesse' egegkok seiscientos setenta y cinco;

³⁸keñe m'a treinta y seis mil weyke yágkelwán'ák nak, apkelmésa sesenta y dos ma'a Wesse' egegkok;

³⁹keñe m'a treinta mil quinientos yámelyeheykok nak, apkelmésa Wesse' egegkok sesenta y uno;

⁴⁰keñe m'a dieciséis mil kelán'a étkók nak, apkelmésa treinta y dos ma'a Wesse' egegkok.

⁴¹Apkelméssek axta Moisés apkelmaxnéssesso Dios énxet'ák apagkok Eleazar ma'a kélmésso axta Wesse' egegkok, ekhawo apkeltamhókxa axta etnehek ma'a Wesse' egegkok.

⁴²Keñe m'a mók nekha apkelxawéyak axta m'a israelitas, apyetnakhássesso axta Moisés nekha m'a apkelxawéyak axta m'a sẽlpextétamo,

⁴³Hawók axta m'a ekwánxa axta: trescientos treinta y siete mil nepkések,

⁴⁴treinta y seis mil ma'a weyke yágkelwán'ák,

⁴⁵treinta mil quinientos ma'a yámelyeheykok,

⁴⁶tén dieciséis mil ma'a kelán'a étkók,

⁴⁷apmeyk axta chá'a xama Moisés, cháxa xama nekha nak, cincuenta nak chá'a ekyókxoho, cham'a kelán'ák nak, tén han ma'a aqsok kélnaqtósso, apkelméssek axta levitas, apkeltemessáseykha axta chá'a Wesse' egegkok ma'a kélpakxanma appagkanamap apagkok, ekhawo apkeltamhókxa axta etnehek ma'a Wesse' egegkok.

⁴⁸Tén axta m'a apkelámha apmonye'e apnaqleykha axta chá'a mil tén han cien sẽlpextétamo, apkelmeyákxo aphakxa m'a Moisés,

⁴⁹aptáhak axta apcháneya s'e: “Nélyetsáteykxeyk negko'o sẽlpextétamo ektáha nak chá'a nenláneykha, negko'o nentáha nak xép apkeláneykha, apkelánékpók nahan.

⁵⁰Nélsántegkessek negko'o exchep se'e aqsok sawo ekyátekto élmomnáwa nak, apkelméyak axta chá'a negko'o enxama: Nennaqtete egaktegák, nennegkenma egmék, kélatchesso kélaphek, kélchenméhe, tén han ma'a mók aqsok nélnáxameykha nak, yaqwayam ólmések negko'o m'a Wesse' egegkok, ekyaqmageykekxa negmowána ólweynchamha makham.”

⁵¹Apkelmeyk axta Moisés tén han Eleazar xa ekyókxoho aqsok sawo ekyátekto élmomnáwa nak.

⁵²Ciento ochenta y cuatro kilos axta wokmok ekyókxoho sawo ekyátekto élmomnáwa apkelmésso axta m'a apkelámha apmonye'e nak chá'a mil tén han cien sẽlpextétamo,

⁵³xama sẽlpextétamo axta chá'a apkelsánták aqsok apkelyementaméyak ma'a apkelenmexma.

⁵⁴Cháxa ektáhakxa axta Moisés tén han Eleazar apkelma m'a sawo ekyátekto élmomnáwa apkelseykentegkesso axta m'a apkelámha apmonye'e nak, apkelsákxeyk axta m'a kélpakxanma apchaqneykekxexa nak chá'a énxet'ák, yaqwayam enxoho kaxénmakha chá'a apwáxok Wesse' egegkok ma'a israelitas.