Read Lengua Sur Números 32 Bible Online

Números 32 - Lengua Sur bible

Números 32

¹Xámók agko' axta aqsok apnaqtósso m'a Rubén tén han Gad énxet'ák apagkok nak. Xama axta apkelwet'a ektaqmalma nenxámaseykekxa aqsok nennaqtósso m'a xapop nak Jazer, tén han Galaad,

²apkelya'aweykxeyk axta m'a Moisés tén han ma'a apkelmaxnéssesso Dios énxet'ák apagkok Eleazar, tén han ma'a apkelámha apmonye'e nak chá'a nepyeseksa apnámakkok. Aptáhak axta apcháneya s'e:

³Tásek pa'at yaqwayam katawagkok aqsok kélnaqtósso m'a yókxexma nak Atarot, Dibón, Jazer, Nimrá, Hesbón, Elalé, Sebam, Nebo, tén han ma'a Beón, wesse' egegkok axta apma yaqwayam etnehek apagkok ma'a énxet'ák Israel, tén han ekyetna nak negko'óxa, nentáha nak xép apkeláneykha, cham'a nennaqtósso nak.

⁴

⁵Leyawók sa' agkok xép apwáxok, hegmés sa' negko'o m'a xapop nak, nágyána aqsa ólyeykhekxak ma'a wátsam Jordán.

⁶Aptáhak axta apchátegmowagkokxo Moisés se'e: —¿Kélmakóya kólhakha aqsa kéxegke s'e, keñe kélpeywomo xamo' elmahagkok ma'a kempakhakma?

⁷¿Yaqsa ektáha kélmako nak kólyelaqtések kéxegke m'a israelitas, yaqwayam melmahagkek ma'a apchókxa apmésso axta m'a Wesse' egegkok?

⁸Hawók agko' aptamheykegkaxa axta kélyapmeyk kéxegke xa ektáha nak, séláphassama axta ko'o apkeleñama m'a Cadés-barnea elanok xa yókxexma nak.

⁹Apkelweykmek axta m'a ényahamakxa nak yegmen Escol, keñe apkelányo m'a yókxexma, tén axta apkelyélaqtésa m'a israelitas, yaqwayam enxoho melántexek ma'a apchókxa, apmésso axta m'a Wesse' egegkok.

¹⁰Axta keñamak aplama Wesse' egegkok xa ekhem nak, tén axta aptáha naqsók appeywa apxéna katnehek

¹¹énxet apkelánteyapma axta m'a Egipto, ekwayam nak chá'a veinte apyeyam apagkok néten, melwetyehek ma'a xapop apkeltennassamakxa axta egkések ma'a Abraham, Isaac, tén han ma'a Jacob, hakte apkelwátéseykegkek apkelyetleykha.

¹²Wánxa aqsa Caleb, Jefuné apketche, apteme nak quenizita, tén han Josué, Nun apketche, melyenseykmo apkelyetlo m'a Wesse' egegkok.

¹³Apkeltaqnaweykegkek axta Wesse' egegkok ma'a israelitas, apkeltémók axta elweynchamha yókxexma meykexa nak énxet ekweykmoho cuarenta apyeyam, ekwokmoho apsawheykpo apkeletsapma apyókxoho m'a aplókassama axta chá'a eñama ekmaso apkeltémakxa.

¹⁴Keñe kaxwók kéxegke, apketchek nak ma'a kélyapmeyk nanók melya'assáxma, kélmakók kólyetlakxak ma'a apkeltémakxa axta kélyapmeyk nano', yaqwayam enxoho kóllókasek makham Wesse' egegkok eltaqnaweygkok ma'a énxet'ák Israel.

¹⁵Sa' agkok kólmakók kéxegke kólyetlók ma'a Wesse' egegkok, yának sa' exmakha makham israelitas ma'a yókxexma meykexa nak énxet, kéxegke sa' nahan kalpehemmok kélsexnánémaxche apmassegwokmo enxoho m'a.

¹⁶Tén axta apkelyepetchegwokmoho m'a Moisés. Aptáhak axta apcháneya s'e: —Negmakók eyke negko'o anlanagkok aphaxta s'e; yaqwayam ólyáqkasek nennaqtósso nepkések, tén han weyke, tén han tegma apkelyawe yaqwayam exmakha m'a egketchek.

¹⁷Ólmekxak sa' eyke negko'o nélmeykha ekpekhe agko', ólxog sa' apmonye'e m'a nápakha nak israelitas, ekwokmoho nélwagkasa m'a xapop apagkok nak. Kalhekxak sa' eyke egketchek ma'a tegma apkelyawe nak, yetlo meyke ektemegweykmohóxma ekheykha, melteméssessamók sa' exma ekmaso énxet'ák apheykha nak se'e yókxexma nak.

¹⁸Mólwateyk sa' enxanák memà enxoho makham apyókxoho israelitas ma'a xapop apagkok nak.

¹⁹Mólmaxneyha sa' nahan xapop egagkok ekyetna nak ma'a neyp wátsam Jordán, tén han ma'a teyp nak, hakte yetnók negko'o yaqwayam antéhek xapop egagkok se'e ekpehew'a nak halep ekteyapmakxa ekhem nak wátsam Jordán.

²⁰Aptáhak axta Moisés apchátegmowágkokxo s'e: —Kéllanak agkok xa kéltáhakxa nak kélpeywa, kélmákxo enxoho kélmeykha yaqwayam kólnapaxchek kólxog apmonye' m'a Wesse' egegkok,

²¹kélyeykhákxo enxoho kéxegke kélyókxoho yetlo kélmeykha kélanchesso kempakhakma m'a wátsam Jordán, yetlo apkeltémo m'a Wesse' egegkok, tén han kélhakmo enxoho m'a, ekwokmoho apkelántekkesa Wesse' egegkok apyókxoho m'a kélenmexma,

²²tén han apma m'a apchókxa, keñe sa' kélwanchek makham kólchexyók, hakte méko sa' katnehek kéláneyáxchexa kóllána' eñama Wesse' egegkok, tén han ma'a énxet'ák Israel. Kélagkok sa' kóltéhek kéxegke s'e xapop nak, nápaqtók Wesse' egegkok.

²³Sa' agkok kóltáhak xa ektáha nak, cháxa kéllánegko megkólya'assáxma nápaqtók Wesse' egegkok, xama ekhem sa' nahan kawak kéllegassáseykegkoho eñama xa megkólya'assáxma nak.

²⁴Kóllanák kaxwo' tegma apkelyawe kélagkok, yaqwayam kaxnakha m'a kélketchek, tén han aphaxta kélagkok yaqwayam kólxatmok ma'a nepkések kélnaqtósso, eyke kóllána sa' ma'a kéltáhakxa exchek kélpeywa.

²⁵Aptáhak axta apkelátegmowágkokxo Gad tén han Rubén aptawán'ák neptámen se'e: —Anlának sa' negko'o m'a apkeltamho nak anlána', nentáha nak xép apkeláneykha.

²⁶Kalhekxak sa' eyke ennaqteyegka'a tén han egketchek ketcheyetse nak se'e tegma apkelyawe nak Galaat, yetlo nennaqtósso, tén han ma'a ekyókxoho aqsok nennaqtósso nak,

²⁷keñe sa' negko'o nentáha nak xép apkeláneykha, ólmekxak sa' nélmeykha neganchesso nak kempakhakma, ólxog sa' ómpakha', eñama apkeltémo m'a Wesse' egegkok, ekhawo apkeltamhókxa nak xép antéhek.

²⁸Tén axta Moisés apmésa appeywa apkeltamhókxa chá'a etnehek ma'a apkelmaxnéssesso Dios énxet'ák apagkok Eleazar, tén han ma'a Josué, tén han ma'a apkelámha apmonye'e nak chá'a nepyeseksa apnámakkok pók aptémakxa nak chá'a m'a énxet'ák Israel. Aptáhak axta apkeláneya s'e:

²⁹—Apkelyeykhákxeyk sa' agkok xamók kéxegke wátsam Jordán apyókxoho m'a Gad énxet'ák apagkok, tén han Rubén yetlo apkelmeykha apkenchesso nak chá'a kempakhakma yaqwayam kólempakhak eñama apkeltémo m'a Wesse' egegkok, ekwokmoho kélma kéxegke m'a apchókxa, kólmések sa' yaqwayam etnehek xapop apagkok apagko' ma'a apchókxa Galaad.

³⁰Sa' agkok elyeykhákxak yetlo apkelmeykha apkenchesso kempakhakma, kólmések sa' xama xapop kélnepyeseksa kéxegke m'a apchókxa nak Canaán.

³¹Aptáhak axta apkelátegmowágkokxo Gad tén han Rubén aptawán'ák neptámen se'e: —Anlának sa' negko'o m'a apkeltémo nak anlának Wesse' egegkok, negko'o nentáha nak xép apkeláneykha.

³²Ólyeykhekxak sa' yetlo nélmeykha neganchesso kempakhakma m'a apchókxa Canaán, ólyahakxohok appeywa m'a Wesse' egegkok, sa' eyke keytek negko'o xapop yaqwayam antéhek egagkok se'e ekpayho nak ekteyapmakxa ekhem wátsam Jordán.

³³Cháxa ektáhakxa axta apkelmésa Moisés Gad énxet'ák apagkok tén han Rubén, tén han nápakha nak Manasés énxet'ák apagkok ma'a Sihón axta xapop apagkok, wesse' apwányam apagkok axta m'a amorreos, tén han ma'a Og, wesse' apwányam axta m'a Basán, yetlo m'a tegma apkelyawe ektáha axta apagkok, tén han ma'a yókxexma ekhéyak axta m'a nepyáwa.

³⁴Apnaqxétekhásegkokxeyk axta makham Gad énxet'ák apagkok ma'a tegma apkelyawe nak Dibón, Atarot, Aroer,

³⁵Atarot-sofán, Jazer, Jogbehá,

³⁶Bet-nimrá, tén han m'a Bet-arán, apkelhaxtegkásegkek axta nahan ekyennaqte nepyáwa', apkelánegkek axta nahan aphaxta yaqwayam exatmok ma'a apnaqtósso nepkések.

³⁷Keñe axta Rubén énxet'ák apagkok apnaqxétekhásegkokxo m'a tegma apkelyawe nak Hesbón, Elalé, Quiriataim,

³⁸Nebo, Baal-meón, tén han Sibmá, apyaqmagkassessek axta nahan chá'a apkelwesey pók xama m'a, aptegyáseykxeyk axta chá'a apwesey m'a ektáha axta chá'a apnaqxétekháseykegkokxa.

³⁹Tén axta m'a Maquir axta aptawán'ák neptámen, Manasés axta apketche, apkelántaxnegwokmo m'a yókxexma Galaad, apmeyk axta nahan ma'a, apkelántekkessek axta amorreos apheykha axta m'a.

⁴⁰Tén axta Moisés apmésa Maquir aptawán'ák neptámen ma'a yókxexma Galaad, apkelheykmek axta nahan ma'a.

⁴¹Apkelmomchek axta nahan mók xam'a apheykegkaxa axta amorreos ma'a Jaír, Manasés axta aptáwen neptámen, apteméssessek axta nahan apkelwesey Havot-jaír.

⁴²Apmomchek axta nahan Nóbah aphawóxama m'a Quenat, yetlo tegma apketkók apagkok aphéyak axta nepyáwa', apteméssessek axta nahan apwesey apagko', Nóbah.