Read Lengua Sur Números 35 Bible Online

Números 35 - Lengua Sur bible

Números 35

¹Appaqhetchessek axta Wesse' egegkok Moisés ma'a ekpayhegweykenxa nak xapop ma'a Moab, nekha nak wátsam Jordán, ekpayho nak Jericó. Aptáhak axta apcháneya s'e:

²“Yána sa' elmésagkok israelitas tegma apkelyawe levitas yaqwayam exnakha chá'a, cham'a xapop peya nak elxawagkok, tén han elmésagkok ma'a yókxexma ekhakxa nak pa'at nepyáwa nak tegma apkelyawe.

³Exnakha sa' levitas xa tegma apkelyawe nak, kalyagqak sa' apnaqtósso m'a yókxexma, tén han ma'a mók aqsok apnaqtósso nak.

⁴Cuatrocientos cincuenta metros sa' chá'a elmésagkok yókxexma ekhakxa nak pa'at ma'a nepyáwa nak tegma apwányam, teyp nak kélhaxtegkesso.

⁵Novecientos metros sa' chá'a katnehek ekwenaqte xapop xama nápakha m'a tegma, cham'a ekteyapmakxa ekhem nak, tén han ma'a ektaxnegwánxa ekhem nak, tén han ma'a nexcheyha nak, tén han ma'a nepyeyam nak. Neyseksa sa' étek ma'a tegma apwányam, keñe sa' yókxexma émhakxa pa'at ma'a nepyáwa'.

⁶“Tegma apkelyawe peya sa' kólmések ma'a levitas, seis tegma apkelyawe sa' etnehek negyexánegweykekxexa chá'a, yaqwánxa sa' chá'a emyekxak etegyaha ekmasma m'a énxet apchaqhe nak chá'a pók. Kólmeyásekxohok sa' nahan pók cuarenta y dos tegma apkelyawe;

⁷cuarenta y ocho tegma apkelyawe sa' kólmésagkok ma'a levitas yetlo yókxexma ekhakxa nak pa'at.

⁸Apkelmeyásegkek sa' agkok tegma apkelyawe apagkok israelitas ma'a levitas, cham'a xapop apagkok nak, xama xama aphawóxama sa' chá'a elmésagkok: elmésagkok sa' chá'a apxámokma tegma apkelyawe m'a ekyawakxa enxoho chá'a m'a xapop, keñe sa' apqántawók chá'a tegma apkelyawe m'a ketse' enxoho chá'a xapop.”

⁹Appaqhetchessek axta Wesse' egegkok ma'a Moisés. Aptáhak axta apcháneya s'e:

¹⁰“Etne sa' elának israelitas se'e: Kélyeykhákxeyk sa' agkok kéxegke m'a wátsam Jordán, peya enxoho kólántexek ma'a yókxexma Canaán.

¹¹Kéméxcheyk kólyésha pók xam'a tegma apkelyawe yaqwayam kóltéhek kélyexánegweykekxa chá'a, yaqwayam sa' chá'a emyekxak etegyaha apyexanmomakxa m'a énxet apchaqhe nak chá'a pók megkatnahakxoho apmáheyo apagko' yaqhek.

¹²Sa' ewagkasakpok teyp ma'a, megyaqhehek ma'a apnámakkok apmáheyo nak exnésseshok mók, megyetsepek sa' ekwokmoho kélyentamákxo m'a nápaqta'awók énxet'ák, yaqwayam kataxchek aqsok apkelane.

¹³Seis tegma apkelyawe sa' etnéssesek negyexánegweykekxexa m'a tegma apkelyawe kélmésso nak:

¹⁴Apqántánxo sa' ma'a ekpayho nak ekteyapmakxa ekhem wátsam Jordán, tén sa' apqántánxo nahan ma'a Canaán.

¹⁵Etnehek sa' negyexánegweykekxa xa seis tegma apkelyawe nak, apagkok ma'a israelitas, tén han ma'a énxet'ák apkeleñama nak mók apkelókxa apheykha kélnepyeseksa kéxegke, essenhan ma'a apkelwe nak yaqwatakxoho. Sa' elyexánegwakxak chá'a apyókxoho ektáha nak chá'a apchaqhe pók megkatnahakxoho apmáheyo apagko' yaqhek.

¹⁶“Aptekpogkek agkok pók sawo ekyentaxno énxet, keñe apketsapa enxoho m'a ektáha kéltekpoga, exénakpok sa' ektáha apmatñà, yáneykpok sa' nahan ematñekxak ma'a ektáha apchaqhe.

¹⁷“Aptekpogkek agkok pók meteymog segaqhamól'a m'a énxet, apketsekkek agkok ma'a kéltekpoga nak, kaxénaxchek sa' ektáha apmatñà, yáneykpok sa' nahan ematñekxak ma'a ektáha apchaqhe.

¹⁸“Aptekpogkek sa' agkok pók yámet énxet, cham'a ekmowána nak hegaqhek, apketsekkek agkok ma'a kéltekpoga nak, kaxénaxchek sa' ektáha apmatñà, yáneykpok sa' nahan ematñekxak ma'a ektáha apchaqhe.

¹⁹Sa' yáneykpok nahan yaqhek ektáha nak apchaqhe pók ma'a apnámakkok apagko' nak ma'a ektáha apmatñà, apwetákxo enxoho.

²⁰“Apyegkek agkok pók xama énxet eñama aptaqnagko, essenhan apyenha enxoho xama aqsok yetlo ekxeyenma apwáxok kasók ektáhakxa,

²¹essenhan aptekpageyncha'a enxoho eñama apkenmexma, apketsekkek agkok ma'a pók nak, yáneykpok sa' ematñekxak ma'a ektáha nak apteme, hakte yetneyk apyógkexma. Sa' yáneykpok nahan yaqhek ektáha nak apchaqhe pók ma'a apnámakkok apagko' nak ma'a ektáha apmatñà, apwetákxo enxoho.

²²“Apyégawók agkok nahan pók xama énxet megkatnaha enxoho apmáheyo apagko' eyhog, háwe eyke apkenmexma, essenhan apyenhawo enxoho xama aqsok meyke ekxeyenma apwáxok kasók ektáhakxa,

²³essenhan meyke apya'áseyak eyenhohok xama meteymog ekmowána nak hegaqhek, tégwokmek agkok ma'a meteymog, tén kaqhek megyenmexeykegkaxho pók, tén han neyseksa memáheyo etnéssessamhok exma ekmaso,

²⁴keñe sa' énxet'ák etnehek apyekpelchémo m'a apchaqhe nak pók, keñe han ma'a apnámakkok apagko' nak ma'a ektáha apmatñà apmáheyo nak exnésseshok mók, ektémakxa nak se'e segánamakxa nak.

²⁵Etaqmelchesek sa' eyke énxet'ák ma'a apchaqhe nak pók yeksek ma'a apnámakkok apagko' nak apmáheyo exnésseshok mók, yáphaksek sa' emyekxak makham ma'a tegma apwányam, apkeñamakxa axta aptegyeykencha'a apmeyámap. Énxet apchaqhe nak pók kéméxcheyk exek aqsa m'a ekwokmoho apketsapa m'a apkemha apmonye' apkelmaxnéssesso Dios énxet'ák apagkok, kélyegkenchesso nak apqátek pexmok égmenek ekpagkanamaxche'.

²⁶Aptekkek sa' agkok ma'a tegma apwányam negyexanmomakxa nak,

²⁷apwetágwokmek sa' agkok yókxexma m'a apnámakkok apagko' nak ma'a apketsapma, apchaqhak sa' agkok, mesexnáneykpek sa'.

²⁸Kéméxcheyk exek aqsa tegma apwányam negyexanmomakxa m'a ektáha nak apchaqhe pók, ekwokmoho apketsapa m'a apkemha apmonye' apkelmaxnéssesso Dios énxet'ák apagkok. Keñe sa' apwanchek etaqhohok makham ma'a apkeñémeykxa.

²⁹“Cháxa aqsok nak, katnehek sa' xama segánamakxa kélagkok kéxegke xa, yaqwayam sa' kóllának chá'a m'a kélhámxa enxoho chá'a, ekweykekxoho m'a kélketchek nak.

³⁰“Wánxa sa' aqsa yáneykpok ematñekxak xama ekyetno nak apyógkexma m'a apyetna enxoho apqánet apkelxeyenma essenhan pók apkelxeyenma nak. Xama sa' agkok ma'a apxeyenma, megyáneykpek sa' ematñekxa'.

³¹“Megkamaxcheyk sa' nahan selyaqye yaqwayam kólyánmagkasek yaqwayam mematñehek ma'a xama énxet ekyetno nak apyógkexma, apxénamáp nak ematñekxa'; yetsapok sa' xa énxet nak.

³²“Megkamaxcheyk sa' nahan selyaqye yaqwayam kólhok etaqhohok makham apkenyémekxa m'a énxet ekyetno nak apyógkexma, apmahéyak nak apyexánegwayam xama m'a tegma apkelyawe apkelxénamakpexa nak chá'a, megyetsapakxa enxoho makham ma'a apkemha apmonye' apkelmaxnéssesso Dios énxet'ák apagkok.

³³“Nágkóletsagkas apchókxa kélheykegkaxa nak, hakte katsagkashok apchókxa m'a ekyetno nak negyógkexma, wánxa aqsa nahan awanchek kataqmelekxak apchókxa m'a apmatñà enxoho m'a ektáha nak ekyetno apyógkexma.

³⁴“Nágkóletsagkas xapop yaqwánxa sa' kólhók, cham'a yaqwánxa sa' nahan ko'óxa axek, hakte ekhegkek ko'o chá'a nepyeseksa m'a israelitas, sektáha nak Wesse' egegkok.”