Read Lengua Sur Números 36 Bible Online

Números 36 - Lengua Sur bible

Números 36

¹Apkelya'aweykxeyk axta Moisés ma'a apkelámha apmonye'e axta chá'a nepyeseksa apnámakkok ma'a Galaad aphawóxama, Maquir axta aptawán'ák neptámen, Manasés, tén han ma'a José. Apkelya'aweykxeyk axta han ma'a apkelámha apmonye'e nak chá'a nepyeseksa aphawóxama m'a israelitas. Aptáhak axta apcháneya s'e:

²—Moisés, apkeltémók axta exchep Wesse' egegkok etwaksek xama aqsok emlaskok xapop nepyeseksa m'a israelitas, cham'a ekpehewayan nak chá'a yaqwayam exka', apkeltémók axta nahan elmésagkok Selofhad axta apketchek kelwán'ák ma'a xapop apagkok axta, cham'a Selofhad ektáha axta negko'o egnámakkok.

³Kelmágkek sa' agkok pók énxet'ák nak Israel ma'a, kamaskok sa' katnehek xapop apagkok énxet'ák egagkok ma'a xapop élxawéyak nak ma'a, katnehek sa' xapop apagkok ma'a ektamhéyak nak anaqteyegka'a. Keñe sa' ketsék hentemessásekxak xapop egagkok nélxawéyak nak negko'o.

⁴Wokmek sa' agkok apyeyam negmallánamakxa nak ekmaso negha m'a Israel, pók énxet'ák sa' etnehek apagkok ma'a xapop agkok nak ma'a kelán'ák, kamaskok sa' katnehek egagkok negko'o.

⁵Keñe axta Moisés apkeltamho etnahagkok israelitas se'e, ekhawo apkeltamhókxa axta etnehek ma'a Wesse' egegkok: —Naqsók xa aptáhakxa nak apkelpeywa José énxet'ák apagkok.

⁶Melmeyewhek Wesse' egegkok Selofhad apketchek kalmagkok ma'a ekmakókxa enxoho kalmagkok yaqwayam katnehek anaqteyegka'a, ektáha enxoho ekhawóxama agko', ektáha enxoho chá'a apnámakkok ma'a yáp.

⁷Megkólwanchek kólmeyásekxak chá'a pók énxet ma'a xapop ekpehewayam nak chá'a apxawe xama énxet ma'a Israel; apyókxoho israelitas payhawók etaqmelchessesek chá'a xapop apagkok yaqwayam egkeyásekxak ma'a ektáhakxa nak chá'a énxet'ák apagkok apagko'.

⁸Yetneyk agkok chá'a élxaweykekxa xapop ekyókxoho kelán'ák, kéméxcheyk kamok chá'a m'a énxet ektáhakxa nak chá'a énxet'ák apagkok ma'a yáp. Keñe sa' keytek chá'a xapop aptaqmelchesso m'a apyókxoho israelitas apkelmeyáseykekxa m'a apyapmeyk.

⁹Megkólwanchek kólmeyásekxak pók énxet ma'a xapop nak. Apyókxoho énxet'ák Israel payhawok chá'a eltaqmelchesek ma'a xapop élpehewayam nak chá'a apkelxawéyak.

¹⁰Tén axta m'a Mahlá, Tirsá, Hoglá, Milcá, tén han Noá, apketchek axta m'a Selofhad, ektamhágko m'a apkeltamhókxa axta etnehek Wesse' egegkok ma'a Moisés, kelmágkek axta m'a kelyapka agko' nak apketchek,

¹²Manasés axta aptawán'ák neptámen, José axta apketche. Keñe axta ekhágkokxo xapop agkok ma'a nepyeseksa nak yáp énxet'ák apagkok.

¹³Cháxa segánamakxa apmésso axta Wesse' egegkok apkeltémókxa chá'a etnahagkok israelitas apkeltennasso axta Moisés ma'a ekpayhegweykenxa nak xapop ma'a Moab, nekha nak wátsam Jordán, keto' nak Jericó.