Read Lengua Sur Números 8 Bible Online

Números 8 - Lengua Sur bible

Números 8

¹Appaqhetchessek axta Wesse' egegkok Moisés. Aptáhak axta apcháneya s'e:

²“Eltennés sa' Aarón, apkelánékxo enxoho ekhéyak ma'a cháléwasso, yána sa' elpeykeshok élápogwate m'a amonye' nak cháléwasso ekyawe.”

³Aptemék axta nahan Aarón ma'a apkeltamhókxa axta etnehek Wesse' egegkok ma'a Moisés, apkelánékxeyk axta ekhéyak ma'a cháléwasso, yaqwayam enxoho kalpéwhok élápogwate m'a amonye' nak cháléwasso ekyawe.

⁴Sawo ekyátekto ekmomnáwa axta nahan élánamáxche m'a cháléwasso ekyawe nak, kéltekpagéyak nak ma'a sawo ekyentaxno, eyeynamo m'a awhak nak ekweykekxoho m'a naw'ék pánaqte exnók kéleykmassáseykha nak. Apkelanak axta Moisés cháléwasso ekyawe, ekhémo m'a ektémakxa axta apxekmósa m'a Wesse' egegkok.

⁵Appaqhetchessek axta Wesse' egegkok Moisés. Aptáhak axta apcháneya s'e:

⁶“Elyetnakhés sa' levitas nepyeseksa m'a israelitas, keñe sa' elmopessásekxak apyempe'ék.

⁷Sa' katnehek apkelmópessáseykekxa apyempe'ék se'e: Xeyep sa' elexpaqheykha m'a yegmen sẽlmópessáseykekxa nak egyempehek, keñe sa' natámen elyaqtennagkok ekyókxoho áwa' apyempe'ék ma'a, elyenyesagkok sa' nahan apkelnaqta, keñe sa' kalmópekxohok apyempehek.

⁸Keñe sa' éntementák xama weyke étkok kennawo', elsanták sa' nahan apqántawók ma'a hótáhap aptaqmalma apagko' nak, kélyélaqtésso nak kélenchehe pexmok égmenek, ektáha nak ekyepetche xa, yaqwayam etnéssesek apmésso naqsa aqsok aktek kélcheneykekxa, keñe sa' nahan mók weyke étkok kennawo', yaqwayam kamátog ekyaqmageykekxa magya'assáxma.

⁹Keñe sa' xép yának elmeyenták levitas ma'a kélpakxanma apchaqneykekxexa nak chá'a énxet'ák, yának sa' nahan yaqnekxak ma'a apyókxoho israelitas.

¹⁰Yának sa' yaqnágwok emonye' ko'o m'a levitas, keñe sa' elya'ammok ma'a israelitas enegkenagkok apmék ma'a néten apqatkok.

¹¹Keñe sa' Aarón hélmések ko'o m'a levitas, etnéssesek ma'a ektémól'a kélmésso naqsa aqsok kélya'áseykhal'a néten nahaqtók ko'o, eñama m'a israelitas. Cháxa peya sa' etnahagkok apkeltamheykha sélánésso chá'a ko'o aqsok ma'a levitas.

¹²Keñe sa' natámen levitas enegkenagkok apmék néten apqatkok ma'a weyke étkók kelennay'a, xama weyke étkok kennawók sa' nahan egkések yaqwayam kamátog ekyaqmageykekxa magya'assáxma, keñe sa' ma'a mók nak, egkések yaqwayam kawatnaxche', yaqwayam kalmópessásekxak apyempe'ék ma'a levitas.

¹³Keñe sa' xép elya'ásekxak levitas ma'a aphakxa nak Aarón tén han ma'a apketchek, keñe sa' hélmések ko'o m'a etnéssesek ma'a ektémól'a aqsok kélmésso naqsa kélya'áseykhal'a néten nahaqtók ko'o;

¹⁴sa' etnehek elyetnakhaksek levitas nepyeseksa m'a israelitas, yaqwayam sa' ko'o atnehek ahagkok.

¹⁵Keñe sa' elmahagkok elanagkok apkeltamheykha m'a kélpakxanma apchaqneykekxexa nak chá'a énxet'ák. Kéméxcheyk kólmópessásekxak apyempe'ék tén han hélmések ko'o ektémól'a kélmésso naqsa aqsok ektaqmalma,

¹⁶Hakte ko'o sélmésso xa, nepyeseksa m'a apyókxoho israelitas. Élmomchek axta ko'o takha' xa, apkelyaqmageykekxa m'a apyókxoho átnaha apketkók apketchek nak ma'a israelitas,

¹⁷hakte ko'o ahagkok ma'a apyókxoho apmonye' apkelwete nak chá'a apketchek ma'a israelitas, ekhawo han ma'a émha amonye' ekpalleyam nak chá'a étkók ma'a aqsok apnaqtósso. Élpagkanmeyk axta ko'o apketchek átnaha apketkók nak israelitas, cham'a sélnapma axta átnaha apketkók apketchek ma'a egipcios.

¹⁸Élmomchek axta eyke ko'o takha' levitas apkelyaqmageykekxa m'a.

¹⁹Élyéseykha axta ko'o levitas nepyeseksa m'a israelitas, keñe sélméssama m'a Aarón tén han ma'a apketchek, yaqwayam elanaksek chá'a aqsok israelitas ma'a kélpakxanma apchaqneykekxexa nak chá'a énxet'ák, tén han etaksek chá'a meyaqmagkáseykekxa melya'assáxma Wesse' egegkok ma'a israelitas. Keñe sa' melyepetchegwomók chá'a israelitas ma'a tegma appagkanamap nak, megkaltemégwomók sa' nahan exma ekmaso.”

²⁰Apkelánegkek axta Moisés tén han Aarón, tén han apyókxoho énxet'ák Israel ma'a aptáhakxa axta Wesse' egegkok apcháneya Moisés apkeltamhókxa etnéssesek ma'a levitas.

²¹Apkelmópesákxeyk axta apyempe'ék ma'a levitas, apkelyenyeyásegkek axta nahan apkelnaqta, tén axta Aarón apnaqlawa nápaqtók Wesse' egegkok apteméssesa ektémól'a negmésso naqsa aqsok ektaqmela, apkelmópessáseykxeyk axta apyempe'ék.

²²Tén axta natámen ekyókxoho xa, apkelmeyákxeyk axta levitas peya elanagkok apkeltamheykha m'a kélpakxanma apchaqneykekxexa nak chá'a énxet'ák, Aarón axta eyke apkeltennáseyak chá'a aqsok yaqwayam elanagkok tén han ma'a apketchek nak. Kélteméssessek axta levitas ma'a ekhawo apkeltamhókxa axta etnehek Wesse' egegkok ma'a Moisés.

²³Appaqhetchessek axta Wesse' egegkok ma'a Moisés. Aptáhak axta apcháneya s'e:

²⁴“Veinticinco apyeyam apagkok chá'a apwanchek yeynhok emok aptamheykha levitas ma'a kélpakxanma apchaqneykekxexa nak chá'a énxet'ák,

²⁵keñe eyenyekxak chá'a aptamheykha m'a apwokmo enxoho cincuenta apyeyam apagkok.

²⁶Apwanchek sa' nahan epasmekxak apkeláneyak apkeltamheykha apkelxegexma'a kélpakxanma apchaqneykekxexa nak chá'a énxet'ák apwokmo enxoho xa ekwánxa nak apyeyam apagkok, mopwanchek sa' etneykha apxakko'. Cháxa yaqwánxa sa' etnéssesek chá'a apkeltamheykha m'a levitas.”