Read Lengua Sur Números 9 Bible Online

Números 9 - Lengua Sur bible

Números 9

¹Appaqhetchessek axta Wesse' egegkok Moisés yókxexma meykexa nak énxet Sinaí, ektáha axta xama apyeyam apkelánteyapma israelitas ma'a Egipto, eyeynókxa axta apxegeykekxa makham apkemha apmonye' pelten pók apyeyam. Aptáhak axta apcháneya s'e:

²“Elanagkok sa' chá'a apkelsawássessamo ekhem Pascua israelitas ma'a ekhem ekpekkenamaxchexa axta,

³cham'a ekhem catorce, keso pelten nak, ektaxnakmo enxoho, elyetlókasek ma'a ektémakxa nak eknaqtáxésamaxche ekyókxoho segánamakxa, sekmésso axta ektémakxa chá'a élánamáxche'.”

⁴Tén axta Moisés apkeltamho elanagkok ekhem melwagqayam Pascua m'a israelitas,

⁵apkelánegkek axta nahan ma'a ekhem catorce, cháxa pelten nak, taxnám, cham'a yókxexma meykexa nak énxet Sinaí. Apkelánegkek axta ekyókxoho m'a apkeltamhókxa axta etnehek Wesse' egegkok ma'a Moisés.

⁶Yetneyk axta eyke nahan chá'a énxet élmanyása apyempe'ék, eñama appaknegweykmoho kélhápak. Axta keñamak megkapwagko elanagkok melwagqayam ekhem Pascua xa ekhem nak. Apkelya'aweykxeyk axta Moisés tén han Aarón xa énxet'ák nak,

⁷aptáhak axta apcháneya Moisés se'e: —Nélpaknegwokmók xeyk negko'o kélhápak, cháxa keñamak sentamhágko nak élmanyása egyempe'ék. Mehéghók negko'o Wesse' egegkok ólmések aqsok nélmésso naqsa egagkok xa ekhem ekxénamaxchexa nak, xamók ma'a israelitas.

⁸Aptáhak axta apchátegmowágkokxo Moisés se'e: —Kólleyx sa' sekxo', háxko sa' kexa etnehek heyának ko'o Wesse' egegkok exének kéxegke.

⁹Appaqhetchessek axta Wesse' egegkok ma'a Moisés. Aptáhak axta apcháneya s'e: “Etne sa' elának israelitas se'e:

¹⁰Kélyókxoho kéxegke tén han kéltawán'ák kélnentámen kélwanchek kóllanagkok ekhem Pascua eñama mehélwagqayam ko'o. Keñe sa' ma'a élmanyása nak apyempe'ék eñama appaknegweykmoho kélhápak essenhan ma'a apheykha nak makhawo', essenhan ma'a apkelxega nak chá'a,

¹¹elanagkok sa' chá'a m'a ekhem catorce, aptáhakxa nak apqánet pelten, taxnámla'a. Etawagkok sa' chá'a nepkések apketkok aphápetek, yetlo m'a yámet áwa' ekmáske, tén han kelpasmaga meyke nak kempáseyak,

¹²megyémek sa' nahan chá'a xama enxoho yaqwayam yenchesek ma'a mók ekhem, megyentássesek sa' nahan chá'a xama enxoho m'a apexchapok. Apkelánegkek sa' agkok chá'a m'a melwagqayam ekhem Pascua, étlókasek sa' chá'a ekyókxoho m'a ektémakxa nak chá'a élánamáxche'.

¹³Kóltekkesek sa' eyke chá'a nepyeseksa énxet'ák apagkok ma'a apkelwátesseyam nak chá'a apkelane melwagqayam ekhem Pascua neyseksa eykhe ekteme ekmópeyo apyempehek, tén han mexña mók nekha. Exkak sa' kéllegassáseykegkoho aptémakxa mey'assáxma eñama meseykekxésso aqsok apmésso naqsa Wesse' egegkok ma'a ekhem ekpekkenamaxchexa nak.

¹⁴“Peyk sa' agkok chá'a elanagkok ekhem melwagqayam Pascua eñama Wesse' egegkok ma'a énxet'ák apkeleñama nak mók apkelókxa apheykha nak kélnepyeseksa kéxegke, elanagkok sa' chá'a ekhawo ektémakxa nak ekpeywa ekyókxoho m'a segánamakxa sekmésso axta, kaxhok sa' nahan mók segánamakxa apagkok ma'a apyókxoho énxet'ák, cham'a énxet'ák apkeleñama nak mók apkelókxa, tén han appalleykenxa apagko' nak se'e apchókxa nak.”

¹⁵Cháhapwa'ak axta yaphope sekxók kélxátekhasa axta m'a tegma appagkanamap, cham'a kélpakxanma ekhémo mók nélpaqhetchásamáxkoho nak Dios. Keñe axta taxnám ekyetna'a ekho táxa eyáléwe m'a néten nak tegma appagkanamap, wokmók axta nahan élseye ekyetno m'a.

¹⁶Axta entemék chá'a yókxoho ekhem xa: Ekhem axta chá'a kápok yaphope m'a kélpakxanma nak, keñe axta chá'a axta'a kataxchek ekho táxa eyáléwe.

¹⁷Meyákxeyk axta agkok chá'a néten ma'a yaphope ekyetno nak néten kélpakxanma, elxegekxak axta chá'a m'a israelitas, axta elpakxenwók nahan chá'a m'a yókxexma ekyetnámxa enxoho chá'a m'a yaphope.

¹⁸Elxegekxak axta chá'a israelitas apkeltamho enxoho chá'a elxegekxak ma'a Wesse' egegkok, elpakxenwók axta nahan chá'a m'a apkeltamhókxa enxoho chá'a elpakxenwók, axta elhók nahan chá'a ekwenaqte m'a ekwánxa enxoho chá'a ekyetno néten tegma appagkanamap ma'a yaphope nak.

¹⁹Wegqawók axta agkok chá'a ekyetno néten tegma appagkanamap ma'a yaphope nak, melxegekxeyk axta chá'a m'a israelitas, elyahakxohok ma'a apkeltémókxa axta chá'a etnahagkok ma'a Wesse' egegkok.

²⁰Axta agkok chá'a kawegqawok ekhem ekyetno yaphope m'a néten nak tegma appagkanamap, elxegekxak axta chá'a m'a apkeltamho enxoho chá'a elxegekxak ma'a Wesse' egegkok, elpakxenagkok axta nahan chá'a m'a apkeltamho enxoho chá'a elpakxenagkok.

²¹Mók xam'a axta'a axta nahan chá'a keythok yaphope m'a néten nak, keñe élsaka enxoho kamyekxak chá'a néten; tén axta elxegekxak chá'a. Elxegekxak axta chá'a ekmeyákxoho enxoho néten ma'a yaphope, megkeyxek axta ekhem tén han axta'a.

²²Yetneyk axta agkok chá'a yaphope ánet ekhem ma'a néten nak tegma appagkanamap, essenhan xama pelten, essenhan xama apyeyam, elpakxenagkok axta chá'a m'a israelitas, melxegekxeyk axta chá'a. Meyákxeyk axta agkok chá'a néten ma'a yaphope nak, keytlawhok axta chá'a apkelchampeykekxa néten, elxegekxak axta chá'a makham.

²³Elpakxenagkok axta nahan chá'a m'a apkeltamho enxoho chá'a elpakxenagkok, elxegekxak axta nahan chá'a m'a apkeltamho enxoho chá'a elxegekxak ma'a Wesse' egegkok. Apkelyeheykekxók axta m'a Wesse' egegkok segánamakxa apagkok, ekhawo m'a ektémakxa axta apmésso appeywa, apchásenneykekxoho axta m'a Moisés.