Read Lengua Sur Miqueas 1 Bible Online

Miqueas 1 - Lengua Sur bible

Miqueas 1

¹Keso amya'a apkeltennasso axta Wesse' egegkok ma'a Miqueas, apkeñama axta Moréset, tén han aqsok apxekmóssamo apkeltennassama axta apxeyenma m'a Samaria, tén han Jerusalén, cham'a aptamheykegkaxa axta apkelwesse'e apkelwányam Judá m'a Jotam, Ahaz, tén han Ezequías.

²Kóleyxho sa' se'e, énxet'ák kélyókxoho nak; kóltaqmelchesho sa' kélháxenmo s'e kélyókxoho kélheykha nak ekyókxoho apchókxa: Elxénchásekxohok sa' kéltémakxa kéxegke Wesse' egegkok ma'a aphakxa nak tegma appagkanamap aptaqmalma apagkok.

³Etyapok sa' Wesse' egegkok ma'a aphamakxa nak, exegmak sa' elteyammegmak ma'a naw'ék egkexe nak.

⁴Kalpayhekxak sa' chá'a egkexe apkelteyagwánxa enxoho ektémól'a pápa' kólpekkenek ma'a nátex, kalmayhekxak sa' chá'a neyseksa m'a élyapwátegweykenxa nak xapop, ektémól'a yegmen ényé ekyennaqte élpexyaweykental'a.

⁵Katnehek sa' ekyókxoho xa eñama apkenmexeykekxa Dios ma'a Jacob énxet'ák apagkok, eñama melya'assáxma m'a énxet'ák apheykha nak Israel. ¿Yaqsa énmexcháseykekxa Dios ma'a Jacob énxet'ák apagkok? ¡Énxet'ák Samaria! ¿Háxko apkelpeykessamókxa kéleykmássesso m'a énxet'ák Judá? ¡Jerusalén!

⁶Cháxa keñamak aptáha nak Wesse' egegkok se'e: “Nápakha'a apketkók sa' ko'o atnessásekxak ma'a tegma apwányam Samaria, yókxexma eyáxñe sa' katnekxa' kélcheneykekxexa nak anmen yámet. Waxpánchesha sa' meteymog nekha'a nak tegma apwányam ma'a ekyapwátegweykenxa nak xapop, yáxña'akxoho sa' apekkenchásekxak ma'a apowhók nak.

⁷Nekha'a étkók sa' katnekxak ma'a ekyókxoho kéleykmássesso apagkok nak, kólwatnekxak sa' ma'a ekyókxoho yámet awhók apkeláyókxa nak. Kelán'a ekyaqmagkáseyak pók énxet ektegye selyaqye agkok axta keñamak élánamáxko xa, kelán'a ekyaqmagkáseyak pók énxet ektegye selyaqye agkok sa' eyke makham atnéssásekxa'.”

⁸Cháxa keñamak peya nak ko'o awónek yetlo ekyawe agko' sélapwayam; cháxa keñamak peya nak aweynchamha meyke sélatchesso emagkok tén han meyke sektaxno, awónchesha sa' ektémól'a semheg nawhak, kaxñaha sa' egkenyek aptémól'a xápen epáwha.

⁹Hakte megkataqmelwomek ma'a ekyense nak Samaria: wákxók han ma'a Judá tén han ma'a Jerusalén, tegma apwányam apheykegkaxa nak énxet'ák ahagkok.

¹⁰Nágkóltennés aqsa énxet'ák apheykha nak Gat xa; nágkóllekxagwaha aqsa. Kólpexyawha sa' aqsa kóllegagkohok ekmáske m'a yagkamex nak Bet-le-afrá.

¹¹¡Énxet'ák kélheykha nak Safir, kólmohok sa' ma'a megkatnahakxa nak kélókxa, meyke apáwa, yetlo ekyawe agko' kélmegqakto! ¡Melántépek sa' ma'a énxet'ák apheykha nak Zaanán! ¡Tekkek kéllekxagweykha m'a Bet-ésel, keñe sa' kéxegke katnehek meyke ekpasmo!

¹²Apkelpexyawáha apkellegeykegkoho ekmáske m'a énxet'ák apheykha nak Marot, kelpekhéssek kataqmelwók apheykha, hakte Wesse' egegkok apkeltémo kawak aqsok ekmaso ekweykmoho m'a átog nak ma'a Jerusalén.

¹³Kéxegke, kélheykha nak Laquis, kélenmexeykekxa axta Wesse' egegkok, ektéma nak ma'a énxet'ák Israel, kélsexnenagkama axta apkeláneykegko melya'assáxma m'a apheykha nak Sión, kólnaqtehetchásekxa yátnáxeg ma'a apkelyenyawasso nak.

¹⁴Kólyenyawho kélagko' sa' ma'a Moréset-gat. Melwetágwomek sa' chá'a kélpasmo kelwesse'e apkelwányam nak Israel ma'a tegma apwányam Aczib.

¹⁵Aptáhak Wesse' egegkok se'e: “Énxet'ák kélheykha nak Maresá, wáphássásekxak sa' ko'o makham kéxegke yaqwayam elmok, elántaxnegwók sa' meteymog áxwa Adalum ma'a ektáha axta apkelámha apmonye'e apkelyennaqte nepyeseksa m'a énxet'ák Israel.

¹⁶Kéxegke, kélheykha nak tegma apwányam Sión, kólmopaksoho kéltegye kélyese, magkenatchesso éllapwáméyak, eñama m'a kélketchek kélásekhayo nak. Kólmopaksoho kélyese, ekwokmoho ektáha meyke agko' kélwa', ektémól'a máma apwenaqte, hakte kólnaqlakxak sa' megkatnahakxa apkelókxa m'a kélketchek nak kéxegke.”