Read Lengua Sur Nahúm 3 Bible Online

Nahúm 3 - Lengua Sur bible

Nahúm 3

¹¡Xép la'aye tegma apwányam, ekyetnamakxa nak nentekyawa, tén han negmowána amya'a, tén han negyennaqteyásamaxkoho; megkamassegweykenxa nak negmenyexma!

²¡Kóleyxho énmageykha kelyekpexchetma ekwenaqte, tén han éxtegyawasso xapop ma'a yátnáxeg apkelyenyawasso! ¡Kóleyxho élpáweykha apmagkok yátnáxeg, tén han élnextegeykha néten ma'a yátnáxeg apkelyenyawasso!

³¡Apkelchánteyk yátnáxeg peya ektámegma'! ¡Kelyenmeyk sókwenaqte, kelyenmáha sawhéwa! ¡Apxámok apagko' apkelyense, apxámok apagko' han apkeletsapma! ¡Meyke néxa kélhapák! ¡Kelpelápagkassek chá'a kélhapák ma'a énxet'ák!

⁴Nínive keñamak ektáha ekyókxoho xa, ekteme nak kelán'a ekyaqmagkáseyak pók énxet ektegye selyaqye, ektaqmalma, ekmámenyého egwáxok anlano', sẽlxekmósso nak nenteme yohóxma, élyexancháseykha nak chá'a énxet'ák tén han pók aptémakxa énxet'ák élane m'a nentémakxa mansexta, tén han ekha ekmowána.

⁵Aptáhak Wesse' egegkok ekha nak apyennaqte s'e: “Énmexchek ko'o exche': eyxnéssesek sa' néten ekyekma ekweykekxoho nát, yaqwayam sa' elwetak apyókxoho énxet'ák meyke apáwa, yaqwayam sa' elwetak ekyókxoho apheykegkaxa énxet'ák ma'a ekyókxa nak.

⁶Ayenhek sa' ko'o exche aqsok ekmanyása, amegqaksohok agko' sa', wának sa' kasmésaxche'.

⁷Yenyahagkok sa' naqtók xeye' apyókxoho ektáha nak apwete, sa' etnehek apkelpeywa s'e: ‘¡Kélmasséssekmek Nínive! ¿Yaqsa sa' kayósho kalano'? ¿Háxko sa' kóteyágwok yaqwayam kapeykessásekxak awáxok?’

⁸¿Táseya exche', yagkaxnawok ma'a Tebas, tegma apwányam apyetnama nak nekha wátsam Nilo, ekhaxnencheykmo nak yegmen, ekhaxtamoma nak ma'a wátsam?

⁹Etiopía tén han Egipto, axta ekpasmo meyke néxa; keñe axta énxet'ák Fut, cham'a libios, apteme appasmeykekxa.

¹⁰Axta eyke kahaxanmak apkelmomakpo énxet'ák Tebas kélnaqleykekxo megkatnahakxa apchókxa'; kélyenhassegkek axta chá'a xapop apketchek ma'a máséyak nak ámay; tawásamaxcheyk axta xama aqsok kélexpánchessama m'a kelwesse'e apagkok nak, tén axta kélpextehetma cadenas ma'a apkelámha apmonye'e apagkok ekha nak kéláyo.

¹¹Kólaqhássesek sa' nahan xeyáxa anmen; kalyawheykha sa' keyxanmok kategyaha ekyexanmomakxa apmonye'e m'a élenmexma.

¹²Máxa higo kélcheneykekxexa m'a apyókxoho tegma apkelyennaqte agkok, ekxámokma nak ekyexna ekmakhetma, ekpalleykmohol'a kólyawhaksek, kapálwaták apwáxok ma'a ektáha nak apto.

¹³Máxa kelán'a m'a sẽlpextétamo agkok nak; kelmayhégkek atña'ák apchókxa yaqwayam elántexek ma'a kélenmexma; kelwatneyk táxa m'a kélápeykekxexa nak chá'a atña'ák kélagkok.

¹⁴Kólyetmák sa' yegmen, yaqwayam sa' kólewának kólenmaxaxkohok ma'a kélwakhamáxche'; kóllánekxa sa' kélhaxta. Kólántex sa' yelpa', kólteyam sa' kólyélaqtések, kóllána sa' yátaphémekcha'ák.

¹⁵Sa' kalwatnek kéxegke táxa m'a, tén han kalnápok kempakhakma, máxa sawa' aptól'a aqsok, sa' kóltéhek kólmasséssók kélyókxoho. ¡Kólxámasaxche sa' aptémól'a sawa'! ¡Kólxámasaxche sa' ektémól'a séta'!

¹⁶Apxámeykekxeyk apagko' ma'a apkexeykekxa nak chá'a aqsok énxet'ák kélagkok, apyeykhásseykmók apweykenxal'a apxámokma yaw'a m'a néten. (Elpexyawhok chá'a m'a sawa', keñe elchampa'.)

¹⁷Máxa sawa' m'a apkeleyxcháseykha nak cha'a; máxa askok élchampeykhal'a néten ma'a apkelámha apmonye'e nak chá'a apcháncheseykekxa sẽlpextétamo kélagkok: samágek agkok, elpathetwók chá'a nápakha tegma; tekkek agkok chá'a ekhem, elxegekxak chá'a, méko han kay'asagkok chá'a apkelmahágkaxa.

¹⁸“¡Apnaqteyenmeyk aqsa m'a apkeláneykha nepkések apagkok nak xép wesse' apwányam Asiria! Apkellókassegkek apkelyampe m'a apkeláneykha ekha nak kéláyo, apkexpaqneykha sẽlpextétamo apagkok ma'a élámhakxa nak meteymog, méko m'a eyáncheseykekxa enxoho.

¹⁹¡Méko pánaqte agkok ma'a apyense nak xép; megkataqmelwome'! Apkeltekpagáha apmék yetlo élpayheykekxa apkelwáxok apyókxoho apkellege nak ektáhakxa exchep eyáhapwe aqsok ekmaso, ¿yaqsa axta megkañeykegkoho chá'a m'a aptémakxa ekmaso, megkayetyapwágweykmo axta?”