Read Lengua Sur Habacuc 3 Bible Online

Habacuc 3 - Lengua Sur bible

Habacuc 3

¹Keso apkelmaxnagko axta Habacuc, apteme axta Dios appeywa aplegasso.

²Wesse', awanhók agko' chá'a ko'o seyáyo exchep, eñama seklege m'a aqsok eñama nak xép, tén han ma'a ekyókxoho aqsok apkelane nak chá'a. Henlanés negko'óxa aqsok ekyawe keso negwánxa nak, ektéma axta m'a nanók axta, yaqwayam sa' agya'asagkohok negko'óxa. Henxekmós negko'o exchep apmopyósa henlano', neyseksa eykhe aplo.

³Apxegakmek Dios apkeñama m'a yókxexma Temán; egkexe Parán apkeñamak apxegakmo m'a Dios Appagkanamap. Sawheykekxók apcheymákpoho m'a ekyókxoho nak néten, cháxa keñamak kélpeykessamo nak ekyókxoho keso nélwanmégkaxa'.

⁴Apxegakmek apcháhakkásamap apkelyenma, tekkek chá'a apkelyenma m'a apmek nak, cham'a appóssamakxa nak chá'a apmopwána m'a.

⁵Xegkek apmonye' m'a nenlegeykegkoho ekmaso nak, keñe neptámen ma'a ekmexanma egyempehek segaqhamo nak.

⁶Epexyennegkesek chá'a xapop ma'a apkenegwánxa enxoho; elpexyennók chá'a pók aptémakxa énxet'ák apkelano enxoho; kalyaqnenagkok chá'a m'a nanók egkexe nak, kalpayhekxak chá'a m'a nanók meteymog élwenaqte nak, megkamassegwomek eyke m'a Dios ámay apagkok.

⁷Ekwet'ak ko'o énxet'ák Cusán eyáhapwa'a éltemegweykmoho exma ekmaso, keñe m'a énxet'ák Madián sekwet'a apkelpexyennama apkelaye.

⁸Wesse', ¿aptaqnagkamcheya exchep ma'a wátsam? ¿Aptaqnagkamók apagko' ya exchep ma'a wátsam élyawe nak? ¿Keya keñamak apchánteyncha'a nak apchánte yátnáxeg, tén han apchánta m'a yátnáxeg apyenyawasso apagkok ekmallahanmo nak chá'a kempakhakma?

⁹Apkelánékxeyk kaxwók yágke apagkok yaqwayam yahaxtaqpog, apkelhaxyawássek kaxwók aktek. Kelpaxqátegkek xapop atamnek ma'a wátsam apagkok yegmen nak.

¹⁰Kelpexyennegkek han meteymog élekhahéyak ekwet'a; wéweynteyk han mámeye ekyawe agko' eñama m'a néten, páweyk han awáxok ma'a wátsam ekmattawóneg agko' nak, kelnextegkessek élyaqyahayam élyawe agkok.

¹¹Megkatyapak ekhem, tén han pelten ma'a élántaxnegweykekxexa nak chá'a ekwet'a m'a yágke aktek élyenma apagkok nak, tén han élyenmasso exma nak ma'a sawhéwa apagkok.

¹²Yetlo aplo apweynchámeyha ekyókxoho keso náxop, yetlo aplómo apagko' apkelteyammeyha pók aptémakxa énxet'ák.

¹³Apyaweykteyk xép yaqwayam epasmok énxet'ák apagkok, tén han ma'a wesse' apwányam apagkok apkelyéseykha axta exchep. Apketsagkassessek xép néten apxanák ma'a énxet'ák élmasagcha'a nak apkeltémakxa, yáxña'akxoho apnegkencháseykxak ma'a meteymog apowhók nak tegma.

¹⁴Yágke apagkok xép apmakta'ak apchaqha m'a wesse' apagkok apketamokmo axta yátnáxeg apkelchánte apagkok yetlo éleymáxkoho apkelwáxok aptáha m'a ektémól'a éxchahayam ekyennaqte, peya eykhe emasséssók meyke amya'a m'a apmopyóseka nak, tén han yexpánchesek.

¹⁵Apweynchámeyha néten wátsam ekwányam yetlo yátnáxeg apkelchánte, cham'a ekyawakxa nak ekpayhakxa yegmen ekmattawóneg.

¹⁶Xama axta ko'o sekleg'a xa, eyekak axta. Kelpexyennamágkok axta sekpeywa, kelyelqáxchek axta exchakkok, massék axta ekyenna ekyókxoho émpehek. Aleyxek sa' eyke aqsa ko'o meyke sekpekhésamaxche m'a ekhem yaqwánxa sa' ellegássesagkohok Dios ma'a sẽlpextétamo sennaqtawáseykegkoho nak.

¹⁷Keñe sa' kapayhekxohok agko' ko'o ewáxok eñama m'a Wesse' sewagkasso nak teyp. Megkalyapwék sa' eykhe higo yámet, alpeykeshok sa' eyke, megkeyxek sa' eykhe han ma'a anmen yámet, tén han ma'a olivo yámet; megkanakxaxcheyk sa' eykhe han aqsok ma'a namyep; esawhakpok sa' eykhe han nepkések méko sa' eykhe han katnehek weyke m'a axanák nak.

¹⁹Hakte Wesse' egegkok segkésso sekyennaqte; egkéssegkek ekyennaqte sekxega, ektémól'a xenaq, éntameykekxeyk ma'a egkexe yaqwánxa sa' awagkasaxchek teyp.