Read Lengua Sur Sofonías 1 Bible Online

Sofonías 1 - Lengua Sur bible

Sofonías 1

¹Keso appeywa apkeltennassama axta Wesse' egegkok ma'a Sofonías, aptémakxa axta wesse' apwányam Josías ma'a Judá, Amón axta apketche. Cusí axta eyke apketche m'a Sofonías, keñe axta Sofonías apketche m'a Guedalías, tén axta Guedalías apketche m'a Amarías, keñe axta Amarías apketche m'a Ezequías.

²Keso aptáhakxa axta appeywa Wesse' egegkok se'e: “Amasséssók sa' ko'o ekyókxoho aqsok ekhéyak nak keso náxop.

³Amasséssók sa' énxet'ák, tén han aqsok kélnaqtósso, tén han náta tén han kelasma, alpelápagkasek sa' ma'a élmasagcha'a nak apkeltémakxa, amasséssók sa' énxet keso náxop.” Keso aptáhakxa axta appeywa Wesse' egegkok se'e:

⁴“Allegássesagkohok sa' ko'o m'a énxet'ák Judá tén han ma'a apyókxoho apheykha nak Jerusalén. Amasséssók sa' ekyókxoho ekheykegkokxa nak natámen Baal se'e yókxexma nak, cham'a aqsok kéláyókxa ekmowána amya'a nak, ekweykekxoho apkelwesey m'a apkelmaxnéssesso nak chá'a énxet'ák agkok.

⁵Amasséssók sa' ma'a apkelchánte nak chá'a néten tegma yaqwayam elpeykeshok ma'a aqsok élápogwátéyak nak néten, tén han apkeltekxeyéyak nak chá'a aptapnák xapop etnéssesek naqsók apkelpeywa elxének ma'a sekwesey, tén han ekwesey m'a aqsok kéláyókxa Milcom.

⁶Amasséssók sa' han ma'a seyamasma nak ko'o, mehektamso nak chá'a tén han mehey'eykekta nak chá'a etegyaha sekpeywa.”

⁷¡Kólwanmeyák sa' nápaqtók Wesse' egegkok, hakte chágketwa'ak ma'a Wesse' egegkok ekhem apagkok! ¡Appenchessek apkeláneykekxa aptáhakxa Wesse' egegkok yaqwayam elának aqsok ektekyawa, apkelpagkanchek nahan ma'a ektáha nak apkeláneyeykha!

⁸“Allegássesagkohok sa' ko'o apkelámha apmonye'e m'a ekhem sélana sa' aqsok ektekyawa —axta aptáhak Wesse' egegkok— tén han ma'a kelwesse'e apkelwányam apketchek nak keñe han ma'a apyókxoho apkeláneyak nak chá'a ektémakxa aqsok apkeláneyak ma'a pók énxet'ák melya'áseyak nak Dios.

⁹Allegássesagkohok sa' nahan apkelnextega nak chá'a néten elántépok átog xa ekhem nak, tén han apsawheyáseykekxoho nak chá'a kelwesse'e apagkok apxanák ma'a negyennaqteyáseykha nak egyempehek tén han nélyexancháseykha egmók.”

¹⁰Keso aptáhakxa exchek appeywa Wesse' egegkok se'e: “Kañexchek sa' kélpáxameykha ektegyeykha ekpasmo xa ekhem nak eyeynamo m'a kéltéma nak Kelasma Átog agkok. Kalpayheykha sa' apatña'ák énxet'ák ma'a kéltéma nak Kaxwe Apheykegkaxa, kaxtegyók sa' ekyennaqte agko' apkelyaqnenma tegma m'a egkexe nak.

¹¹¡Kéxegke, kélheykha nak tegma Mortero, kalpayheykha kélatña'ák hakte esawhakpohok sa' eletsapok apyókxoho m'a apkexeykekxa nak chá'a aqsok, kólmasséssók sa' apyókxoho m'a apkelseykha nak chá'a selyaqye!

¹²“Amok sa' ko'o xama cháléwasso xa ekhem nak keñe sa' atátchesek alanok ma'a Jerusalén. Allegássesagkohok sa' ma'a énxet'ák apkeltaqmelchessamo nak aqsa apheykha ektémól'a vino ektaqmelchessamól'a aqsa ekyetno, apteme nak chá'a elpaqmeyesmakha s'e: ‘¡Melanyek xama aqsok Wesse' egegkok, cham'a ektaqmela nak tén han ma'a ekmaso nak!’

¹³Cháxa keñamak peya nak kalmaxchek ma'a aqsok élmomnáwa apagkok nak, tén han kólmasséssessók ma'a apxanák nak, elanagkok sa' eykhe apxanák, mexnakha sa' eyke m'a; eknagkok sa' eykhe anmen yámet, ménagkehek sa' eyke m'a égmenek nak.”

¹⁴¡Chágketwa'ak ekhem ekyawe apagkok Wesse' egegkok! ¡Ketók kaxwo', pekhésawók ekxegáyam! Asagkek sa' katnehek ekwa'a enxoho m'a éxtegyawà Wesse' egegkok ekhem apagkok: ¡kawomhok sa' élpayheykha apatña'ák ma'a énxet'ák megyeye nak chá'a elmahagkok eyesagkexa'!

¹⁵Katnehek sa' ekhem eklo xa ekhem nak, nenlegeykegkoho ekmáske tén han ekyentaxnamo egwáxok, sẽlmassésseyam tén han kéltemessáseykekxa meyke xama aqsok, ekyaqtessóxma tén han yaphope néten ekyentaxno agko';

¹⁶ekhem kélpáwassamakxa kélaqkahasso tén han kélpáxameykha kélchetámeyak ma'a tegma apkelyawe apkelyennaqte nak tén han ma'a tegma apkelwenaqte apagkok nak.

¹⁷Aptáhak Wesse' egegkok se'e: “Malya'ássesagkek sa' aptamhágkaxa énxet'ák. Máxa meyke apaqta'ák sa' chá'a etnahagkok elxog, hakte apkeláneykegkek melya'assáxma nahaqtók ko'o. Máxa xapop ánek sa' katnehek kayegkenaxchek éma apagkok, keñe sa' aphápetek kéláncheseykekxa kaxhok ma'a ektémól'a aqsok ekteyáseykha.”

¹⁸Megkalwagkasek sa' teyp sawo ekmope élmomnáwa tén han sawo ekyátekto élmomnáwa apagkok énxet'ák ma'a ekhem, aplawa sa' Wesse' egegkok, hakte kasawhohok sa' Wesse' egegkok aplo ekyókxoho apkelókxa ektémól'a táxa kalwatnek aqsok. ¡Ekmanyehe agko' sa' kólmasséssók apyókxoho apheykha nak keso náxop!