Read Lengua Sur Sofonías 2 Bible Online

Sofonías 2 - Lengua Sur bible

Sofonías 2

¹Kólaqnekxa' sa', kólyepetchekxa sa' kélmók, kéxegke énxet'ák megkólmeqakto nak,

²amonye' kélchempasso ektémól'a pa'at apák, ekmassamól'a aqsa xama ekhem agko'; amonye' eyáhapwe kéxegke m'a Wesse' egegkok aplo; amonye' eyáhapwe kéxegke m'a ekhem aplawa sa' Wesse' egegkok.

³Kólchetam kéxegke Wesse' egegkok kélyókxoho megkaleymáxkoho nak kélwáxok keso nélwanmeygkaxa, kélyeheykekxoho nak chá'a m'a apchánamakxa nak antéhek. Kóllána ekpéwomo kéltémakxa yetlo megkaleymáxkoho kélwáxok, lapmaxcheyk sa' kólwetak kélyexanmomakxa kéltáha enxoho xa, cham'a ekhem aplawa sa' ma'a Wesse' egegkok.

⁴Etaqmopagkok sa' tegma apwányam Gaza, keñe sa' Ascalón katnekxak meyke xama aqsok; ekhakxoho ekhem sa' kólántekkesek ma'a apheykha nak Asdod, esawhakpohok sa' kólmasséssók ma'a apheykha nak Ecrón.

⁵¡Kéxegkel'aye, énxet'ák Creta, kélheykha nak neyáwa wátsam ekwányam! Apxénchek Dios se'e yaqwánxa nak etnéssesek kéxegke: “¡Canaán, énxet'ák filisteos nak apchókxa, amasséssók sa' ko'o exchep, meyke énxet apheykha kañe' sa' atnessásekxa'!

⁶Émhakxa pa'at sa' katnekxak ma'a apchókxa ekyetno nak neyáwa wátsam ekwányam, yaqwánxa sa' chá'a yaqnekxak ma'a keláneykha nepkések, tén han yaqwánxa sa' chá'a kóllánésagkok aphaxta apagkok ma'a nepkések.”

⁷Énxet'ák Judá sa' emekxak xa apchókxa nak, cham'a apkeleymomap nak meletsapma, apwa'akto sa' epásegwaták ma'a Dios Wesse' apagkok, apyaqmagkassesa sa' mók ma'a ektémakxa nak apheykha. Sa' elanha apnaqtósso nepkések ma'a, keñe sa' axta'a ellókassekxak chá'a apkelyampe m'a tegma apheykegko nak Ascalón.

⁸ Keso aptáhakxa nak appeywa Wesse' ekha apyennaqte, Dios apagkok nak Israel: “Eklegayak ko'o sexéneykha ekmaso m'a moabitas tén han setaqnagko m'a amonitas. Hakte apkelxéneykha chá'a ekmaso m'a énxet'ák ahagkok nak, apkelyennaqteyásamákpok han chá'a apkelyementamoma m'a xapop apagkok nak. Cháxa keñamak sekxéna nak ko'o naqsók peya katnehek Moab ma'a ektémakxa axta m'a Sodoma keñe sa' Amón katnehek ma'a ektémakxa axta Gomorra, émhakxa am'ák sa' katnekxa', tén han ekyetnamakxa yásek, meyke aqsok meyke néxa sa' katnekxa'. Elmagkok sa' aqsok apagkok ma'a énxet'ák ahagkok apkeleymomap nak meletsapma, emok sa' han ma'a xapop apagkok nak.”

¹⁰Cháxa yaqwánxa sa' katnehek apkelxawéyak ekyaqmageykekxa apkeltémakxa m'a énxet'ák Moab tén han ma'a Amón, eñama apkelxéneykha ekmaso m'a Wesse' egegkok énxet'ák apagkok, tén han eñama apkelyennaqteyásamákpoho apkelyementaméyak chá'a xapop apagkok ma'a Wesse' ekha nak apyennaqte énxet'ák apagkok.

¹¹Asagkók agko' sa' katnehek apteméssesakxa Wesse' egegkok ma'a énxet'ák nak. Emasséssók sa' ekyókxoho aqsok kéláyókxa nak chá'a m'a apchókxa, sa' aqsa wánxa kólpeykeshok chá'a ekyókxoho apheykegkaxa m'a, kawakxohok sa' ma'a énxet'ák apheykha nak neyáwa wátsam ekwányam.

¹²¡Kéxegke han, énxet'ák Etiopía, kólmaskok sa' eñama élnapma m'a Wesse' egegkok sókwenaqte apagkok!

¹³Ey'aksek sa' apmopwána m'a ekpayho nak nexcheyha yaqwayam emasséssók ma'a Asiria, meyke xama aqsok sa' etnessásekxak ma'a tegma apwányam Nínive, ekyamaye exma sa' etnessásekxa'.

¹⁴Kólhexyawássesagkok sa' ma'a yántéseksek apxanák nak, sa' elyagqak nahan chá'a nepkések ma'a keñe han ma'a mók ektémakxa nak chá'a aqsok nawha'ák. Sawe apkelyawe sa' enaqtének ma'a néten étseksa'ák nak yámet élámha apagkok tén han leklek, keñe sa' náta élpésyam kalpáwha m'a átog étkók nak tén han ma'a átog nentaxnamakxa nak tegma.

¹⁵Cháxa tegma apwányam apheykegkaxa nak énxet'ák apkeleymákpoho xa, meyke éltamheykha apkelwáxok, apkelxeyenma axta chá'a apheykha nak kañe' méko ekhawo s'e ekyókxoho nélwanmeygkaxa nak. ¡Meyke agko' aqsok tamhákxa', aqsok nawha'ák éllo élyáqtamakxa'! Apkelyeykhágwokmek sa' agkok chá'a énxet'ák ma'a elmóhaksek sa' chá'a, keñe sa' elyaqyéssesha chá'a apmék elwanyoho'.