Read Lengua Sur Sofonías 3 Bible Online

Sofonías 3 - Lengua Sur bible

Sofonías 3

¹¡Jerusalén la'aye, tegma apwányam apkenmexeykekxa nak Dios, eksawheykekxoho nak nentémakxa ekmaso, apnaqtawáseykegkoho nak chá'a m'a apheykha nak kañe'!

²Megyaháxenmók ma'a Wesse' egegkok appeywa mopmenyeyk nahan kólpékessesagkok; megyáyok nahan ma'a; mey'eykekxak han ma'a Dios.

³Máxa yámakméwa m'a apkelámha apmonye'e apagkok élpáweykhal'a awáxok; máxa aqsok nawha'ák éllo élleykhal'a meykexa énxet ma'a segyekpelchémo apagkok nak, megkáyam la'a ketsék axchapok yaqwayam katwok ma'a saka.

⁴Éleymáxkoho apkelwáxok ma'a énxet'ák apagkok apkellegasso nak chá'a Dios appeywa tén han apkelyexancháseykha chá'a pók; aptawáseykha tegma appagkanamap ma'a énxet'ák apagkok apkelmaxnéssesso nak chá'a Dios énxet'ák apagkok, meláneykegkok ma'a Wesse' egegkok segánamakxa apagkok.

⁵Aphegkek eyke Wesse' egegkok ma'a tegma apwányam nak; apkeláneyak chá'a aqsok ektaqmela m'a, melaneyk chá'a m'a aqsok ekmaso nak. Yókxoho axto'ók chá'a yának kalanaxchek ma'a aqsok ekpéwomo, meyke kélyeykhasso. Keñe m'a ekmaso nak aptémakxa mey'ásegweykmok ektémakxa m'a negmegqakto.

⁶Aptáhak Wesse' egegkok se'e: “Ekmasséssekmek ko'o pók aptémakxa énxet'ák, élyaqnegkásegkek ma'a tegma apkelwenaqte kélhaxtegkesso nak nepyáwa', meyke xama aqsok ektemessásekxak ma'a ámay apagkok nak, meyke xama énxet enxoho yaqwayam eyeykhagwók. ¡Méko xama enxoho apheykekxa m'a tegma apkelyawe apagkok nak!

⁷Axta entáhak élchetamso ewáxok se'e: ‘Sa' heyeyk chá'a énxet'ák Jerusalén sekteméssesa enxoho xa tén han elyahakxohok chá'a apékessesagkok; tén sa' megkólmasséssemek chá'a m'a apxanák nak eñama ko'o séllegassáseykegkoho.’ Apkelánegkokxeyk axta eyke aqsa makham ekyókxoho m'a mók ektémakxa nak chá'a aqsok ekmaso.

⁸Hélleyx sa' aqsa m'a ekhem, sémpákxo sa' néten yaqwayam alxénchásekxohok ko'o kéltémakxa kéxegke. Ektáhak ko'o sekpeywa s'e sektáha nak Wesse': Ekxénchek ko'o wánchásekxak pók aptémakxa énxet'ák tén han kelwesse'e yaqwayam sa' ko'o ayenyenták seklo nepyeseksa. ¡Kamasséssók sa' ekyókxoho xapop ma'a seklo ekho nak táxa eyáléwe!

⁹“Wokmek sa' agkok xa, amasséssesek sa' ko'o ektémakxa nak chá'a apkelpeywa ekmaso m'a énxet'ák, yaqwayam sa' hewónmakha chá'a ko'o m'a apyókxoho nak, tén han hetnéssesek ko'o wánxa xama sétleykha.

¹⁰Elmaxneyeynták sa' elchexyók énxet'ák ahagkok apkexpánma axta hélsantagkasek aqsok sélmésso naqsa, cham'a apheykha nak neyp wátsam Etiopía.

¹¹Énxet'ák ahagkok, cháxa ekhem nak, kamaskok sa' kaxwók kalmegqaksek xama enxoho m'a aqsok ekmaso kélláneyak kélláneykegko nak chá'a sélenmexeykekxo kéxegke, keñe sa' alántekkesek kélnepyeseksa m'a éleymáxkoho nak apkelwáxok tén han ma'a megyésso nak eleykpoho', kamaskohok agko' sa' apkeleymákpoho m'a egkexe ekpagkanamaxche ahagkok nak.

¹²Alheyásekxak sa' ko'o kélnepyeseksa kéxegke m'a énxet'ák kéltemessáseykekxa nak meyke éleymáxkoho apkelwáxok tén han mékoho, yaqwayam sa' melya'ássók ma'a sekwesey nak.

¹³Melanagkek sa' aqsok megkapéwomo m'a énxet'ák Israel apkeleymomap nak meletsapma, metnahagkek sa' han chá'a apkelmopwancha'a amya'a, melyexanchesha sa' nahan chá'a pók. Apwanchek sa' etawagkok aptéyak tén han ellókasagkok apkelyampe meyke apkelaye xama aqsok enxoho.”

¹⁴¡Kólmeneykmés kélheykha nak tegma apwányam Sión! ¡Kólwónches ekpayheykekxa kélwáxok, énxet'ák Israel! ¡Énxet'ák Jerusalén, kalpayhekxa kélwáxok, kalpayhekxoho agko' kélwáxok!

¹⁵Apkelwátessekmek Wesse' egegkok yaqwánxa axta etnéssesek kéxegke, apkelántekkessek nahan ma'a kélenmexma nak. Apheyk kélnepyeseksa kéxegke m'a Wesse', Wesse' apwányam nak ma'a Israel: megkólakyek sa' kaxwók xama enxoho m'a aqsok ekmaso.

¹⁶Sa' katnehek amya'a eláneykpok énxet'ák Jerusalén xa ekhem nak: “¡Énxet'ák Sión, nágkatneykha kélwáxok, nágkólho kólyelqaxche'!”

¹⁷Apheyk kélnepyeseksa kéxegke m'a Dios Wesse' kélagkok; ¡apmeyhek nahan ma'a, elwagkasek sa' teyp! Kapayhekxak sa' apwáxok elanok kéxegke m'a Wesse' egegkok. Egkeyásekxak sa' axnagkok kélyennaqte eñama apkelásekhayo; enneykmaksek sa' eñama kélpeykessáseykekxa apwáxok

¹⁸ektémól'a kalanaxchek ma'a ekhem kélessawássessamo. Aptáhak Wesse' egegkok se'e: “Almallahanchesek sa' ko'o kéxegke m'a aqsok ekmaso ekmáheyo nak káhapwa', cham'a kélmegqakto élyaqhapma nak kéxegke.

¹⁹Cháxa ekhem nak, allegássesagkohok sa' ko'o apyókxoho m'a ektáha nak chá'a apnaqtawáseykegkoho. Apasmok sa' ma'a nepkések apyaqteyeykha nak, almekxak sa' han ma'a apkelxegányam nak; ekha kéláyo sa' atnessásekxa' tén han kélya'áseykegkoho ekyókxoho yókxexma keso náxop, eñama kélwanyeykha.

²⁰Anaqlanták sa' ko'o kéxegke xa ekhem nak, wánchásekxak sa'; wának sa' kayaqmagkasek mók ma'a ektémakxa nak kélheykha, ekha kéláyo sa' atnéssesek tén han kélya'áseykegkoho ekyókxoho yókxexma nepyeseksa m'a apyókxoho énxet'ák nak keso náxop. Ko'o sekxeyenma xa, sektáha nak Wesse'.”