Read Lengua Sur Hageo 2 Bible Online

Hageo 2 - Lengua Sur bible

Hageo 2

¹Appaqhetchásekxeyk axta makham Wesse' egegkok ma'a Hageo, apteme axta aplegasso appeywa, cham'a ekhem veintiuno, pelten siete,

²axta apkeltamhók etnehek yának Zorobabel tén han Josué, tén han ma'a énxet'ák nak:

³“Apyetnéya makham kélnepyeseksa kéxegke apwete tegma appagkanamap aptaqmalma apagko' ma'a sekxók axta, tásek elxének háxko ektáhakxa apkelwete s'e apyetna nak kaxwo' nak. ¿Apsagkóya apkelano, ya exnawok ma'a pók axta?

⁴¡Ná eyelqáp Zorobabel! ¡Ná eyelqáp Josué, apteme nak apkemha apmonye' apkelmaxnéssesso Dios énxet'ák apagkok! Nágkólyelqaxche kélyókxoho kéxegke énxet'ák kélheykha nak apchókxa. Kóltemeykha, ekheyk ko'o kélnepyeseksa kéxegke. Ko'o sekxeyenma xa, sektáha nak Wesse' ekha sekyennaqte.

⁵Apheyk kélnepyeseksa kéxegke espíritu ahagkok, ekhawo séltennassama axta kéxegke kélánteyapma axta Egipto. Nágkóle'.

⁶Kaxwók sa' ko'o ayawhesha néten, tén han xapop, wátsam ekwányam, tén han ekyamáyekxa nak exma xapop.

⁷Alpexyennegkesek sa' apyókxoho pók aptémakxa énxet'ák, keñe sa' elsanták aqsok élmomnáwa apagkok ekxámokma, kalánhok sa' élseyéxma m'a tegma appagkanamap ahagkok.” Ko'o sekxeyenma xa, sektáha nak Wesse' ekha sekyennaqte:

⁸“Ahagkok ko'o m'a sawo ekmope élmomnáwa, tén han sawo ekyátekto élmomnáwa.

⁹Aptásók apagko' sa' etnehek se'e tegma appagkanamap nak, mexók sa' ma'a apmonye' apkelánamap axta. Keñe sa' ko'o wának keytek meyke ektáhakxa apheykha énxet'ák se'e yókxexma nak. Ko'o sekxeyenma xa, sektáha nak Wesse' ekha sekyennaqte.”

¹⁰Appaqhetchásekxeyk axta makham Wesse' egegkok ma'a Hageo, apteme axta aplegasso appeywa, ekhem veinticuatro, ekwokmo axta pelten nueve, apqánet apyeyam apteme wesse' apwányam Darío,

¹¹tén axta apkeltamho elmaxneyha apkelmaxnéssesso Dios énxet'ák apagkok, ektémakxa chá'a kélmeykha m'a segánamakxa nak, yetlo apxeyenma Wesse' egegkok ekha nak apyennaqte apwesey:

¹²“Yetneyk agkok xama énxet apseykekxa ápetek appagkanchesso nak Wesse' egegkok appextete m'a apchaqlamap, tén han aptamhomakpoho nak nápakha aptaxno m'a pán, kélhanma, vino, tén han pexmok égmenek, essenhan ma'a mók ektémakxa nak chá'a nento: ¿élpagkanamaxcheya sa' katnehek nento ektáha enxoho xa ektáha nak?” Ma', megkatnehe', axta aptáhak apkelátegmowágko apkelmaxnéssesso Dios énxet'ák apagkok.

¹³Aptáhak axta makham Hageo s'e: “Yetneyk agkok xama énxet ekmanyása apyempehek eñama appaknegweykmoho m'a kélhápak, keñe appaknegwokmoho enxoho han xama nento nak: ¿megkatneheya sa' élmanyása xa nento nak?” Élmanyása sa' katnehek, axta aptáhak apkelmaxnéssesso Dios énxet'ák apagkok.

¹⁴Keñe axta aptáha Hageo s'e: “Aptáhak Wesse' egegkok se'e: Hawók ektémakxa nak se'e énxet'ák nak: ekyókxoho aqsok apkeláneyak nak ekteme élmanyása, tén han ma'a aqsok sélmésso nak chá'a.

¹⁵Kaxén sa' kaxwók kélwáxok kéxegke s'e, eyeynamo s'e sakhem nak, tén han ma'a egmonye' sa'. Amonye' kélxátekháseykekxa tegma appagkanamap,

¹⁶kaxén kélwáxok ma'a kéltémakxa axta, apxegkek axta agkok chá'a kélxama emáwhok elwakxak ma'a veinte hótáhap apaktek kéláncháseykekxa, diez axta aqsa chá'a elwetágwakxa'; apmeyákxeyk axta agkok han chá'a kélxama m'a élánamáxchexa nak vino, yaqwayam ellánésagkok cincuenta yátegwáxwa, veinte axta aqsa chá'a éta'.

¹⁷Eyhayak axta ko'o aqsok élnapmo nak yenta'a, tén han yegmen élyennaqte, ekyókxoho aqsok kélcheneykekxa', makke hélye'eykekták ko'o kéxegke. Ko'o sekxeyenma xa, sektáha nak Wesse'.

¹⁸Sakhem veinticuatro, pelten nueve, kélnegkenágko ekyennaqtéssamakxa nak apowhók ma'a tegma appagkanamap ahagkok.

¹⁹Kóllano, sakhem sa' keynhok exek hótáhap apaktek ma'a kélxátamakxa nak chá'a. Megkeyxnak eykhe makham ma'a anmen yámet, tén han higo yámet, tén han yántakyexna, tén han olivo; sakhem sa' eyke ko'o weynhok agkések ektaqmalma kélheykha.”

²⁰Appaqhetchásekxeyk axta makham Wesse' egegkok ma'a Hageo xa ekhem nak,

²¹axta apkeltamhók etnehek yának Zorobabel, apteme axta apkeláneykha apchókxa m'a Judá: “Ayawhesha sa' ko'o néten, tén han xapop;

²²amasséssók sa' ko'o aptamhéyak chá'a apkelwesse'e apkelwányam keso náxop, néxa sa' atnéssesek aptamhéyak apkelwesse'e; alpeynchók sa' ma'a yátnáxeg apkelyenyawasso kélanchesso nak kempakhakma, yetlo m'a ektáha nak chá'a apkelchánte, eletsapok sa' yátnáxeg, tén han ma'a apheykha nak chá'a apkap'ák; yetsapok sa' chá'a xama apkelyetxeykekxa pók sawo.

²³Ataqmelchesek sa' ko'o exchep xa ekhem nak Zorobabel, apteme nak séláneykha, sa' atnéssesek ma'a ektémól'a sétchesso ephék sélqahassól'a, hakte élyéseykha ko'o exchep. Ko'o sekxeyenma xa, sektáha nak Wesse' ekha sekyennaqte.”