Read Lengua Sur Zacarías 1 Bible Online

Zacarías 1 - Lengua Sur bible

Zacarías 1

¹Keso appeywa apmésa axta Wesse' egegkok Zacarías apteme axta Dios appeywa aplegasso, Berequías axta apketche, Idó axta aptáwen, ekweykmo axta ocho pelten apteme Wesse' apwányam ma'a Darío, aptáhakxa axta apqánet apyeyam. Aptáhak axta apcháneya s'e:

²“Éltaqnaweygkók ahagko' axta ko'o m'a kélyapmeyk nano' nak kéxegke, ko'o sektáha nak Wesse' ekha sekyennaqte. Cháxa keñamak séltamho nak ko'o kaxwo' eltennasagkok énxet'ák keso sekpeywa nak se'e: ‘hélyo'óta ko'o, keñe sa' ay'óták nahan ko'o xa kéxegke. Ko'o sekxeyenma xa sektáha nak Wesse'.

⁴Nágkólteme aptamheykegkaxa axta m'a kélyapmeyk nano', apkeltennassama axta eykhe ko'o sektémakxa sekpeywa m'a nano' apkellegasso axta sekpeywa, aptéma axta apkelanagkama s'e: kólyenyow kéltémakxa élmasagcha'a tén han kélláneyak aqsok ekmaso, axta eyke heháxenmók ko'o m'a, axta nahan hélyeheykekxa'. Ko'o sekxeyenma xa, sektáha nak Wesse'.

⁵¿Háxko apheykegkaxa kaxwók ma'a kélyapmeyk nano' axta kéxegke? ¿Megkatnégwomeya sa' chá'a néxa apkelweynchámeykha m'a apkellegasso nak sekpeywa?

⁶Cham'a sekpeywa tén han seyánamakxa axta chá'a etnahagkok, séltémo axta ko'o eltennasagkok ma'a séláneykha apkellegasso axta sekpeywa, apwagkassegkek axta apheykegkaxa m'a kélyapmeyk nano' axta kéxegke. Tén axta sey'eykekto ko'o m'a, apkelya'ásegweykmo m'a sekteméssessamakxa axta chá'a ko'o sektáha nak Wesse' ekha sekyennaqte eñama m'a apkeltémakxa tén han aqsok ekmaso apkeláneyak.’”

⁷Keso amya'a sekxawáya axta ko'o eñama Wesse' egegkok, sektáha nak seklegasso Dios appeywa Zacarías, Berequías apketche, Idó aptáwen, ekhem veinticuatro pelten once (éltamhomaxko nak pelten Sebat) ektáhakxa axta apqánet apyeyam apteme wesse' apwányam ma'a Darío.

⁸Xama axta'a axta ko'o sekwet'a s'e aqsok sélxekmósso nak: Ekwet'ak axta xama énxet apchánte yátnáxeg apyexwase. Apkenmáha axta neyseksa yámet élmope exnók arrayán, ekyapwátegweykenxa nak xapop, keñe axta nahan ma'a neptámen nak apkelyagqa yátnáxeg, apkelyexwase axta nahan ma'a, tén han yáma apkelpésyam tén han apkelmope.

⁹Axta ektáhak ko'o sélmaxneyeyncha'a s'e: “Wesse' ahagkok, ¿Yaqsa xa apkelchánte nak yátnáxeg?” Tén axta m'a Dios apchásenneykha ektáha axta ko'o sepaqhetchesso aptáha seyátegmowágkokxo s'e: “Altennaksek sa' ektémakxa exchep ekyetchesamaxkoho xa.”

¹⁰Tén axta m'a apkenmeykha axta neyseksa yámet élmope exnók arrayán, aptáha s'e: “Wesse' egegkok apkelápháseykha xa, yaqwayam elweynchamha ekyókxoho keso náxop.”

¹¹Keñe axta m'a apkelchánte nak yátnáxeg aptáha apcháneya Wesse' egegkok apchásenneykha apkenmeykha axta neyseksa yámet arrayán se'e: “Nélweynchámeyha negko'o ekyókxoho keso náxop, negwet'ak nahan meyke ektemegweykmohóxma, kelwónegko aqsa exma.”

¹²Aptáhak axta Dios apchásenneykha s'e: “Wesse' ekha apyennaqte, wokmek kaxwók setenta apyeyam aptaqnagko m'a Jerusalén tén han ma'a tegma apkelyawe nak Judá. ¿Háxko sa' ekwánxa elásekhekxoho?”

¹³Apchátegmowágkokxeyk axta Wesse' egegkok yetlo ektaqmeleykha appeywa m'a apchásenneykha ektáha axta ko'o sepaqhetchesso, yaqwayam etaqmelchessásekxak apwáxok,

¹⁴tén axta natámen Dios apchásenneykha apkeltamho atnehek añeksek se'e: “Keso aptáhakxa nak appeywa Wesse' ekha nak apyennaqte s'e: ‘Awanhók agko' ko'o seyásekhayo m'a Jerusalén tén han ma'a Sión.

¹⁵Cháxa keñamak séltaqnaweygko ahagko' nak ko'o m'a pók aptémakxa nak chá'a énxet'ák, meyke nak élyetnakhayo apkelwáxok, hakte cham'a ekmasextexa axta ko'o seklo, apyáncheseykegkok axta aqsa apkellegassáseykegkoho m'a énxet'ák ahagkok.

¹⁶Cháxa keñamak sektáha nak sekpeywa, ko'o sektáha nak Wesse': Ekya'aweykteyk ko'o makham yetlo seyásekheykekxoho m'a Jerusalén, wának sa' kólxátekhásekxak ma'a tegma appagkanamap tén han ma'a apyókxoho tegma apwányam nak.’”

¹⁷Aptáhak axta nahan seyáneya Dios apchásenneykha s'e: “Exén sa' nahan se'e: ‘Aptáhak Wesse' egegkok ekha nak apyennaqte s'e: Wának sa' ko'o enaqxétekhagkokxohok apagko' makham ma'a tegma apkelyawe ahagkok; agkeyásekxak sa' makham axnagkok ekwasqápeykekxoho m'a Sión, axénekxak sa' ko'o makham Jerusalén apteme tegma apwányam ahagkok sélyéseykha.’”

¹⁸Ekwet'ak axta makham mók aqsok sélxekmósso, ekwet'ak axta élánteyapwa'a cuatro aqsok egkepet'ák.

¹⁹Élmaxneyáha axta ko'o m'a Dios apchásenneykha ektáha axta sepaqhetchesso. Axta ektáhak seyáneya s'e: ¿Yaqsa aqsok xa aqsok egkepet'ák nak? Aptáhak axta seyátegmowágkokxo s'e: “Cháxa aqsok egkepet'ák ekteme ekyetchesamaxkoho apkelyennaqte m'a énxet'ák apkexpánchessama axta apkelya'assama ekyókxoho yókxexma m'a énxet'ák apheykha nak Judá, Israel tén han ma'a Jerusalén.”

²⁰Tén axta Wesse' egegkok sexekmowásekxo makham cuatro apkeltamheykha nak sawo'.

²¹Axta ektáhak sélmaxneyeyncha'a s'e: “¿Yaqsa apmako elanagkok apkelxegakmo nak xa apkeltamheykha nak sawo?” Aptáhak axta seyátegmowágkokxo s'e: “Apkelwa'ak yaqwayam elyegwakkasek tén han elyaqténchesagkok apkepet'ák ma'a énxet'ák apkelyetchesamakpoho nak aqsok egkepet'ák, apkelyetxeykegko axta m'a énxet'ák Judá, apkexpánchessama axta meyke xama enxoho apmopwána yenmexekxa'.”