Read Lengua Sur Zacarías 10 Bible Online

Zacarías 10 - Lengua Sur bible

Zacarías 10

¹Kólmaxna Wesse' egegkok ekmámeye ekweyktámhol'a chá'a élyapweykxa yámet, keñe sa' yáphássesek ekyawe agko' ma'a Wesse' egegkok aptekkessamól'a chá'a apkelyenmayam, elmésagkok sa' ektaqmalma pa'at ma'a yókxexma.

²Aqsok kéláyókxa élpeywa ekteme ekmowána amya'a, wanchek nahan chá'a amya'a apkelxeyenma nak chá'a apkelwete aqsok ma'a énxet'ák ekha nak apmopwancha'a. Mékoho agko' ma'a apkelxeyenma nak chá'a aqsok apkelwete apkelwanmagko, mehentaqmelchessásekxeyk egwáxok ma'a apkelpeywa. Cháxa keñamak apkelweynchámeykencha'a nak aqsa m'a énxet'ák, aptémól'a m'a nepkések, apkellegeykegkohol'a meyke xama m'a ektáha nak apkeltaqmelchesso.

³Cháxa keñamak aptáha nak appeywa Wesse' egegkok se'e: “Éltaqnaweygkók ahagko' ko'o m'a apkeláneykha nepkések nak, allegássesagkohok sa' ma'a ektáha nak chá'a apnaqleykha énxet'ák ahagkok.” Yátnáxeg apyennaqte kempakhakma apagkok sa' etnessásekxak Wesse' ekha nak apyennaqte, apkeláneykha nak chá'a nepkések apnaqtósso m'a Judá aptawán'ák neptámen.

⁴Sa' eleñék elántépok énxet aphémo nak Meteymog Élyennaqte Kélchenegkessamól'a chá'a Máséyak ma'a, tén han ma'a aphémo nak Yámet Élmahamtakcha'a Kélatchessamól'a Xapop kólnaqtétek kélpakxanma tén han ma'a apho nak Yágke Kélanchessól'a Kempakhakma. Sa' eleñék elántépok nepyeseksa apyókxoho m'a kempakhakma yapmeyk.

⁵Sa' etnahagkok ma'a aptamheykegkaxal'a sẽlpextétamo apkelxegál'a ámay neyseksa yelpa' yempakha'; elnapakpok sa', hakte apheyk nepyeseksa m'a Wesse' egegkok, elmegqaksek sa' ma'a apkelchánte nak yátnáxeg.

⁶Aptáhak Wesse' egegkok se'e: “Agkések sa' ko'o apkelyennaqte m'a Judá aptawán'ák neptámen, alwagkasek sa' teyp ma'a José aptawán'ák neptámen. Anaqlakxak sa' makham ma'a apkelókxa apagko' nak, hakte apyósekak ko'o sélányo m'a. Etnahagkokxak sa' makham ma'a ektémakxa axta maltaqnaweykegko axta chá'a ko'o, hakte ko'o sekteme Dios Wesse' apagkok, sekháxenmo nak chá'a m'a apkelmaxneyéyak.

⁷Máxa sẽlpextétamo sa' etnehek ma'a Efraín. Kapayhekxak sa' apwáxok, máxa sa' etnehek ma'a ektémól'a kapayhekxak egwáxok agyenek vino, kalpayhekxak sa' nahan apkelwáxok apkelwet'a enxoho m'a apketchek. ¡Kapayhekxak sa' apwáxok eñama m'a Wesse' egegkok!

⁸“Alwónmakha sa' ko'o m'a, keñe sa' wánchásekxa', hakte élwagkassek teyp. Exámekxohok apagko' sa' makham, ektéma axta m'a nanók axta.

⁹Éxpánchessegkek axta ko'o sélya'assama nepyeseksa m'a pók aptémakxa nak énxet'ák, megkeyxek sa' eyke nahan kalxénwók apkelwáxok ko'o, makhawók sa' eykhe katnehek apheykegkaxa, xama ekhem sa' elchexyók yetlo apketchek.

¹⁰Wának sa' elchexyók makham apkeleñama m'a Egipto, anaqlósawakxak sa' ma'a Asiria, anaqlakxak sa' ma'a Galaad tén han ma'a Líbano, megkawakxók sa' nahan apyókxoho m'a yókxexma nak, hakte apxámok sa' etnehek.

¹¹Alyeykhásekxak sa' ma'a wátsam ekwányam Egipto, atekpog sa' ko'o m'a yegmen nak. Eymaksohok agko' sa' yegmen ma'a wátsam Nilo. Amasséssesek sa' ektémakxa nak éleymáxkoho apkelwáxok ma'a énxet'ák Asiria. Amasséssesek sa' nahan ektémakxa nak apkelyennaqte m'a énxet'ák Egipto.

¹²Agkések sa' ko'o apkelyennaqte m'a, yetlo apkelxeyenma sekwesey sa' nahan elxog. Ekxénchek ko'o xa, sektáha nak Wesse'.”