Read Lengua Sur Zacarías 11 Bible Online

Zacarías 11 - Lengua Sur bible

Zacarías 11

¹¡Líbano, kalmeykesák atña'ák agkok, táxa sa' kalwatnek ma'a yámet cedro agkok!

²¡Yámet pino, kóllekxagwaha, hakte kelyaqnenágkek ma'a yámet cedro, kélmasséssekmek ma'a yámet élyawe éltaqmalma nak! ¡Kalxegha kélnénya'ák, kéxegke, yámet élyawe encina élaqnéyak nak Basán, hakte kélyaqnegkásegkek ma'a ekyentaxnakxa nak naxma!

³Meleyságkohok apkellekxagweyncha'a m'a keláneykha nepkések, hakte kéltawáseyha m'a pa'at ektaqmalma nak. Legáxcheyk ekyexwéweykha m'a yámakméwa, hakte kélmasséssekmek ekyentaxnakxa nak naxma m'a neyáwa Jordán.

⁴Keso aptáhakxa exchek seyáneya Dios Wesse' ahagkok se'e: “Elanha sa' nepkések apkelpagkanamap nak yaqwayam kólya'aksek aptekyómakxa.

⁵Elnápok aqsa chá'a meyke apkelsexnánémap ma'a ektáha nak chá'a apkelmá, keñe m'a ektáha nak chá'a apkexakha, etnehek chá'a s'e: ‘¡Ekméssek ekxeyenma ewáxok Wesse' egegkok, xámchek kaxwók aqsok ahagkok!’ Kawakxohok megkalmopyósa elanok ma'a ektáha nak chá'a apkeltaqmelchesso.

⁶Megkalepyósek sa' ko'óxa kaxwók alanok énxet apheykha nak se'e apchókxa nak, agkések sa' aqsa chá'a yaqwayam emok xama m'a pók nak, tén han yaqwayam emok chá'a m'a wesse' apwányam apagkok. Sa' emasséssók apchókxa xa, malwagkasek sa' nahan ko'o teyp apkelma enxoho chá'a m'a. Ko'o sekxeyenma xa, sektáha nak Wesse'.”

⁷Keñe axta ko'o séláneyncha'a m'a nepkések apkelpagkanamap axta yaqwayam kólya'aksek ma'a aptekyómakxa. Axta seyásenneykha m'a ektáha axta chá'a apkelmá. Élmeyk axta nahan ánet yámet: ekteméssessek axta nahan ekwesey xama “Ektaqmalma Negha”, keñe axta m'a mók nak sekteméssesa ekwesey “Negyepetcheykekxa Egmók”.

⁸Élántekkessek axta nahan apqántánxo keláneykha nepkések xama pelten, séleklágwayam axta ko'o apkeltémakxa tén han setaqnagko axta ko'o.

⁹Tén axta sektáha séláneya nepkések se'e: “¡Matnehek sa' chá'a ko'o kaxwók séltaqmelchesso kéxegke! ¡Peyk sa' agkok chá'a yetsapok kélxama, yetsapok sa' apagkok chá'a m'a! ¡Apmatñeyk sa' agkok chá'a kélxama, emátog sa' apagkok chá'a m'a! ¡Keñe sa' ma'a apkeleymomap nak, etwekxak sa' aqsa chá'a m'a pók nak!”

¹⁰Tén axta natámen sekmákxo m'a yámet ahagkok sekteméssessama axta ekwesey “Ektaqmalma Negha”, éntássek axta magkenatchesso ekmassesáxko m'a ekhémo mók nélpaqhetchásamáxkoho apkelánesso axta Dios ma'a ekyókxoho apheykegkaxa nak chá'a pók aptémakxa énxet'ák.

¹¹Cháxa ekhem ekmassésaxchexa axta m'a ekhémo mók nélpaqhetchásamáxkoho, keñe m'a apkelmá axta chá'a nepkések, séláneyncha'a axta ko'o, apkelya'ásegwokmo aptáha Wesse' egegkok ma'a appaqmeta nak eñama m'a ektáhakxa axta ko'o sélane aqsok.

¹²Tén axta sektáha séláneya s'e: “Leyawók sa' agkok kélwáxok, kólyánmagkas sa' ekyánmaga sektamheykha; sa' agkok kalchak kélwáxok, katnehek sa' agkok ma'a.” Tén axta segkésa treinta sawo' selyaqye élmope ekmomnáwa.

¹³Aptáhak axta seyáneya Wesse' egegkok se'e: “Elma sa' xa sawo' selyaqye, ketse' ekyánmaga nak ko'o sélpekkenchesso apkenagkama nak kayawak, exátawakxa sa' ma'a kélxátamakxa nak chá'a aqsok élmomnáwa apagkok ma'a tegma appagkanamap.” Élmeyk axta ko'o m'a treinta sawo selyaqye nak tén axta sekxátawákxo m'a kélxátamakxa nak chá'a aqsok élmomnáwa apagkok ma'a tegma appagkanamap.

¹⁴Tén axta séntáseykxo makham ma'a mók yámet, sekteméssessama axta ekwesey “Negyepetcheykekxa Egmók” tén axta ekmassegwokmo apyepetcheykekxa chá'a Judá énxet'ák ma'a énxet'ák Israel.

¹⁵Aptáhak axta seyáneya Wesse' egegkok se'e: “Exnésakpoho sa' kaxwo' keláneykha nepkések megkeytnakhassamo nak apwáxok apnaqtósso.

¹⁶Hakte apekkenek sa' ko'o xama keláneykha nepkések megkeytnakhassamo nak chá'a apwáxok nepkések apyetnakhágwayam apxega s'e apchókxa nak, mektemek sa' nahan chá'a m'a apxegányam nak, metaqmelchessásekxeyk sa' nahan chá'a m'a apyense nak, megyagkek sa' nahan chá'a apto m'a apkelyelqamap nak, etwok sa' eyke chá'a m'a ekmel'akxa agko' nak aphápetek, kawomhok sa' megyáyam ma'a apophék nak.

¹⁷¡Keláneykha nepkések mékoho laye, apkexakha nak aqsa chá'a m'a nepkések apnaqtósso! ¡Sókwenaqte sa' kayaqtennek apaktog, kawomhok sa' ma'a apaqtek ekpayho nak apkelya'assamakxa! ¡Ekyame apaktog sa' etnehek, meteyxma sa' nahan katnehek ma'a xama apaqtek!”