Read Lengua Sur Zacarías 4 Bible Online

Zacarías 4 - Lengua Sur bible

Zacarías 4

¹Apwa'akteyk axta makham ma'a Dios apchásenneykha sepaqhetchesa axta ko'o. Exátekhássa'akteyk axta, axta aptáhak ma'a ektémól'a kólxátekhaksek xama énxet apteyenma. Axta aptáhak sélmaxneyeyncha'a s'e:

²“¿Yaqsa apwet'a?” Tén axta ko'o sektáha seyátegmowágkokxo s'e: “Ekwet'ak ko'o xama cháléwasso ekyawe sawo ekyátekto ekmomnáwa, yetlo xama kélyátamakxa égmenek ekyetno m'a néten. Siete cháléwasso étkók nahan ekhéyak ma'a netno nak, siete nahan kélyetmeykegkaxa nak chá'a m'a égmen'ák.

³Keñe m'a ekpayhókxa nak ekyetnakxa m'a cháléwasso ekyawe, élaqna ánet olivo yámet; xama m'a ekpayho nak élya'assamakxa, xama nahan ma'a ekpayho nak násagqalwa.”

⁴Élmaxneyáha axta ko'o m'a Dios apchásenneykha ektáha axta sepaqhetchesso. Axta ektáhak se'e: “Wesse' ahagkok, ¿yaqsa aqsok xa ektéma nak?”

⁵Aptáhak axta Dios apchásenneykha seyátegmowágkokxo s'e: “¿Ya ey'ásegkok xép ekyetchesamaxkoho xa aqsok nak?” Tén axta sektáha seyáneya s'e: Wesse' ahagkok, may'ásegkok ko'o xa aqsok nak.

⁶Tén axta aptáha seyáneya s'e: “Keso Wesse' egegkok appeywa apcháphássesso m'a Zorobabel: ‘Nágyásenneykxa sẽlpextétamo, tén han apyennaqte, eyke m'a Espíritu ahagkok nak, axta aptáhak Wesse' egegkok ekha nak apyennaqte.

⁷¿Yaqsa exche' egkexe ekyawe? ¡Katnekxak sa' xe' xapop meyke élekhahéyak nápaqtók ma'a Zorobabel! Sa' elkok meteymog émha amonye' nak ma'a, neyseksa apteme apkelyennaqtéssamo apkelpeywa énxet'ák se'e: ¡Táse' nak la'a meteymog! ¡Tásók agko' nak la'a!’”

⁸Tén axta segkésa makham mók appeywa m'a Wesse' egegkok:

⁹“Apnegkenchásegkek apowhók ekyennaqtéssamakxa Zorobabel se'e exagkok nak. Sa' etnehek han appenchesso apkelane m'a.” Keñe sa' kólya'ásegwók kéxegke aptáha seyáphasso ko'o m'a Wesse' egegkok ekha nak apyennaqte.

¹⁰“Kalpayhekxak sa' kaxwók apkelwáxok apkelwet'a enxoho appenchesa aptamheykha Zorobabel ma'a metnéssesso axta naqsók ma'a sekxók axta eyeynókxa apkelane aptamheykha.” Tén axta aptáha makham Dios apchásenneykha s'e: “Cháxa siete cháléwasso étkók nak ekteme Wesse' egegkok apaqta'ák, eksawheykekxoho nak apkelányo s'e ekyókxoho nak keso náxop.”

¹¹Tén axta ko'o sektáha sélmaxneyeyncha'a s'e: “¿Yaqsa eyke ekyetchesamaxkoho xa ánet olivo yámet nak, émha nak chá'a xama nekha xa cháléwasso ekyawe nak?”

¹²Axta ektáhak nahan sélmaxneyeyncha'a s'e: “¿Yaqsa eyke ekyetchesamaxkoho nahan xa ánet olivo yámet axchakkok élaqnéyak nak nekha m'a élápogwatmakxa nak chá'a, élánamáxche nak sawo ekyátekto ekmomnáwa élmeyeykekxexa nak chá'a égmen'ák kalápogwatchesek ma'a cháléwasso?”

¹³Aptáhak axta Dios apchásenneykha seyátegmowágkokxo s'e: “¿Ya ey'ásegkok xép élyetchesamaxkoho xa?” “Ma', Wesse' ahagkok, may'ásegkok —axta ektáhak seyáneya.”

¹⁴Tén axta aptáha makham seyátegmowágkokxo s'e: “Cháxa apteme apqánet énxet apkelpagkanamap yaqwayam etnehek apkeltamheykha m'a aphakxa nak Wesse' egegkok apsawheykekxoho nak ekyókxoho keso náxop.”