Read Lengua Sur Zacarías 6 Bible Online

Zacarías 6 - Lengua Sur bible

Zacarías 6

¹Ekwet'ak axta makham mók aqsok sélxekmósso. Ekwet'ak axta élyaphagwa'a cuatro yátnáxeg apyenyawasso neyseksa m'a ánet meteymog élámha, sawo ekyexwase axta nahan ma'a meteymog élámha nak.

²Yátnáxeg apkelyexwase axta nahan apyenyawasso m'a émha amonye' nak; keñe axta apkelpésyam ma'a ektétéyak nak;

³keñe axta apkelmope m'a ektáhakxa nak ántánxo yátnáxeg apyenyawasso; keñe axta m'a ektáhakxa nak cuatro yátnáxeg apyenyawasso, ektáha m'a yátnáxeg apkelmópeykha.

⁴Élmaxneyáha axta m'a Dios apchásenneykha ektáha axta sepaqhetchesso. Axta ektáhak se'e: “Wesse' ahagkok, ¿yaqsa ekyetchesamaxkoho xa aqsok nak?”

⁵Aptáhak axta seyátegmowágkokxo Dios apchásenneykha s'e: “Cháxa ekteme cuatro éleñamakxa nak éxchahayam xa, élánteyapma nak chá'a m'a aphakxa nak Wesse' egegkok apsawheykekxoho nak ekyókxoho keso náxop.

⁶Yátnáxeg apyenyawasso, apyenyawasso nak yátnáxeg apkelpésyam, cha'a ekmahéyak ma'a apchókxa ekpayho nak nexcheyha; keñe m'a yátnáxeg apyenyawasso, apyenyawasso nak yátnáxeg apkelmope, cha'a ekmahéyak ma'a apchókxa ekpayho nak taxnegwánxa ekhem; keñe m'a yátnáxeg apyenyawasso, apyenyawasso nak yátnáxeg apkelmópeykha, cha'a ekmahéyak ma'a apchókxa ekpayho nak nepyeyam.”

⁷Apkelántekkek axta m'a yátnáxeg apkelmópeykha, axta elánegwokmok apkelyáqto élpekhésa elweynchamha ekyókxoho keso xapop. Aptáhak axta apkeláneya Dios apchásenneykha s'e: “Kólweynchamha sa' ekyókxoho keso náxop.” Yetlókok axta nahan apkelxega apkelweynchámeyncha'a.

⁸Ewóneyha axta nahan ko'o Dios apchásenneykha natámen xa, aptáhak axta seyáneya s'e: “¡Elano, cham'a apkelmahéyak nak apkelókxa ekpayho nak nexcheyha, emasséssessók sa' aplo Wesse' egegkok ma'a apchókxa nak!”

⁹Egkéssek axta ko'o Wesse' egegkok se'e appeywa nak. Aptáhak axta s'e:

¹⁰“Eyekhamha sa' aqsok nepyeseksa m'a énxet'ák kélántekkesso axta, cham'a apkelweykta nak makham apkelenyeykta m'a Babilonia: cham'a Heldai, Tobías tén han ma'a Jedaías. Emyekxa sa' nahan Josías apxagkok xa ekhem nak, cham'a Sofonías apketche nak.

¹¹Elanák sa' kélatchesso kélpátek ma'a sawo ekmope ekmomnáwa tén han ma'a sawo ekyátekto ekmomnáwa apcháncheseykha enxoho, yetchesses sa' nahan xama apqátek ma'a apkemha apmonye' nak apkelmaxnéssesso Dios énxet'ák apagkok Josué, Josadac apketche nak.

¹²Keñe sa' etnehek yának se'e: ‘Apxénchek Wesse' egegkok ekha nak apyennaqte énxet apwesey nak Kaxwe Aptépeykekxa yenyék makham etépekxak ma'a apkeñémekxa axta, tén han exátekhásekxak makham ma'a Wesse' egegkok tegma appagkanamap apagkok.

¹³Exátekhásekxak sa' makham ma'a Wesse' egegkok tegma appagkanamap apagkok, kólteméssesek sa' ma'a kélteméssessamól'a kóláwhok xama wesse' apwányam. Exek sa' néten aptaháno ektaqmalma elanha m'a apchókxa, keñe sa' apkelmaxnéssesso Dios énxet'ák apagkok exek ma'a nekha nak aptaháno ektaqmalma, méko sa' nahan katnehek ektáhakxa apkelwáxok neyseksa apheykxa xamók pók xa apqánet nak.

¹⁴Keñe sa' ma'a kélatchesso kélpátek éltaqmalma nak, katnehek sa' ekxénweykekxoho chá'a kélwáxok, kaxnagkokxak sa' ma'a kañe' nak Wesse' egegkok tegma appagkanamap apagkok, megkólwagqayam chá'a m'a Heldai, Tobías, Jedaías tén han ma'a Josías, Sofonías apketche nak.’”

¹⁵Makhawók sa' eleñék énxet elwa', yaqwayam epásegwak apxátekháseykekxa m'a Wesse' egegkok tegma appagkanamap apagkok; keñe sa' kólya'ásegwók kéxegke aptáha ko'o seyáphasso m'a Wesse' egegkok ekha nak apyennaqte. Sa' eyke katnehek kélleg'a sa' kéxegke Dios Wesse' kélagkok appeywa xa tén han kélyahákxoho sa'.