Read Lengua Sur Zacarías 9 Bible Online

Zacarías 9 - Lengua Sur bible

Zacarías 9

¹ Keso appeywa apkeltennasa axta Wesse' egegkok énxet'ák apheykha nak yókxexma Hadrac tén han tegma apwányam Damasco yaqwánxa katnehek kéllegassáseykegkoho s'e: “Wesse' egegkok apagkok ma'a tegma apkelyawe nak Siria, ekhawo nahan ma'a apyókxoho pók aptémakxa nak chá'a énxet'ák Israel.

²Apagkok nahan ma'a Hamat, apyetnama nak ketók xa tegma apkelyawe nak, tén han ma'a Tiro, Sidón yetlo m'a ektémakxa nak apmopwancha'a aqsok.

³Apkeláneykegkek meteymog élyennaqte kélhaxtegkesso nepyáwa tegma m'a énxet'ák Tiro, apcháncheseykekxeyk nahan ma'a sawo ekyátekto élmomnáwa tén han ma'a sawo élmope ekmomnáwa ektémól'a aganchásekxak ma'a yelpa'.

⁴Wesse' egegkok sa' eyke elyementamok ekyókxoho xa, ekxakkassók sa' kañe' wátsam ekwányam ma'a aqsok apagkok ekxámokma nak, ewatnekxak sa' nahan apyókxoho m'a tegma apwányam.

⁵“Apkelwet'ak sa' agkok énxet'ák apheykha nak tegma apwányam Ascalón xa, elyegwáwhok apagko' sa'. Elpexyawha sa' nahan náxop ellegagkohok ekyawe agko' ma'a énxet'ák Gaza, kamassegwók sa' apkelhaxanma nak ma'a énxet'ák Ecrón. ¡Meyke wesse' apwányam apagkok sa' etnehek ma'a tegma apwányam Gaza, meyke énxet sa' etnehek apheykha m'a kañe' tegma apwányam Ascalón!

⁶Keñe sa' ma'a Asdod exmakha chá'a apkelpaxqamap énxet, keñe sa' ko'o atnessásekxak mékoho ektémakxa nak apkeleymákpoho m'a filisteos.

⁷Alhexyawássesek sa' apatña'ák ma'a ápetek apteykegko nak yetlo éma, tén han élmasqapma nak apma'ák ma'a nento ekmeyamáxkoho nak antók. Yetneyk sa' eyke chá'a pók xam'a apkeleymomap yaqwayam atnehek ko'o ahagkok xa énxet'ák nak; Judá énxet'ák sa' nahan etnahagkok, keñe sa' ma'a énxet'ák Ecrón etnahagkok máxa jebuseos.

⁸Alanha sa' eyke chá'a ko'o yaqwayam almeyók ma'a ektáha nak chá'a ahagkok, waksek ma'a apyókxoho ektáha nak chá'a apkelyeykhágwe s'e. Kamaskok sa' enaqtawasagkohok kaxwók ma'a ektáha nak chá'a apnaqtawáseykegkoho, hakte ko'o ahagko' kaxwók séláneykha m'a.”

⁹¡Kapayhekxoho agko' apwáxok xép, tegma apwányam Sión! ¡Enneykmés kapayhekxak apwáxok, xép tegma apwányam Jerusalén! Apya'aweykteyk xép, Wesse' apwányam apagkok Wesse' appéwomo, tén han segwagkassamo teyp, háwe eyke eyeymáxkoho apwáxok, yámelyeheykok apchánte, yámelyeheykok étkok.

¹⁰Sa' emasséssessók yátnáxeg apkelyenyawasso apagkok nak ma'a Efraín, tén han yátnáxeg nak ma'a Jerusalén, tén han ma'a yágke kélmeykha nak chá'a kempakhakma. Eltennasagkok sa' yaqwayam katnehek meyke ektáhakxa apheykha m'a apyókxoho pók aptémakxa nak énxet'ák, kawomhok sa' apteme aptaqmelchesso m'a ekyókxoho wátsam ekwányam, eyeynamo m'a Éufrates ekweykmoho m'a néxa xapop nak keso náxop.

¹¹Keso aptáhakxa nak appeywa Wesse' egegkok se'e: “Jerusalén, alántekkesek sa' ko'o kañe' máxek meyke nak yegmen ma'a énxet'ák kélagkok kélxata axta kañe', eñama m'a éma kélteméssesso axta ekmámnaqsoho agko' ekhémo mók nélpaqhetchásamáxkoho.

¹²Kéxegke, kélmomaxche nak, megkólwatésseyam nak kélhaxanma yaqwayam kólmeyekxak makham ma'a kélxagkok apyennaqte. ¡Kólchexyem makham! Éltennássek ko'o peya ayeykhássamhok sekmeyáseykekxa ektaqmalma kélheykha m'a ekwánxa axta kéllegeykegkoho.

¹³Eyeykessek ko'o axát'ák yágke ahagkok sénchesso nak kempakhakma. Judá xa. Ekpekkenchessek nahan xama aktek. Efraín xa. Keñe sa' xép tegma apwányam Sión atnéssesek xama sókwenaqte, wanmexchesek sa' ko'o exchep apketchek ma'a apketchek nak énxet'ák Grecia.”

¹⁴Exekmósakpohok sa' Wesse' egegkok nepyeseksa m'a énxet'ák apagkok; máxa takha' apkelyenma sa' etnéssesek yágke aktek apagkok elyáta'. Epáwaksek sa' apchaqkahasso m'a Dios Wesse' egegkok, keñe sa' exog neyseksa éxchahayam ekyennaqte agko' eñama nak nepyeyam.

¹⁵Elmeyók sa' Wesse' ekha nak apyennaqte m'a ektáha nak chá'a apagkok. Sa' elteyagkásekxak han chá'a meteymog apagkok apkelmeykha nak chá'a mélwakto xa énxet'ák nak. Sa' emasséssók han ekmanyehe agko' ma'a apkelenmexma nak; máxa vino negyà sa' etnéssesek énagkok ma'a éma apagkok, máxa egheykok éllánéyak la'a aqsok égmenek sa' etnahagkok kallanagkok apwokma'ák. Máxa sa' etnahagkok ma'a ektémól'a kólexpaqheykha nekhaw'ék élmahamtakcha'a m'a ekwatnamáxchexa nak chá'a aqsok.

¹⁶Cháxa ekhem yaqwánxa sa' elwagkasek teyp énxet'ák apagkok ma'a Dios Wesse' kélagkok, aptémól'a kólwagkasek teyp ma'a nepkések, kalyenmok sa' ektáha nak apagkok ma'a apchókxa apagko' nak, ektémól'a meteymog éltaqmalmal'a élyenma m'a xama kélháxaqxo.

¹⁷¡Tásók agko' sa' katnehek ma'a negókxa! Tásek sa' katnehek apkektega m'a wokma'ák egagkok tén han ma'a kelán'a étkók, hakte katawagkok sa' ma'a hótáhap apaktek keynagkok sa' nahan ma'a vino.