Read Lengua Sur Deuteronomio 10 Bible Online

Deuteronomio 10 - Lengua Sur bible

Deuteronomio 10

¹“Tén axta Wesse' egegkok aptéma seyenagkama s'e: ‘Elyaqtennoho sa' apagko' xeyep ánet meteymog élpayhe ekhémo m'a émha amonye' axta, elanés sa' nahan xama axagkok yántéseksek, tén sa' yántek ma'a néten egkexe yaqwayam sa' hélpaqhetchesakpohok ko'o.

²Anaqtáxésagkok sa' ko'o ekhawo ektémakxa axta ekpeywa eknaqtáxésamaxche émha amonye' axta xa meteymog nak, cham'a apkelpaxqáteykekxo axta exchep, keñe sa' exatmok ma'a kañe' yántéseksek axagkok nak.’

³“Éláneyak axta ko'o xama yántéseksek, apkeñama nak yámet wantep, keñe sélyaqténma nahan ánet meteymog élpayhe, élsamchek axta nahan seyántama m'a néten egkexe.

⁴Tén axta Wesse' egegkok apnaqtáxéssama Diez apkeltémókxa nak antéhek ma'a meteymog nak, ekhawo apteméssessamakxa axta m'a émha amonye' axta, apkeltennassama axta kéxegke m'a néten egkexe, neyseksa táxa eyáléwe, negaqneykekxo axta negyókxoho. Elméssegkek axta,

⁵tén axta sekteyapma ko'o m'a néten egkexe nak; ekxatamchek axta kañe' yántéseksek ma'a meteymog élpayhe nak, ekhawo m'a apkeltémókxa axta atnehek ma'a Wesse' egegkok, hágkek makham ma'a kañe' nak.”

⁶(Apkelánteyepmeyk axta israelitas ma'a Beerot-bené-jaacán, apkelmeyeykekxeyk axta m'a yókxexma Moserá. Axta apketsapweykmok nahan Aarón ma'a, kélátawanyegkek axta nahan ma'a, apyaqmagkassegkek axta apteme apkelmaxnéssesso Dios énxet'ák apagkok ma'a apketche Eleazar.

⁷Apkelántépeykekxeyk axta makham ma'a, apkelmeyeykekxo m'a Gudgoda, tén axta apkelántépeykekxo makham ma'a Gudgoda nak apkelmeyeykekxo m'a Jotbata, yókxexma ekyetnamakxa axta ekyawe m'a yegmen.

⁸Cháxa apkelyéseykegkaxa axta nahan Wesse' egegkok Leví énxet'ák apagkok yaqwayam eswok chá'a m'a yántéseksek ekhémo mók nélpaqhetchásamáxkoho apagkok nak Wesse' egegkok, tén han yaqwayam exnakha chá'a nápaqto', tén han elpeykesho' tén han elmaxnéssesek chá'a yetlo apxeyenma apwesey, ekhawo aptamheykegkaxa nak makham se'e negwánxa nak.

⁹Cháxa keñamak melxaweykegko nak xapop apagkok levitas nepyeseksa m'a apkelyáxeg'a tén han ma'a aqsok yaqwayam nak elxewekxa', hakte cha'a ekpayhémo yaqwayam chá'a elanha m'a Wesse' egegkok, ekhawo m'a apxeyenma axta m'a Wesse' egegkok.)

¹⁰“Ekhegkek axta ko'o cuarenta ekhem tén han cuarenta axta'a m'a egkexe nak, hawók axta sektémakxa m'a sekxók axta, eháxenmók axta ko'o makham ma'a Wesse' egegkok, axta emáheyók emasséssók kéxegke,

¹¹axta aqsa aptemék seyenagkama s'e: ‘Exeg, elánekxa sa' aptáhakxa yaqwayam exog apmonye'e m'a énxet'ák, yaqwayam sa' kólxog, kólmok ma'a apchókxa séltennassama axta ko'o agkések ma'a kélyapmeyk nanók axta.’

¹²“Israelitas, ¿Yaqsa apkeltamho kaxwók kóllának kéxegke m'a Dios Wesse' kélagkok? Wánxa aqsa apkeltamho kólyahakxoho' tén han kólyetlók kélyókxoho m'a ámay apagkok; tén han kólásekhoho', tén han kólpeykeshok ekweykmoho kañók agko' kélwáxok tén han ma'a élchetámeykegkaxa nak kélwáxok,

¹³tén han kóllanagkok chá'a m'a apkeltémókxa nak chá'a antéhek, tén han ma'a segánamakxa apagkok nak, yaqwayam enxoho kataqmelek chá'a kélheykha.

¹⁴Kólya'asagkoho chá'a Dios Wesse' kélagkok apteme apagkok ma'a néten tén han ma'a netnók agko' nak ma'a néten, tén han keso náxop tén han ma'a ekyókxoho aqsok ekhéyak nak awáxok.

¹⁵Awanhók agko' axta eyke apmopmenyého Wesse' egegkok ma'a kélyapmeyk nano' axta kéxegke, apkelásekhayók axta nahan, tén axta natámen apkelyéseykencha'a nahan ma'a aptawán'ák neptámen nak, kéxegke m'a, nepyeseksa m'a apyókxoho pók aptémakxa nak énxet'ák, ekhawo negwet'a nak makham se'e negwánxa nak.

¹⁶“Kólpekken kélwáxok ma'a kélqahasso nak ekhémo mók nélpaqhetchásamáxkoho, nágkóllenxanmagkoho kélteme élyennaqte kélwáxok,

¹⁷hakte cham'a Dios Wesse' kélagkok nak kéxegke apteme Dios Wesse' agkok ma'a ekyókxoho aqsok kéláyókxa nak tén han apteme Wesse' apagkok ma'a apyókxoho kelwesse'e apkelwányam nak keso náxop; apteme nahan Dios apwányam apagko', ekha apyennaqte tén han mageysso agè', metnéssesso nak han apyeykhamap pók elanok énxet tén han memà nak exkak ma'a aqsok kélmésso naqsa yaqwayam mexének ektemegweykmohoxma;

¹⁸apkelánekxéssamo nak han chá'a amya'a m'a élyeheykha nak tén han ma'a xentampe'e nak, apkelásekhayo nak han chá'a m'a énxet'ák apkeleñama nak mók apkelókxa apheykha nak kélnepyeseksa kéxegke, apkelmeyáseykegkoho nak chá'a m'a aptéyák tén han ma'a apkelántaxno.

¹⁹Kólásekhoho nahan chá'a kéxegkáxa m'a énxet'ák apkeleñama nak mók apkelókxa, hakte kéxegke axta nahan kélteme kéleñama mók apkelókxa m'a kélheykegkaxa axta Egipto.

²⁰“Kólyahakxoho chá'a Dios Wesse' kélagkok, kólpeykesho nahan chá'a wánxa m'a; nágkólyensem kélyetleykha, peyk sa' agkok chá'a kóltéméssesek ekmámnaqsoho kélpeywa, kóllána chá'a yetlo kélxeyenma m'a apwesey.

²¹Hakte cham'a yaqwayam kólteméssesek chá'a kéxegke apcheymákpoho m'a; cham'a Dios kélagkok ma'a, apkelánéssama axta chá'a kéxegke m'a aqsok ekyawe nak tén han ma'a sempelakkasso nak agweta' kélweteya axta kéxegke.

²²Setenta axta nahan apyókxoho kélyapmeyk nanók kéxegke sekxók apkelweykmo m'a Egipto, keñe keso kaxwo nak apxámáseykxo m'a Dios Wesse' kélagkok, aphéseykekxók ma'a apweykenxal'a apxámokma yaw'a m'a néten.