Read Lengua Sur Deuteronomio 14 Bible Online

Deuteronomio 14 - Lengua Sur bible

Deuteronomio 14

¹“Kéxegke kélteme apketchek ma'a Dios Wesse' kélagkok. Nágkólpexyekhasha aqsa kélyókxa, nágkólmopaksoho aqsa kélyese ekpayhakxa kélnát apketsapa enxoho kélxama.

²Hakte kéxegke kélteme énxet'ák apkelpagkanma m'a Dios Wesse' kélagkok; axta apkelyéseykha nepyeseksa apyókxoho énxet'ák nak keso náxop yaqwayam kóltéhek énxet'ák apagkok apagko'.

³“Nágkóltow chá'a xama enxoho m'a aqsok ekmanyása mantamakxa nak.

⁴“Keso aqsok kélnaqtósso kélmowána nak chá'a kéxegke kóltók se'e: weyke kelennay'a, nepkések apketkók tén han yát'ay apketkók,

⁵xenaq, yátapopyet, laneyp, popyet apkelleykha nak naxma, tén han ma'a pók aptémakxa nak chá'a m'a yátapopyet apkelyawe nak.

⁶Kélwanchek kóltók ekyókxoho aqsok nawha'ák ektaqhésseykmoho nak chá'a ayespok ekto, énnayha nak chá'a neyseksa aphék, ánet nak chá'a aphék,

⁷eyke megkeyméxchek kóltók se'e aqsok kélnaqtósso nak, éltaqhésseyam ayespok ektéyak eykhe nahan ma'a tén han énnayha neyseksa aphék: “Yányátnáxeg, tómhag tén han ma'a sógkog; kéméxcheyk kólteméssesek chá'a aqsok nawha'ák élmanyása xa, kaltaqhéssamhok eykhe nahan chá'a ayespa'ák ektéyak xa, méko eyke m'a énnayhakxa nak chá'a neyseksa aphék.

⁸“Tén han ma'a yátapomap, naqso' eykhe énnayha neyseksa apophék ma'a, háwe eyke m'a aptaqhésseykmoho nak chá'a apyespok apto. Kéméxcheyk chá'a kólteméssesek aqsok ekmanyása xa. Nágkóltow chá'a aphápetek xa aqsok nak, nágkólpaknegwomho nahan chá'a m'a aphápak nak.

⁹“Keñe m'a aqsok élleykha nak neygmen kélwanchek kóltók ma'a ekha nak amék étkók tén han ma'a émpe'ék,

¹⁰eyke nágkóltow ma'a meyke nak amék étkók tén han ma'a émpe'ék; kéméxcheyk kólteméssesek chá'a aqsok élmanyása xa.

¹¹“Kélwanchek chá'a kóltók ekyókxoho náta nentamakxa nak chá'a,

¹²yetneyk eyke nahan chá'a mók xam'a m'a megkólmowána nak chá'a kóltók, ekhawo nak ma'a: méwá, máma apwenaqte, yátének,

¹³akpog apmenek, tén han ma'a ekyókxoho mók ektémakxa nak chá'a m'a náta meyke ahekhek,

¹⁴tén han ma'a mók ektémakxa nak chá'a kágqag,

¹⁵xápen, tén han sawe, tótow, tén han ma'a mók ektémakxa nak chá'a cháwok

¹⁶tén han sepekhék, yányáho, yátametekteg,

¹⁷apho metekteg, tén han máma tén han ma'a yáménáteg,

¹⁸seyána', saqpa'ay, tén han ma'a mépop.

¹⁹“Ekyókxoho askok ekha nak chá'a axempenák, élmanyása sa' chá'a kólteméssesek. Megkóltewek sa'.

²⁰Sa' eyke m'a náta élxénamaxkoho nak chá'a nentamakxa', kélwanchek sa' kóltók.

²¹“Nágkóltow chá'a xama enxoho m'a aqsok nawhak étsapma naqsa nak chá'a, hakte kéxegke kélteme énxet'ák apkelpagkanma m'a Dios Wesse' kélagkok; sa' eyke kélwanchek chá'a kólmések ma'a énxet apkeñama nak mók apkelókxa apha nak chá'a kañe' tegma apkelyawe kélagkok kéxegke; sa' eyke apwanchek etwok ma'a. Kélwanchek nahan kólmések ekha ekyánmaga m'a énxet apkeñama nak mók apkelókxa apwe enxoho yaqwatakxoho m'a kélheykegkaxa. “Nágkólhanchásekxa chá'a yát'ay apketkok egken neme apyegmenek apagkok.

²²“Kólyetnakhaksek sa' chá'a kéxegke ekyókxoho aqsok aktek ekyexna kélcheneykekxa kélnakxo ekwayam nak chá'a diez ekyókxoho, yókxoho apyeyam meyke kélyeykhasso.

²³Kóltawagkok sa' chá'a kéxegke nápaqtók Dios Wesse' kélagkok cham'a yókxexma apkelyéságkaxa sa' yaqwánxa katnehek ekyetnamakxa apwesey, cháxa ekwayam nak chá'a diez ma'a hótáhap apaktek kélagkok tén han ma'a vino tén han ma'a pexmok égmenek nak, tén han ekpalleyam amonye'e nak chá'a étkók ma'a weyke kélnaqtósso tén han ma'a nepkések, yaqwayam sa' kaltámeyagkok chá'a kéláyo m'a Wesse' egegkok.

²⁴Apméssek sa' agkok ektaqmalma kélheykha m'a Wesse' egegkok, tayépek sa' agkok chá'a kélheykegkaxa kéxegke yaqwayam kólsakxak aqsok kélagkok ekwayam nak chá'a diez ekyókxoho m'a apkelyéságkaxa sa' ekyetnamakxa apwesey m'a Wesse' egegkok,

²⁵kólchexeykxak sa' chá'a ekha ekyánmaga m'a aqsok kélagkok nak, keñe sa' ma'a selyaqye nak ekyánmaga aqsok kélchexakha, kólsakxak chá'a m'a apkelyéságkaxa sa' ma'a Wesse' egegkok.

²⁶Sa' nahan chá'a kólmaha kóltegyek ekxénakxa enxoho chá'a kélwáxok kóltegyágwók aqsok xa selyaqye nak: cham'a wey, nepkések, vino essenhan ma'a mók ektémakxa nak chá'a anmen kéltahakkasso; cham'a kélámenyéxa enxoho chá'a kéxegke, sa' kóltawagkok nahan nápaqtók Dios Wesse' kélagkok ma'a, kóllanagkok sa' kélessawássessamo yetlo m'a kélnámakkok.

²⁷“Eyke kólpásem sa' chá'a m'a levitas, apheykha nak chá'a kélheykegkaxa kéxegke, hakte melxaweykegkok xapop apagkok apagko' ma'a, ektéma nak kéxegke ekha xapop kélagkok.

²⁸“Apyókxoho apqántánxo apyeyam sa' chá'a kéxegke kólyetnakhaksek ekwayam nak chá'a diez aqsok kélcheneykekxa kélnakxo xama apyeyam, tén han kólxatmok chá'a m'a tegma apwányam kélagkok,

²⁹yaqwayam sa' etawagkok ekwokmoho apkelyaqkanakmo apkelwa'akto enxoho m'a levitas, melxaweykegko nak xapop apagkok apagko', essenhan ma'a énxet'ák apkeleñama nak mók apkelókxa apheykha nak chá'a kélnepyeseksa kéxegke, essenhan ma'a élyeheykha nak tén han ma'a xentampe'e nak. Keñe sa' Dios Wesse' kélagkok egkések chá'a ektaqmalma ekteyapma m'a ekyókxoho aqsok kéllanakxa enxoho chá'a.