Read Lengua Sur Deuteronomio 18 Bible Online

Deuteronomio 18 - Lengua Sur bible

Deuteronomio 18

¹“Megkaxek sa' chá'a xapop apagkok ma'a apkelmaxnéssesso nak Dios énxet'ák apagkok levitas, cham'a apyókxoho nak Leví énxet'ák apagkok, ektéma nak ma'a nápakha nak israelitas. Sa' aqsa kapasmok chá'a m'a aqsok ektekyawa kélmésso nak chá'a m'a Wesse' egegkok, tén han ma'a aqsok ekpayhémo nak chá'a kéltaqmelchessesso m'a Wesse' egegkok.

²Melxawagkehek sa' chá'a xapop apagkok ektéma nak chá'a m'a apchókxa xamo' nak, hakte cha'a ekpayhémo yaqwayam elxewekxak ma'a Wesse' egegkok, ekhawo m'a aptémakxa axta chá'a apkeltennassama.

³“Keso aqsok ekpayhémo nak chá'a yaqwayam elxawagkok apkelmaxnéssesso Dios énxet'ák apagkok ektekyawa nak chá'a weyke kelennay'a tén han nepkések apketkók apkelmésso nak chá'a énxet'ák: apettek, amáxempenák tén han ma'a nówokmo',

⁴tén han ma'a apkemha apmonye' apyexna nak ma'a hótáhap apaktek, tén han ma'a vino, pexmok égmenek, tén han ma'a émha amonye' kélyéseséyak nak apwa' m'a nepkések;

⁵hakte Dios Wesse' kélagkok apkelyéseykha xa énxet'ák nak, nepyeseksa m'a apyókxoho pók aptémakxa nak chá'a énxet'ák, yaqwayam enxoho etnahagkok chá'a apkeltamheykha apkelpeykessamo Wesse' egegkok meyke néxa eyeynamo sekxók ma'a apyapmeyk nak ekweykekxoho m'a apketchek.

⁶“Yetneyk sa' agkok xama levita ekpekheykegkoho agko' apwáxok emyógmak ma'a yókxexma apkelyéseykegkaxa nak Wesse' egegkok ekyetnamakxa m'a apwesey, cham'a apheykha nak chá'a mók xam'a kélheykegkaxa kéxegke, ekyókxoho nak ma'a kañe' Israel,

⁷apwanchek sa' chá'a etneykha m'a ektémakxa nak chá'a aptamheykha m'a apkelmaxnéssesso Dios énxet'ák apagkok eñama m'a Wesse' egegkok, ekhawo nak ma'a apyókxoho apkelxegexma'a aptémo xamo' nak levitas, apkeltemessáseykha nak chá'a Wesse' egegkok ma'a,

⁸kaxhok sa' nahan chá'a apxawe apto m'a ekweykenxa nak chá'a apkelxawéyak ma'a apkelxegexma nak, keñe sa' nahan ma'a appekkencháseykekxa nak chá'a apyáp ekpayhémo nak chá'a yaqwayam egkeyásekxa'.

⁹“Kélántaxneyk sa' agkok kéxegke m'a apchókxa apmáheyókxa nak egkések ma'a Dios Wesse' kélagkok, nágkóleykmasha aqsa aptamheykegkaxa élmasagcha'a nak ma'a énxet'ák nak.

¹⁰Nágkólaqhekxa aqsa kéxegke kélketche kélxama enxoho kólpekkenek ma'a neyseksa táxa, nágkóltamhák nahan kélya'áseykegkoho m'a aqsok ekpowásamáxche nak chá'a, nágkólamenyého nahan kóltéhek kélxeyenma yaqwánxa katnehek egmonye', nágkóltamhák nahan kélyohóxma,

¹¹tén han kélónma nak chá'a kélmók kólhekxak aqsok ekmaso, nágkólpaqhetchesaxkoho nahan chá'a m'a énxet'ák ekha nak chá'a apmopwancha'a apkelwóneykha nak chá'a kélhagák, apkelpaqhetchásamákpoho nak chá'a m'a apkeletsapma nak.

¹²Hakte megkalchek agko' apwáxok Wesse' egegkok elanok énxet apkelane nak chá'a xa ektéma nak aqsok. Apkelántekkessek kélmonye'e kéxegke Dios Wesse' kélagkok xa énxet'ák nak, eñama apkeltémakxa élmasagcha'a.

¹³Kéxegke eyke kéméxcheyk kóltéhek ekpéwomo kéltémakxa nápaqtók Dios.

¹⁴Cham'a énxet'ák nak, peya nak kéxegke kóltéhek kélagkok ma'a xapop apagkok, elyahakxohok chá'a m'a énxet'ák apkelmopmenyého nak chá'a elxének yaqwánxa katnehek egmonye', tén han ma'a énxet'ák ekha nak apmopwancha'a, kéxegke eyke, megyohok kóllának Dios Wesse' kélagkok xa ekhawo nak aqsok.

¹⁵“Wesse' egegkok sa' etekkesek kélnepyeseksa kéxegke xama Dios appeywa aplegasso sekhawo nak ko'o, kólyahakxoho sa' nahan.

¹⁶Cháxa kélmaxnagkama axta kéxegke Dios Wesse' kélagkok kélaqneykekxo axta kélyókxoho m'a egkexe Horeb nak, kéltéma axta s'e: ‘Mogmenyek negko'o makham anlegekxohok appeywa m'a Dios Wesse' egegkok, tén han agwetekxak makham ma'a táxa ekyawe agko' nak, yaqwayam enxoho móletsepe'.’

¹⁷Tén axta ko'o aptéma seyenagkama Wesse' egegkok se'e: ‘Tásek xa aptamhágkaxa nak apkelpeywa.

¹⁸Atekkesek sa' ko'o xama aplegasso sekpeywa nepyeseksa xa énxet'ák nak, aphawo nak xép, ektáha nak xama apchókxa xamo' xa énxet'ák nak, apkeltennáséyak nak chá'a m'a séltamhókxa enxoho chá'a ko'o eltennassagkok, apkeláneykekxoho nak chá'a apkeltennáséyak ma'a séltamhókxa enxoho chá'a ko'o etnahagkok.

¹⁹Apyókxoho énxet melyaheykekxa enxoho aptáhakxa aplegasso sekwesey xa énxet aplegasso nak sekpeywa, añássessagkohok sa' ko'o.

²⁰Keñe sa' ma'a aplegasso nak chá'a sekpeywa, apxeyenma nak chá'a apseykha sekwesey, apxeyenma nak chá'a m'a aqsok megkatnaha nak chá'a ko'o séltémo exének, essenhan apxeyenma nak chá'a m'a mók kéláyókxa nak, yáneykpok sa' ematñekxa'.’

²¹Temék sa' agkok kéxegke élchetamso kélwáxok se'e: ‘¿Háxko antéhek agya'asagkohok aptáhakxa apxeyenma megkatnaha Wesse' egegkok appeywa xa?’, kéméxcheyk kólya'asagkohok kéxegke s'e:

²²Agkok katnahak aptáhakxa apxeyenma Wesse' egegkok apwesey m'a aplegasso nak Dios appeywa, cháxa magkenatchesso megkatnaha apkeltémo exének ma'a Wesse' egegkok, apxénamakpekxoho apagko' eyke aptémakxa eyeymáxkoho apwáxok xa seykha amya'a nak; nágkóle aqsa.