Read Lengua Sur Deuteronomio 21 Bible Online

Deuteronomio 21 - Lengua Sur bible

Deuteronomio 21

¹“Wetáxcheyk sa' agkok xama énxet aphápak apmatñà m'a yókxexma apmáheyókxa nak egkések Dios Wesse' kélagkok yaqwayam kóltéhek kélagkok kélagko', meyke kélya'áseykegkoho ektáha eyaqhe,

²elyetsetagkok sa' ekwánxa enxoho ekyetnakxa kélhápak tén han eyágketexa enxoho tegma apwányam ma'a apkelámha apmonye'e nak tén han ma'a énxet'ák segyekpelchémo.

³Keñe sa' ma'a apkelámha apmonye'e nak tegma apwányam eyágketexa enxoho, éntemegmak sa' xama weyke étkok kelwána, megkólmésso nak makham ektamheykha,

⁴ey'aksek sa' ma'a ényahamakxa nak yegmen megkeymáyekxa nak chá'a, megkólpeyncheyemxa nak makham xama enxoho m'a xapop, melkócheneykekxexa nak makham ma'a aqsok. Sa' yentássesek nahan ayespok ma'a.

⁵“Keñe sa' elya'áwak ma'a apkelmaxnéssesso Dios énxet'ák apagkok levitas, hakte axta apkelyéseykha Wesse' egegkok yaqwayam etnehek chá'a apkeltamheykha apkelánéyak apkelpeykessamo Wesse' egegkok ma'a tén han apkelmaxnéssesso chá'a yetlo apxeyenma m'a Wesse' egegkok apwesey yaqwayam kataqmelek chá'a apheykha. Sa' etnehek nahan chá'a apkelxeyenma yaqwayam kamasséssaxchek ekyókxoho apkelátegmómap nak chá'a énxet ma'a tén han élnápomáxche nak chá'a apkelpaqmeyesma.

⁶Elyenyesagkok sa' apmék ekpayhókxa ekyetnakxa weyke étkok ápak m'a apyókxoho apkelámha apmonye'e nak tegma apwányam,

⁷keñe sa' etnehek elpaqmétek se'e: ‘Háwe negko'o negaqhe s'e énxet nak, magwetágkok nahan ektáhakxa apmatñà.

⁸Wesse', elásekhekxoho énxet'ák apagkok Israel, ektáha axta exchep apkelmeykekxa, ná elpehéssem aqsa apchaqhe m'a xama énxet meyke nak aptémakxa.’ Keñe sa' megkólpehéssemek kéxegke ektáha kélaqhe xa énxet apketsapma nak,

⁹kóllának sa' kéxegke aqsok ekpéwomo nápaqtók ma'a Wesse' egegkok, kólmasseksek sa' kélnepyeseksa m'a ekpehewayam nak amya'a kélaqhe xa énxet apketsapma nak.

¹⁰“Kélempakha'ak sa' agkok chá'a m'a kélenmexma nak, keñe apkelmésa enxoho chá'a yaqwayam kólmok Dios Wesse' kélagkok ma'a kélenmexma,

¹¹apwet'ak sa' agkok chá'a kélxama kéxegke nepyeseksa énxet'ák kélma m'a xama kelán'a ektaqmalma, keñe katsapok apnények elano', emok nahan etnehek aptáwa',

¹²eyentemekxak sa' chá'a m'a apxagkok keñe sa' yának kólmópesseshok chá'a ekyese, tén han kólyaqténchesek ma'a aphék,

¹³yának sa' kólhexyawássesek ma'a élnaqta élántaxneykekxa axta m'a sekxók axta ekmáxko, keñe sa' kaxnamok nahan ma'a apxagkok nak, kalapwomok sa' kalchetmok chána ekweykmoho xama pelten eñama életsapma. Keñe sa' natámen xa, apwanchek kaxwók épetchak ma'a israelitas nak, atáwa' sa' katnehek ma'a, keñe sa' ma'a etnehek aptáwa'.

¹⁴Keñe sa' ekmassa enxoho ekleya apwáxok, yohok sa' aqsa kaxog; mopwanchek sa' eyke eyenyekxak ekha ekyánmaga m'a tén han etnehek apchásenneykha naqsa, hakte appatheteykegkek axta chá'a.

¹⁵“Yetneyk sa' agkok chá'a ánet apnaqteyegka'a xama énxet, yásekhohok ma'a xama keñe m'a mók nak megyásekhe', apwetássek agkok étchek xa ánet nak, keñe ektáha enxoho apketche átnaha apketkok étche m'a kelán'a megyásekhe nak,

¹⁶wokmek sa' agkok ekhem apmelassakxa aqsok apagkok nepyeseksa apketchek xa énxet nak, mopwanchek sa' eltemeykha apketche átnaha apketkok ma'a étche nak kelán'a apchásekhayókxa, hakte etwássesha sa' katnehek étche m'a kelán'a aptaqnagkamakxa nak, ektáha nak naqsók apteme apketche átnaha apketkok.

¹⁷Kéméxcheyk etnéssesek ektáha naqsók apketche átnaha apketkok xa tén han eyeyhássessamhok chá'a apkelmésso m'a aqsok apagkok ekpayhawo nak chá'a yaqwayam elmések, hakte cháxa apteme apkemha apmonye' apwete apketche xa payhawók nahan etnehek átnaha apketkok apketche.

¹⁸“Yetneyk agkok apketche xama énxet meyke nak apkelyaheykekxoho appeywa tén han ekyennaqte nak apwáxok, melyaheykekxa nak aptáhakxa yának ma'a apyáp tén han egken, megkeyxek ma'a aplegassáseykegkoho,

¹⁹kayentemekxak sa' chána m'a sẽlyekpelchémókxa apagkok nak ma'a apkelámha apmonye'e nak tegma apwányam,

²⁰sa' katnehek kának apkelámha apmonye'e s'e: ‘Melyaheykekxa amya'a negko'o egketche, ekyennaqte apwáxok nahan; mehẽlyahakxeyk chá'a xama enxoho, asagkek aptémakxa, anmen áto'.’

²¹Keñe sa' yaqhek ma'a apyókxoho énxet'ák nak tegma apwányam, meteymog sa' elyetna'. Keñe sa' kólmasséssók kéxegke aqsok ekmaso ekteyapma nepyeseksa m'a énxet'ák kélagkok, apkelya'ásegwokmek sa' agkok israelitas xa, yeygkok sa' chá'a.

²²“Apmatñekxeyk agkok xama énxet kólmakhésha néten yámet ekyawe eñama apkelane xama aqsok ekmaso agko',

²³megkólmakhésha sa' aqsa nahan aphápak yókxoho axta'a m'a néten nak; yohok sa' chá'a kólátawanyek xa ekhem nak, hakte Dios chá'a aptaqnagko énxet apketsapma nak chá'a kélmakheyáseykha m'a néten yámet ekyawe, megkeymexchek kéxegke kólenyetseksek ma'a xapop apmáheyókxa nak egkések yaqwayam kóltéhek kélagkok kélagko' ma'a Dios Wesse' kélagkok.