Read Lengua Sur Deuteronomio 29 Bible Online

Deuteronomio 29 - Lengua Sur bible

Deuteronomio 29

¹Keso ektémakxa axta ekpeywa ekhémo mók nélpaqhetchásamáxkoho apkeltamho axta elának Wesse' egegkok Moisés yetlo israelitas ma'a apchókxa Moab, tén han ma'a ekhémo mók nélpaqhetchásamáxkoho apkelánéssama axta m'a egkexe Horeb.

²Apchánchesákxeyk axta Moisés ma'a apyókxoho israelitas, aptáhak axta apkeláneya s'e: “Kélweteyak axta kéxegke ekyókxoho apteméssessamakxa axta Wesse' egegkok Egipto m'a faraón, tén han ma'a apkeláneykha tén han ma'a ekyókxoho apchókxa nak,

³kéxegke kélteme kélweteykegkoho m'a aqsok ekyawe ekteyapma axta m'a, tén han ma'a magkenatchesso nak agweta' tén han ma'a aqsok sempelakkasso nak agweta'.

⁴Weykmók eyke makham megkésso Wesse' egegkok kélya'áseyak se'e negwánxa nak, meltémók makham kólya'ásegwók ektémakxa ekyókxoho xa aqsok nak.

⁵Eknaqleykha axta ko'o kéxegke ekweykmoho cuarenta apyeyam ma'a yókxexma meykexa nak énxet, axta nahan elyeptamákpok kélnaqta xa apyeyam nak, axta nahan kalpaqxók ma'a kélatchesso kélmagkok.

⁶Axta kólteykegkok ma'a kelpasmaga, axta kólyeneykegkok nahan ma'a vino, tén han megkólyeneykegko xama enxoho m'a negyá ekyennaqte nak, yaqwayam enxoho kólya'asagkohok Wesse' egegkok, apteme Dios kélagkok kéxegke.

⁷“Xama axta nélwaya s'e yókxexma nak, egketámeykmek axta sẽmpakhaya m'a Sihón, wesse' apwányam axta m'a Hesbón, tén han ma'a Og, wesse' apwányam axta m'a Basán, negmenxenmeyk axta eyke,

⁸negmomchek axta m'a apchókxa nak, tén negméssama yaqwayam etnehek apagkok apagko' ma'a Rubén énxet'ák apagkok, tén han ma'a Gad, tén han ma'a Manasés nak nápakha énxet'ák apagkok.

⁹Kólyahakxoho sa' ektémakxa nak ekpeywa s'e ekhémo mók nélpaqhetchásamáxkoho, kóllána sa' nahan, yaqwayam sa' kataqmelek chá'a ekteyapma m'a ekyókxoho aqsok kéllanakxa enxoho chá'a.

¹⁰“Sakhem kélaqnákxo kéxegke kélyókxoho nápaqtók Dios Wesse' kélagkok: apkelámha apmonye'e nak chá'a nepyeseksa énxet'ák kélagkok, apkelámha apmonye'e kélagkok nak chá'a m'a tegma apwányam, sẽlpextétamo kelwesse'e kélagkok, tén han kélyókxoho kélennay'a nak ma'a Israel,

¹¹yetlo kélketchek, kélnaqteyegka'a tén han ma'a énxet'ák apkeleñama nak mók apkelókxa apheykha nak kélnepyeseksa kéxegke, ekweykekxoho m'a apkelyaqténchesso nak chá'a yántapák tén han ma'a apkelyekweyáseyak nak chá'a yegmen,

¹²yaqwayam sa' kólxének naqsók peya kóllának ma'a ekhémo mók nélpaqhetchásamáxkoho apkelánésa nak sakhem kéxegke m'a Dios Wesse' kélagkok.

¹³Sakhem ekpenchásexko kéxegke kélteme énxet'ák apagkok ma'a, keñe kéxegke kéltáha Dios kélagkok ma'a, ekhawo apkeltennassama axta etnéssesek ma'a Abraham, Isaac tén han ma'a Jacob, cham'a kélyapmeyk nanók axta kéxegke.

¹⁴Háwe eyke kélwánxa kélagkok kéxegke apkelánesa Wesse' egegkok xa ekhémo mók nélpaqhetchásamáxkoho nak tén han xa apxeyenma ekmámnaqsoho nak,

¹⁵eyke nahan ma'a mexneyncha'a nak sakhem negyeseksa nápaqtók se'e.

¹⁶Kélya'ásegkók kéxegke ektémakxa axta negheykha m'a Egipto tén han ma'a ektémakxa axta chá'a negmáheyo ólyeykhágwók apheykegkaxa m'a énxet'ák apheykha axta chá'a m'a ámay yaqweykenxa axta chá'a ólyeykhágwók,

¹⁷nélwetágweykenxa axta chá'a m'a aqsok kéláyókxa élmowancha'a amya'a nak tén han ma'a kéleykmássesso élánamáxche nak yántéseksek, meteymog, sawo ekmope ekmomnáwa tén han ma'a sawo ekyátekto ekmomnáwa, apkelpeykessamo axta chá'a m'a énxet'ák nak.

¹⁸Nágkólho aqsa étek kélnepyeseksa kéxegke xama énxet, kelán'a, essenhan kélnámakkok tén han énxet'ák kélagkok, apyamasma sakhem ma'a Dios Wesse' egegkok eñama apkelpeykessamo m'a aqsok apcháyókxa nak xa énxet'ák nak. Kólxohok katnehek kéxegke m'a yámet egkepmenák ekmáskel'a tén han ma'a segwayól'a.

¹⁹“Yának sa' chá'a kataqmelak agko' aptémakxa kélxama kéxegke natámen appenchesso sa' chá'a apkelháxenmo ekpeywa s'e segánamakxa nak, keñe sa' katnenek chá'a apwáxok se'e: ‘Tásek sa' chá'a katnehek ekteyapma m'a sélanakxa enxoho chá'a, alának sa' eykhe chá'a ko'o m'a sekmámenyého ahagko' nak chá'a alána'’, sa' etnehek apkelsexnenagko enaqtawasakpok apyókxoho énxet xa.

²⁰Melásekhekxók sa' nahan ma'a Wesse' egegkok, eltaqnaweygkok sa' aqsa xa énxet'ák nak, káhapwaták sa' ekyókxoho m'a ekmaso nak negha ekxeyenma nak ekpeywa s'e weykcha'áhak nak, emasséssessók sa' nahan Wesse' egegkok apheykha náxop ma'a aptawán'ák neptámen nak.

²¹Elyetnakhaksek sa' Wesse' egegkok nepyeseksa énxet'ák Israel xa énxet'ák nak, yának sa' káhapwak ekmaso apheykha, ekhawo nak ekyókxoho ekmaso negha agkok ma'a ekhémo mók nélpaqhetchásamáxkoho, ekyetna nak eknaqtáxésamaxche s'e weykcha'áhak segánamakxa nak.

²²Elwetak sa' nenlegeykegkoho ekmaso tén han negmasse peya nak yáphaksek Wesse' egegkok keso náxop, cham'a kaxwe nak yaqwayam makham elántépekxak ma'a egmonye', tén han ma'a kéltawán'ák kélnentámen nak kéxegke, peya nak elántépekxak makham kélnentámen kéxegke, ekhawo nahan ma'a énxet'ák apkeleñama nak mók apkelókxa apkelwe nak apkeleñama m'a apkelókxa makhawók agko' nak,

²³elwetak sa' ekyókxoho apchókxa ekteme m'a aqsok ánek ekyátekto eyáléwomól'a, tén han yásek tén han xapop ekmeyesma. Megkólwanchek nahan kólchenekxak aqsok aktek xa xapop nak, megkatyephek nahan xama aqsok enxoho; megkawanamyek nahan xama pa'at enxoho m'a, hawók ma'a ektémakxa axta kélmassesseykmo m'a tegma apkelyawe Sodoma, Gomorra, Admá tén han ma'a Seboím, apmassesseykmo axta Wesse' egegkok yetlo aplómo apagko'.

²⁴“Keñe sa' etnehek elmaxneyha apyókxoho énxet'ák se'e: ‘¿Yaqsa ektáha apteméssesa nak Wesse' egegkok xa apchókxa nak? ¿Yaqsa ektáha aplóko apagko' nak?’

²⁵Sa' katnehek kélátegmoweykegkokxa s'e: ‘Eyke ñémékxa apyamasma m'a ekhémo mók nélpaqhetchásamáxkoho, apkelánésso axta sekxók apkelántekkessama Egipto m'a apyapmeyk nano' nak Dios Wesse' apagkok,

²⁶apkelye'eykekmek apkelpeykessamo tén han apkelháxaheykegko chá'a amonye'e m'a mók aqsok kéláyókxa melya'ásegko nak, megkagkéssama nak chá'a xama aqsok.

²⁷Cháxa keñamak aptaqnawaya nak Wesse' egegkok xa xapop nak, apkeltamho káhapwaták ekyókxoho aqsok ekmaso ekyetna nak eknaqtáxésamaxche s'e weykcha'áhak nak;

²⁸apkelántekkessek nahan apchókxa yetlo aplómo apagko' tén han yetlo megkaleklo agko' apwáxok apkelányo, apkexakhagwokmek ma'a mók apkelókxa, ekhawo ektémakxa nak se'e kaxwo nak.’

²⁹“Yetneyk aqsok magya'áseyak nak chá'a: Dios Wesse' egegkok akke apagkok xa; yetneyk eyke nahan ma'a aqsok nenxawe nak chá'a negko'o yaqwayam agweta' tén han ma'a egketchek nak yaqwayam enxoho ólyahakxohok chá'a: ekyókxoho éltémókxa nak antéhek se'e segánamakxa nak.