Read Lengua Sur Deuteronomio 31 Bible Online

Deuteronomio 31 - Lengua Sur bible

Deuteronomio 31

¹Apkelpaqhetchásekxeyk axta makham Moisés ma'a apyókxoho énxet'ák Israel, axta aptáhak apkeláneya s'e:

²“Ciento veinte apyeyam ahagkok ko'o kaxwók entáhak, méko kaxwók sekyennaqte, mowanchek kaxwók awegképho'. Éltennássek nahan ko'o Wesse' egegkok mayeykhekxeyk ma'a neyp wátsam Jordán.

³Exog sa' eyke chá'a kélmonye'e kéxegke m'a Dios Wesse' kélagkok, emasséssók sa' chá'a kélmonye'e kéxegke m'a énxet'ák apheykha nak chá'a m'a kélmahágkaxa enxoho chá'a, yaqwayam sa' kólmok chá'a m'a xapop apagkok nak. Josué sa' eyke exog kélmonye'e kéxegke, yaqwayam etnehek apkemha apmonye', ekhawo aptáhakxa axta apxeyenma m'a Wesse' egegkok.

⁴Sa' etnéssesek nahan Wesse' egegkok, cháxa énxet'ák nak, ekhawo apteméssessamakxa axta m'a Sihón tén han ma'a Og, kelwesse'e apkelwányam apagkok axta m'a amorreos, yetlo m'a apkelókxa nak, cham'a apmassesseykmo axta.

⁵Apméssek sa' agkok kéxegke Wesse' egegkok yaqwayam kólmok xa énxet'ák nak, sa' kólteméssesek ekyókxoho m'a séltamhókxa exchek ko'o kólteméssesek.

⁶Kólyennákxoho sa', kólyennaqteyásekxoho sa' kélwáxok; nágkóle', nágkólyegwe aqsa m'a kélwet'a enxoho kélmonye'e, hakte apheyk kélnepyeseksa kéxegke m'a Dios Wesse' kélagkok, apkelxegexma'a sa' chá'a etnehek, mekxáyhek sa' chá'a.”

⁷Tén axta Moisés apwóneyncha'a m'a Josué, aptáhak axta apcháneya nápaqta'awók apyókxoho énxet'ák Israel se'e: “Ewasqápekxoho sa', énnaqteyásekxoho sa' apwáxok, hakte xeyep sa' enaqlók apchókxa apteméssessamakxa axta ekmámnaqsoho agko' yaqwayam egkések Wesse' egegkok ma'a kélyapmeyk nanók axta kéxegke, xeyep sa' yaqwayam egkések ma'a xapop nak.

⁸Wesse' egegkok apagko' sa' chá'a exog apmonye' exchep, apxegexma sa' chá'a etnehek; meyenyewek sa' chá'a apxakko', epasmok sa' chá'a; nágye aqsa, ná eyélaqtéssem apwáxok.”

⁹Aptáxéssek axta Moisés se'e segánamakxa nak, tén axta apkelmésa m'a apkelmaxnéssesso Dios énxet'ák apagkok levitas apseykha axta chá'a m'a yántéseksek ekhémo mók nélpaqhetchásamáxkoho apagkok nak Wesse' egegkok, tén han ma'a apyókxoho apkelámha apmonye'e nak Israel,

¹⁰apkeltennásegkoho nahan se'e apkeltamhókxa axta chá'a etnahagkok: “Yókxoho siete apyeyam, ekwákxo enxoho chá'a m'a apyeyam ekmasséssamaxchexa nak aqsa chá'a negméyak aqsok, neyseksa élánamáxche m'a kélessawássessamo kélpakxeneykegkaxal'a yenta'a aktegák étkók,

¹¹apchaqnákxo enxoho apyókxoho israelitas nápaqtók Dios Wesse' apagkok ma'a yókxexma apkelyéságkaxa sa', kalyetsetaxchek sa' chá'a nápaqta'awók apyókxoho s'e segánamakxa nak.

¹²Apyókxoho énxet sa' yánchásekxa', cham'a apkelennay'a nak tén han ma'a kelwán'ák nak, tén han ma'a sakcha'álétkók tén han ma'a énxet'ák apkeleñama nak mók apkelókxa apheykha nak chá'a m'a tegma apkelyawe kélagkok, yaqwayam sa' yeyxhok chá'a élyetsátamáxche segánamakxa tén han kaltámeyagkok apkelyeheykekxoho m'a Dios Wesse' apagkok, tén han elanagkok ekyókxoho ektémakxa nak ekxeyenma ekpeywa xa segánamakxa nak.

¹³Ekhawo nahan ma'a kélketchek nak kéxegke, melya'áseyak nak makham xa, apwanchek nahan eleyxhok ma'a, keñe sa' kaltámeyagkok apcháyo m'a Dios Wesse' apagkok neyseksa apheykha enxoho makham ma'a apchókxa yaqwánxa sa' kólmok kéxegke natámen kélyeykheykekxa m'a neyp wátsam Jordán.”

¹⁴Tén axta Wesse' egegkok aptáha apcháneya Moisés se'e: “Elano, ketók kaxwók xép apketsapmakxa; yáneyha sa' Josué, kólmeyekxa sa' kélqánet ma'a kélpakxanma apchaqneykekxexa nak chá'a énxet'ák, yaqwayam sa' ko'o agkések sekpeywa séltamhókxa chá'a etnehek.” Apkelmeyákxeyk axta kélpakxanma apchaqneykekxexa axta chá'a énxet'ák ma'a Moisés tén han Josué,

¹⁵apxekmowáseykpók axta nahan Wesse' egegkok ma'a, yetlo xama yaphope émha axta m'a, kenmáha axta m'a átog nentaxnamakxa nak ma'a kélpakxanma.

¹⁶Tén axta Wesse' egegkok aptáha apcháneya Moisés se'e: “Apketsekkek sa' agkok xép, keñe sa' se'e énxet'ák nak enaqtawasakpok sa' elyetlakxak ma'a mók aqsok kéláyókxa ekheykegko nak ma'a mók apchókxa yaqwánxa sa' kólmok; keñe sa' ko'o heyenyók, etwasha sa' ma'a ekhémo mók nélpaqhetchásamáxkoho sélánésso axta ko'o m'a.

¹⁷Altaqnaweygkok sa' eyke ko'o xa énxet'ák nak, akxák sa'; megkeytnakhaksók sa' ewáxok xama enxoho, káhapwak sa' ekxámokma agko' ma'a aqsok ekmaso tén han ma'a nenlegeykegkoho nak, keñe sa' etnehek chá'a elpaqmésmakha s'e: ‘Hákho óllegagkohok se'e aqsok ekmaso nak, ñókxa ekmassa apha negyeseksa m'a Dios Wesse' egegkok.’

¹⁸Wokmek sa' agkok yaqwánxa katnehek xa, kayágwomhok sa' aqsa ko'o malányo xa énxet'ák nak, eñama apkelánéyak ekyókxoho m'a aqsok ekmaso tén han eñama apkelpeykessamo m'a mók aqsok kéláyókxa.

¹⁹“Kóltaxés sa' kaxwók se'e negmeneykmasso nak, kólxekmós sa' ma'a israelitas, yaqwayam sa' elmeneykmaksek chá'a tén han katnehek chá'a ko'o séltennasso aptamheykegkaxa nepyeseksa xa énxet'ák nak.

²⁰Hakte élántaxnéssek sa' agkok ko'o m'a xapop séltennassamakxa axta ko'o m'a apyapmeyk nanók axta, cham'a xapop ényahamakxa nak weyke nagkeygmenek tén han ma'a yányawhéna' apyegmenek ektémól'a kanyehek ma'a yegmen, tén han aptókagko sa' ekwokmoho apkelyaqkanakmo tén han apnaqmel'a sa', keñe sa' elyetlakxak ma'a mók kéláyókxa nak, elpeykeshok sa' nahan, keñe sa' ko'o hetaqnawágwók, etwasha sa' ma'a ekhémo mók nélpaqhetchásamáxkoho ahagkok nak.

²¹Cháhapwa'ak sa' agkok ekxámokma m'a aqsok ekmaso tén han ma'a ekyentaxnamo nak egwáxok, keñe sa' se'e negmeneykmasso nak katnehek sa' chá'a éltennasso aptamheykegkaxa xa énxet'ák nak, hakte kalxénwakxohok sa' chá'a apkelwáxok ma'a aptawán'ák neptámen nak tén sa' elmeneykmaksek chá'a; hakte cham'a sekxók axta sekmáheyo alántaxnések ma'a apchókxa séltennassamakxa axta agkések, ekya'áseykegkók axta élxéneykegkaxa apkelwáxok elanagkok.”

²²Aptáxessek axta nahan Moisés negmeneykmasso xa ekhem nak, apkelxekmowásegkek axta nahan ma'a israelitas.

²³Tén axta m'a Josué, Nun apketche, apmésa makham mók appeywa Wesse' egegkok apkeltamhókxa chá'a etnehek, aptáhak axta s'e: “Énnaqteyásekxoho sa' apwáxok, ewasqápekxoho sa', hakte xép sa' elántaxnések israelitas ma'a apchókxa séltennassamakxa axta ko'o agkések, sekxegexma sa' eyke nahan ko'o atnehek xép.”

²⁴Xama axta appenchesa apnaqtáxésso xama weykcha'áhak Moisés se'e segánamakxa nak,

²⁵aptáhak axta apkeláneya levitas se'e apseykha axta chá'a m'a yántéseksek ekhémo mók nélpaqhetchásamáxkoho apagkok nak Wesse' egegkok:

²⁶“Kólma sa' se'e weykcha'áhak segánamakxa nak, kólpekken sa' nekha nak yántéseksek ekhémo mók nélpaqhetchásamáxkoho apagkok Dios Wesse' kélagkok, yaqwayam sa' keytek ma'a, katnehek magkenatchesso kéltémakxa nak chá'a kéxegke.

²⁷Hakte ekya'ásegkók ko'o kéxegke kélteme énxet'ák élyennaqte kélwáxok tén han meyke kapeynchegkesek kéltáhakxa; kélenmexáha agkok makham Wesse' egegkok s'e sakhem nak, keso sekha nak makham ko'o kélnepyeseksa kéxegke, ¿háxko sa' katnehek ma'a sétsapa sa' ko'o?

²⁸Kólnaqlanta apyókxoho apkelámha apmonye'e tén han apkelámha apmonye'e apagkok nak chá'a énxet'ák kélagkok se'e, yaqwayam sa' ko'o allegaksek se'e aqsok nak tén han apekkenek ko'o néten tén han náxop yaqwayam katnehek chá'a ekweteykegkoho m'a aqsok apkelánegkaxa enxoho chá'a.

²⁹Hakte ekya'ásegkók ko'o m'a sétsapa sa', enaqtawasakpok sa', elyensók sa' ma'a ámay séltémókxa axta ko'o elyetlók; ekya'ásegkók nahan peya káhapwak aqsok ekmaso m'a egmonye' sa', eñama apkelánéyak aqsok ekmaso nápaqtók ma'a Wesse' egegkok tén han aplókasso.”

³⁰Tén axta Moisés apkelyetseta ekyókxoho s'e negmeneykmasso nak, nápaqta'awók ma'a apyókxoho israelitas apchaqnákxo axta m'a: