Read Lengua Sur Deuteronomio 33 Bible Online

Deuteronomio 33 - Lengua Sur bible

Deuteronomio 33

¹Apkelmaxnéssessek axta yaqwayam kataqmelek apheykha israelitas ma'a Moisés, apteme axta Dios énxet apagkok amonye' yaqwayam yetsapok.

²Aptáhak axta s'e: “Sinaí apkeñamak ma'a Wesse' egegkok; Seír axta apkeñamak apwaya negyeseksa. Chápogwategkek axta élseyéxma apagkok ma'a egkexe Parán apxegeykmek axta apkeñama m'a Meribá-cadés; apmek apkelya'assamakxa axta ensókaseykmok ma'a segánamakxa táxa eyáléwe nak.

³Apkelásekhayók énxet'ák apagkok ma'a Wesse' egegkok, elmeyawhok ma'a ektáha nak chá'a apkelpagkanchásamap; apkelháxaheykegkek nahan chá'a apmonye' s'e énxet'ák nak apmomchek nahan chá'a takha' m'a apkeltémókxa nak chá'a etnahagkok.

⁴Egméssek negko'o segánamakxa m'a Moisés sempekkencháseykekxa axta yaqwayam antéhek egagkok, nenteme nak Jacob énxet'ák apagkok,

⁵yetneyk axta xama wesse' apwányam ma'a Jesurún apchaqneykekxo axta chá'a apkelámha apmonye'e apagkok nak énxet'ák, apkelyepetcheykekxo axta chá'a m'a énxet'ák Israel.”

⁶Keñe axta aptáha apxéna Rubén se'e: “¡Memassegwomek sa' Rubén! ¡Megyetsephek sa', apqántawók eykhe m'a énxet'ák apagkok!”

⁷Keñe axta aptáha apxéna Judá s'e: “Wesse', yeyxho Judá appeywa; yána epáxaqwakxak ma'a énxet'ák apagkok. Emyow sa' xép yetlo apmopwána; epásem sa' elenmexek ma'a apkelenmexma nak.”

⁸Keñe axta Leví aptáha apxéna s'e: “Wesse', xép apagkok ma'a, Tumim tén han ma'a Urim; apkelxawáyak nahan ma'a énxet'ák meyenseyam nak apyetleykha exchep, apyepkeynma axta chá'a m'a yókxexma Masá, apkenmexeykencha'a axta chá'a m'a nekha yegmen nak Meribá,

⁹aptéma axta chá'a elának apyapmeyk se'e: ‘Malweteyk ko'o xama enxoho m'a’, aptéma axta chá'a elxének apkelyáxeg'a s'e: ‘Malya'ásegkok ko'o m'a’, aptéma axta chá'a elxének apketchek se'e: ‘Malya'ásegkok ko'o xa, yaqsak kexa.’ Apkeláneykegkek ektémakxa nak appeywa xa énxet'ák nak, apkelmeyásamakpók apagko' nahan ma'a ekhémo mók nélpaqhetchásamáxkoho apagkok nak.

¹⁰Apkelxekmóssegkek axta segánamakxa apagkok tén han apchánamakxa antéhek ma'a Jacob, cham'a Israel; appekkenchessegkek axta chá'a nápaqtók ma'a aqsok ekmátsa nak ekpaqneyam éten agkok appekkenchessegkek axta chá'a néten ekwatnamáxchexa nak chá'a aqsok ma'a kéltósso kélmésso naqsa nak chá'a.

¹¹Wesse', epásem xép, neyseksa apkelwasqápeykekxoho m'a, ema takha' yetlo ektaqmeleykha apwáxok elanok ma'a aqsok apkelánéyak nak. Elekkexches apkap'ák axchakkok ma'a apkelenmexma nak, yaqwayam sa' melchempekxeyk chá'a néten ma'a apkelenmexeykha nak chá'a.”

¹²Keñe axta aptáha apxéna Benjamín se'e: “Méko katnehek apweynchámeykha m'a apchásekhayo nak chá'a Wesse' egegkok; etaqmelchesek sa' chá'a m'a Meyke nak Ekhémo. ¡Emyók sa' chá'a!”

¹³Keñe axta aptáha apxéna José s'e: “Wesse' egegkok sa' egkések yálye ektaqmela m'a xapop apagkok eñama nak néten tén han ma'a yegmen ekyetnama nak ma'a kañók agko' nak xapop,

¹⁴ektaqmalma nak eknakxamáxche' aqsok ekyexna kélcheneykekxa apyeyam tén han ektaqmalma ekyexna kélcheneykekxa nak pelten,

¹⁵tén han ektaqmalma ekyexna m'a éleñama nak neyseksa meteymog élekhahéyak nano' nak, tén han ma'a éleñama nak egkexe éltaqmalma agko' megkamassegwayam nak,

¹⁶tén han ekyexna éltaqmalma agko' eksawheykekxoho nak ma'a xapop, yetlo appasmo m'a apwetamakpo axta neyseksa maktek. Kaweywenta takhapxet José s'e ekyókxoho nak, ektáha axta apkelyésamap nepyeseksa m'a apkelpepma.

¹⁷Aptásek ma'a, máxa m'a émha amonye' étkok la'a m'a weyke kennawo' apmeyhek nahan, máxa m'a yágweykel'a. Elyetxeygkok sa' nahan ma'a apyókxoho énxet'ák ekweykmoho m'a néxa xapop nak. Aphawók ma'a Efraín énxet'ák apagkok apxámokma nak; tén han ma'a Manasés énxet'ák apagkok nak.”

¹⁸Keñe axta Zabulón tén han Isacar aptáha apxéna s'e: “Zabulón, kapayhekxa sa' apwáxok, apmahágkaxa enxoho chá'a elsawha aqsok apkexeykekxa, tén sa' xeyep Isacar, kapayhekxa sa' chá'a apwáxok neyseksa apha kóneg appakxanma.

¹⁹Elwónmakha sa' pók aptémakxa énxet'ák ma'a egkexe nak, sa' elmések kélnaqtósso ektekyawa ekpayhawo nak chá'a kólmések ma'a; étak sa' aqsok ekxámokma éleñama nak wátsam ekwányam, tén han ma'a aqsok élmomnáwa élpowásamáxche nak ma'a neyáwa'.”

²⁰Keñe axta Gad aptáha apxéna s'e: “¡Apkeleñémo apmésso nak ekyawe agko' xapop apagkok Gad! Máxa méwa kamáwhok kathánek ekyógkexma m'a Gad elekkexchessamól'a aktegák ekyógkexma, tén han ayespa'ák.

²¹Gad nahan apmak ma'a xapop ektaqmelakxa agko' nak, xama xapop ekpayhémo nak yaqwayam elxawagkok ma'a sẽlpextétamo apkelwesse'e. Aptemék apkemha apmonye' apagkok ma'a énxet'ák, apkelanak ma'a apkeltémo axta chá'a elának ma'a Wesse' egegkok péwók axta nahan apkelánekxésso chá'a amya'a apnámakkok ma'a kañe' Israel.”

²²Tén axta Dan aptáha apxéna s'e: “Dan apteme méwa étkok eknextegmal'a eñama m'a Basán.”

²³Tén axta Neftalí aptáha apxéna s'e: “Leklamók apwáxok apkelányo Wesse' egegkok ma'a Neftalí, apméssegkek ekxámokma agko' ma'a aqsok apagkok. ¡Apagkok ma'a ekpayhegwayam nak yegmen ekweykmoho m'a néxa ekpayhegwayam, ekpayho nak nepyeyam!”

²⁴Keñe axta Aser aptáha apxéna s'e: “Apkeleñémo sa' etnehek Aser nepyeseksa m'a Jacob apketchek nak, yásekhohok sa' chá'a m'a apkelpepma nak. Elyássesek sa' apmagkok ma'a pexmok égmenek;

²⁵Sawo sa' katnehek kélápeykekxexa m'a atña'ák apagkok nak tén han ma'a sawo élyexwase, kawegqohok sa' nahan apyennaqte, kaxhok sa' ekwánxa apha keso náxop.

²⁶“Méko aphawo m'a Dios apagkok nak Jesurún, apkexyeykmoho nak néten neyseksa yaphope yetlo apcheymákpoho yaqwayam epásegwata'.

²⁷Cha'a aptaqmelchesso exchep ma'a Dios memassegwayam nak, cha'a ekpasmo m'a apmopwána megkamassegwayam nak; emenxenchesek chá'a apmonye' exchep ma'a apkelenmexma nak keñe exchep yának chá'a emasséssók.

²⁸Exek sa' chá'a meyke ektamheykha apwáxok ma'a Israel, méko sa' katnehek ektáhakxa apkelweynchámeykha m'a aptawán'ák neptámen nak. Exek sa' hótáhap tén han anmen yámet kélcheneykekxa m'a xapop apagkok nak, megkameykkehek sa' chá'a ekmámeye.

²⁹Apkeleñémo exchep, Israel, ¿Yaqsa kélwanchek kólhéshok xép? Wesse' egegkok apagko' apwagkasso teyp xép; cha'a aptaqmelchesso chá'a exchep ma'a tén han appasmo chá'a, ¡cha'a apteme sókwenaqte apagkok segmallahanchessamo nak chá'a m'a! Elmésakpok sa' xép ma'a apkelenmexma nak, keñe sa' xép emasséssesek apkeleymákpoho.”