Read Lengua Sur Josué 16 Bible Online

Josué 16 - Lengua Sur bible

Josué 16

¹Axta cheynamók xapop ekpayhémo axta apkelxawáya m'a José aptawán'ák neptámen teyp nak wátsam Jordán, ekpayho nak ekteyapmakxa ekhem, ekheykegkaxa axta yegmen ma'a Jericó. Cha'a éñamakxa axta han ekmeheykegko m'a yókxexma meykexa énxet, ekmalláneykekxo m'a meteymog élekhahéyak eñama m'a Jericó ekweykekxoho m'a Betel.

²Betel axta keñamak, cham'a ekwesey nak han Luz, yeykhayak axta m'a xapop apagkok nak arquitas, ekweykekxoho m'a Atarot;

³keñe axta ekmeyeykekxo m'a ekpayho nak ektaxnegwánxa ekhem, xapop apagkok axta m'a jafletitas, ekweykekxoho m'a néxa xapop nak Bet-horón ekmeyeykenta nak kóneg, ekweykekxoho m'a Guézer. Axta temégweykmok néxa m'a wátsam ekwányam nak Mediterráneo.

⁴Keso xapop apagkok apkelxawéyak axta m'a Manasés, tén han Efraín énxet'ák apagkok, José axta aptawán'ák neptámen:

⁵Axta maheykegkok néxa xapop Efraín énxet'ák apagkok ma'a teyp nak Atarot-adar, ekpayho nak ekteyapmakxa ekhem, ekweykekxoho m'a Bet-horón ekmeyeykekxa nak néten.

⁶Cha'a éñamakxa axta han ekxegama ekweykekxoho m'a wátsam ekwányam nak Mediterráneo. Axta han néxa xapop apagkok ekpayho nak nexcheyha m'a Micmetat, cháxa eyeynókxa axta ekxega néxa xapop apagkok ekmeheykegko m'a ekpayho nak ekteyapmakxa ekhem, ekweykekxoho m'a Taanat-siló, yeykhayak axta m'a Janóah

⁷tén axta ekweyweykento ekweykekxoho m'a Atarot, tén han Naará, ekwokmoho ekyepetchegweykekxo m'a Jericó, keñe ekyephagweykekxo m'a wátsam Jordán.

⁸Xegamchek axta néxa xapop ma'a ekpayho nak ektaxnegwánxa ekhem eñama m'a Tapúah, ekweykekxoho m'a alwáta' nak ma'a Caná, tén han wátsam ekwányam nak Mediterráneo. Cháxa xapop élpeheweykmo axta apkelxawéyak ma'a Efraín énxet'ák apagkok, tén han kélmeyáseyak axta chá'a ektáhakxa nak apnámakkok.

⁹Apkelxaweykegkek axta han Efraín énxet'ák apagkok pók xama tegma apkelyawe, tén han tegma apketkók apheykegko axta m'a neyseksa xapop apagkok nak Manasés énxet'ák apagkok.

¹⁰Axta eyke elántekkessók Efraín énxet'ák apagkok Guézer ma'a cananeos apheykencha'a axta m'a. Apchahayók axta aqsa apheykencha'a nepyeseksa, apkeltémók axta eyke eltemeykha etnahagkok apkelásenneykha naqsa. Makhemek makham apheykha cananeos xa yókxexma nak.