Read Lengua Sur Josué 17 Bible Online

Josué 17 - Lengua Sur bible

Josué 17

¹Keso xapop élpeheweykmo axta apkelxawéyak ma'a Manasés nak énxet'ák apagkok, apketche átnaha apketkok axta m'a José. Yókxexma Galaad tén han Basán axta chaqhawok apxaka m'a Maquir, apteme axta kempakhakma yáp, apketche átnaha apketkok axta m'a Manasés, cham'a teyp nak Jordán ekpayho nak ekteyapmakxa ekhem, cham'a Maquir Galaad axta apyáp.

²Kélmeyásegkek axta han xapop yaqwayam etnehek chá'a apagkok ma'a nápakha nak Manasés énxet'ák apagkok, apwánxa enxoho chá'a apxámokma m'a apnámakkok: cham'a Abiézer, Hélec, Asriel, Siquem, Héfer tén han Semidá, Manasés axta apketchek, José axta aptawán'ák.

³Keñe m'a Selofhad, Héfer axta apketche, aptáwen axta m'a Galaad, cham'a Galaad, Maquir axta apketche, aptáwen axta m'a Manasés, méko axta xama enxoho apketche apkenna', kelwán'ák axta aqsa cinco ekyókxoho, cham'a Mahlá, Noá, Hoglá, Milcá tén han ma'a Tirsá.

⁴Cháxa ekya'aweykxo axta m'a apkelmaxnéssesso nak Dios énxet'ák apagkok Eleazar, tén han Josué, keñe han ma'a apkelámha apmonye'e nak nepyeseksa énxet'ák. Entáhak axta éláneya s'e: “Wesse' egegkok apkeltamhók negko'o hẽlmések xapop ma'a Moisés, ektáha axta apkelmeyásegko m'a egnámakkok.” Apkelmeyásegkek axta han xapop Josué, ektáha axta apkelmeyásegko m'a yáp apnámakkok nak, apkeltémókxa axta etnehek ma'a Wesse' egegkok.

⁵Diez yókxexma axta apkelxawágkok ma'a Manasés énxet'ák apagkok, nanók axta eyke han apkelxawéyak ma'a yókxexma nak Galaad tén han Basán, ekpayho nak ekteyapmakxa ekhem ma'a teyp Jordán,

⁶kelxawágkek axta xapop ma'a Manasés apketchek nak, ektéma nak ma'a apkelennay'a nak. Pók Manasés aptawán'ák neptámen axta apkelxaweykegkok ma'a yókxexma Galaad.

⁷Axta eyeynókxa xapop apagkok Manasés énxet'ák apagkok ma'a yókxexma nak Aser ekweykekxoho m'a Micmetat, ekpayho nak ma'a yókxexma Siquem, xegamchek axta ekmeheykegko m'a ekpayho nak nepyeyam, ekweykekxoho m'a ekteyapmakxa nak yegmen Tapúah.

⁸Manasés énxet'ák apagkok axta eyke apagkok ma'a yókxexma nak Tapúah, keñe m'a tegma apwányam nak Tapúah, apyetnama nak ma'a néxa xapop apagkok nak ma'a Manasés, aptáha apagkok ma'a Efraín énxet'ák apagkok.

⁹Keñe m'a néxa xapop nak ekweyweykento ekmeyeykekxo m'a ekpayho nak nepyeyam, ekweykekxoho m'a alwáta' nak Caná, cháxa tegma apkelyawe apagkok nak Efraín, apheykegkek axta m'a nepyeseksa nak Manasés tegma apkelyawe apagkok, axta eykhe néxa xapop apagkok Manasés ma'a teyp alwáta' ekpayho nak nexcheyha, tén han ma'a ekyephagweykekxa nak wátsam ekwányam.

¹⁰Keñe axta Efraín ekpeheweykekxo apagkok ma'a teyp alwáta' ekpayho nak nepyeyam, keñe axta Manasés ma'a ekpayho nak nexcheyha, axta han néxa xapop apagkok ma'a wátsam ekwányam Mediterráneo, nexcheyha axta yetnók xapop apagkok ma'a Aser énxet'ák apagkok, keñe Isacar xapop apagkok ekyetnama m'a ekpayho nak ekteyapmakxa ekhem.

¹¹Apkelxawáyak axta han Manasés tegma apkelyawe apheykegko axta m'a Isacar xapop apagkok, tén han Aser, yetlo chá'a m'a tegma apketkók aphéyak nak nepyáwa', cham'a: Bet-seán, Ibleam, Dor, Endor, Taanac tén han ma'a Meguido, keñe han ma'a ántánxo egkexe nak.

¹²Mopwanchek axta eyke apmáheyo elmok Manasés énxet'ák apagkok xa tegma apkelyawe nak, hakte axta exnémok apmáheyo elántekkesek ma'a cananeos keñe apheykencha'a aqsa makham ma'a.

¹³Keñe axta apkelyennaqweykmoho apagko' ma'a israelitas, apkeltémók axta eltemeykha etnahagkok apkelásenneykha naqsa, axta eyke elántekkessók.

¹⁴Aptáhak axta apcháneya José aptawán'ák neptámen ma'a Josué: —¿Yaqsa ektéma segméssama nak ketsék xapop? nenxámok negko'o, empasmomchek han chá'a m'a Wesse' egegkok.

¹⁵Apchátegmowágkek axta Josué: —Kélxámok agkok kéxegke, megkólhawo enxoho m'a egkexe nak Efraín, kólmohok sa' ma'a naxma nak, kólaqhegwom sa' naxma m'a yókxexma apagkok nak ferezeos, tén han ma'a refaítas.

¹⁶Aptáhak axta apkelátegmowágko m'a énxet'ák: —Naqsók maghémo negko'o m'a egkexe nak. Yetneyk eyke yátnáxeg apkelyenyawasso sawo émpe'ék nak ma'a cananeos, apheykencha'a nak ma'a ekpayhegweykenxa nak xapop, hawók han ma'a apheykencha'a nak Bet-seán, tén han ma'a tegma apketkók apheykegko nak nepyáwa, tén han ma'a apheykha nak ekyapwátegweykenxa xapop ma'a Jezreel.

¹⁷Aptáhak axta apchátegmowágko Josué m'a José axta aptawán'ák neptámen, cham'a Efraín axta énxet'ák apagkok tén han Manasés: —Kélxámok kéxegke, kélmelyeyha'ak nahan, xámok sa' chá'a katnehek kélmà yókxexma,

¹⁸kélagkok sa' kóltéhek ma'a egkexe eksawheykekxoho nak naxma', kólaqhek sa' ma'a naxma nak kólmaha m'a yámet. Tén sa' kólántekkesek ma'a cananeos, megkeyxek sa' apkelyennaqte, tén han ekha m'a yátnáxeg apkelyenyawasso apagkok sawo émpe'ék nak.