Read Lengua Sur Josué 2 Bible Online

Josué 2 - Lengua Sur bible

Josué 2

¹Yókxexma Sitim axta apkeleñamak apqánet énxet, Josué axta apyexamakpoho apkeláphasso. Aptáhak axta apkeláneya s'e: “Kólxeg kólteyánegwomho sa' ma'a yókxexma keñe han ma'a tegma apwányam nak Jericó.” Apkelxegkek axta m'a, keñe apkelwokmo m'a tegma axagkok kelán'a ekyaqmagkáseyak pók énxet ektegye selyaqye, cham'a tegma apwányam nak Jericó, ekwesey axta Rahab. Axta apnaqteyenwokmok axta'a m'a.

²Wánxa agkok, xama énxet axta eyke apkeltennásseykxak ma'a wesse' apwányam nak Jericó. Axta aptáhak apcháneya s'e: —Nápakha énxet'ák Israel apkelwa'ak yaqwayam elanok ektémakxa negókxa s'e axta'a nak.

³Keñe m'a wesse' apkeltamho kóltéhek kólának Rahab se'e: —Kalántekkes sa' énxet'ák apkelwa'a nak axagkok, hakte cháxa aptáha kélapháseykha senteyánegwayo xa.

⁴Kelpóssek axta eyke m'a, keñe ektáha éláneya s'e: —Naqsók xeykhe apkelwa'a énxet'ák setnaha meyk'a, makke ay'ásegkok háxko ex'a apkeleñamakxa'.

⁵Apkelxegkek xeyk amonye' ekyáqtessóxma exchek, hakte kólápekxohok chá'a átog ma'a tegma apwányam nak, makke ay'ásegkok háxko ex'a apkelmahágkaxa, kélemhágkek sa' agkok kéxegke s'e kaxwo' nak, kóltahañekxak sa'.

⁶Néten tegma axta eyke kelchenátchásak ma'a kelán'a, axta apháha apkelyexanma m'a neyseksa ekheykegkaxa nak hótappo axchakkok, kélnaqtéteykekxa mók naxta'a yaqwayam kólyamasagkok.

⁷Apkelemhágkek axta wesse' apkelásenneykha apkelmahágko m'a ekpayhókxa nak wátsam Jordán, ekweykmoho m'a éttakhexa nak. Xama axta apkelántepa sẽlpextétamo keñe kélápekxo átog ma'a tegma apwányam nak Jericó.

⁸Tén axta Rahab énátweykxo néten tegma amonye' apnaqteyenma m'a énxet'ák nak, entáhak axta éláneya s'e:

⁹—Ekya'ásegkók ko'o apmésa Wesse' kélagkok kéxegke s'e xapop nak, hakte egméssek negko'o ekyawe agko' éltamheykha egwáxok. Awanhók agko' éltamheykha apkelwáxok apyókxoho énxet'ák apheykha nak se'e, kéxegke eñamakxa'.

¹⁰Negya'ásegkók negko'o m'a ektémakxa axta kélánteyapma kéxegke m'a Egipto. Dios axta apyamásak yegmen ma'a Wátsam ekwányam Ekyexwase yaqwayam kólyeykhak kéxegke, negya'ásegkók han negko'o kélsawhawo axta kéxegke kélnapa m'a apkelwesse'e nak, Sihón tén han ma'a Og, cham'a apqánet apkelwesse'e apagkok axta m'a amorreos, apheykencha'a axta m'a neyp nak wátsam Jordán.

¹¹Awanhók agko' axta éltamheykha egwáxok nenleg'a negko'o m'a amya'a nak. Cháxa keñamak méko nak ekmako kalenmexek kéxegke, cham'a Wesse' ektáha nak Dios kélagkok kéxegke, cháxa aptáha apagkok apagko' ma'a néten, tén han ekweyktámho s'e náxop nak.

¹²Cháxa keñamak séltamho nak ko'o kéxegke hélteméssesek naqsók agko' kélpeywa nápaqtók Wesse' kélagkok, yaqwayam kóltaqmelchesek ma'a étchek, ekhawo nak ko'o sekteméssesakxa kéxegke séltaqmelchesa. Héllanés sa' ko'o xama aqsok magkenatchesso nak yaqwayam may'ássemek ektáha ekmámnaqsoho peya kóltéhek.

¹³Nágkólaqha aqsa táta tén han méme, keñe han ma'a élyáxeg, tén han ma'a élyáxa', ekweykekxoho m'a ekyókxoho ektáhakxa nak énámakkok. ¡Hẽlwagkas sa' teyp! ¡Nágkólho aqsa antekyók!

¹⁴Apkelátegmowágkek axta xa énxet'ák nak: —Dios sa' hẽlnápok negko'o móltaqmelchesa enxoho xa námakkok nak xeye', wánxa néltamho negko'o megkaxének se'e amya'a nak. Egméssek sa' agkok negko'o Wesse' egegkok se'e xapop nak, negko'o sa' han antaqmelchesek, magyenyawha sa' han xeye'.

¹⁵Xama táma axta makhésáha átog étkok élántekkesa Rahab xa énxet'ák nak, hakte chaqhémok axta axagkok ma'a nápakha nak kélhaxtegkesso tegma apwányam.

¹⁶Keñe axta ektáha éláneya s'e: —Kólpéwho sa' ma'a meteymog élwenaqte nak, yaqwayam enxoho melwetekxeyk ma'a ektáha nak apkelchetamso. Kólyexánegwom sa' ma'a ekweykmoho ántánxo ekhem, ekwokmoho apkelwa'akto sa' makham tegma apwányam ma'a ektáha nak apkelchetamso. Keñe sa' kólxegekxak makham.

¹⁷Aptáhak axta apkelátegmowágko: —Naqsók agko' sa' negko'o antéhek xa éltamhókxa nak antéhek;

¹⁸nélántaxneyk sa' agkok negko'o s'e yókxexma nak, xeye' agko' sa' han kamakhésha s'e táma ekyexwase nak, keso átog étkok éltamhókxa nak ólántépok. Kaltennés sa' ma'a yáp, tén han egken yaqwayam enxoho kaqnekxak se'e axagkok nak xeye', keñe han ma'a kelyáxeg, ekyókxoho apketchek nak xeye' yáp.

¹⁹Aptekkek sa' agkok xama mók se'e xeye' axagkok nak, apsexnánémap apagko' sa' etnehek, emátog sa'; háwe sa' katnehek nensexnenagko negko'o. Wánxa agkok, kélteméssesekmók sa' agkok exma xama énxet apha nak xeye' axagkok, negko'o sa' hẽlpehemmok nélsexnenagko.

²⁰Keltennáseyha sa' agkok xama énxet xeye' s'e amya'a nak, negko'o egagkók sa' han manteméssesek naqsók ma'a éltamhókxa nak antéhek, mólyahakxék sa' ma'a éltamhókxa nak anteméssesek.

²¹—Hoy, katnehek sa' ma'a kéltáhakxa nak —axta entáhak eyátegmowágko Rahab. Tén axta éláphasa eltaqhohok xa énxet'ák nak. Keñe axta Rahab ekteta táma ekyexwase m'a átog étkok nak.

²²Neyseksa meteymog élwenaqte axta apkelmahágkok apkelyexánegwokmo ekweykmoho ántánxo ekhem xa apqánet énxet nak, keñe m'a sẽlpextétamo apkelweynchámeyncha'a m'a ekyókxoho yókxexma apkelchetama eykhe, axta eyke elwetákxa'. Keñe apkelwákxo makham sẽlpextétamo m'a tegma apwányam nak Jericó.

²³Apkelántekkek axta neyseksa meteymog élwenaqte xa apqánet énxet nak, apkelyeykhákxeyk axta m'a wátsam Jordán, keñe apkelwákxo m'a aphakxa axta Josué. Apkeltennáseyha axta ekyókxoho ektáhakxa aqsok apkelwete.

²⁴Entáhak axta amya'a apcháneyákpo Josué s'e: “Wesse' egegkok egmeyásak negko'o s'e ekyókxoho xapop nak. Awanhók agko' éltamheykha apkelwáxok ma'a apyókxoho énxet'ák apheykha nak Jericó, negko'o eñamakxa'.”