Read Lengua Sur Josué 6 Bible Online

Josué 6 - Lengua Sur bible

Josué 6

¹Méko axta awanchek katxek, tén han katyapok ma'a tegma apwányam nak Jericó, hakte kélápegkokxeyk axta ekyókxoho atña'ák yaqwayam enxoho melántexek ma'a énxet'ák Israel.

²Wánxa agkok, aptáhak axta apcháneya Wesse' egegkok ma'a Josué: “Ekméssek ko'o kaxwók xeyep ma'a Jericó yetlo m'a wesse' apwányam apagkok tén han ma'a sẽlpextétamo apagkok.

³Kéxegke kélteme nak sẽlpextétamo Israel, kólteme sa' chá'a xama kélhaxnenchágweykekxa m'a tegma apwányam nak ekweykmoho seis ekhem.

⁴Siete apkelmaxnéssesso Dios énxet'ák apagkok sa' elxog ma'a amonye' nak yántéseksek ekhémo mók nélpaqhetchásamáxkoho, xama sa' chá'a yetlo apchaqkahasso élánamáxche nak nepkések apkennawók apkepetek, keñe sa' ekwokmo enxoho siete ekhem, kólhaxnenchágwakxak sa' makham ma'a tegma apwányam ekweykmoho siete kélhaxnencheyam, keñe sa' ma'a apkelmaxnéssesso Dios énxet'ák apagkok, elpáwáksek sa' aqsa m'a apkelaqkahasso nak neyseksa kélhaxnencheyam.

⁵Kélleg'ak sa' agkok kéxegke ekpáwà ekwenaqte m'a apchaqkahasso meyke ekhémo m'a mók nak, nágkóléságkoho aqsa kólwehesha, keykpentágwomhok sa' élyaqnenéyak ma'a kélhaxtegkesso nak tegma apwányam nápakhaw'ék, tén sa' kólchetamagkok kélyókxoho m'a tegma apwányam nak.”

⁶Apkelwóneyha axta Josué m'a apkelmaxnéssesso Dios énxet'ák apagkok. Aptáhak axta apkeláneya: “Kólsaw sa' yántéseksek ekhémo mók nélpaqhetchásamáxkoho apagkok nak Wesse' egegkok, cháxa siete nak kéxegke, kólxeg sa' ma'a amonye' nak yántéseksek yetlo kélaqkahasso élánamáxche nak nepkések apkepetek.”

⁷Keñe axta aptáha apkeláneya m'a énxet'ák: “Kólxeg, kólhaxnenchágwakxa makham ma'a tegma apwányam nak. Apmonye'e sa' elxog ma'a énxet'ák apkempakhe nak, amonye' nak ma'a yántéseksek Wesse' egegkok nak apagkok.”

⁸Apyókxoho axta aptamhágkok ma'a apkeltamhókxa axta etnahágkok Josué. Apkelxegkek axta xa siete apkelmaxnéssesso nak Dios énxet'ák apagkok, amonye' m'a yántéseksek ekhémo mók nélpaqhetchásamáxkoho apagkok nak Wesse' egegkok. Apkelpáwásegkek axta siete apkelaqkahasso, keñe m'a yántéseksek ekxegakmo m'a neptámen.

⁹Keñe m'a énxet'ák apkempakhe nak apkelxega m'a apmonye'e nak apkelmaxnéssesso Dios énxet'ák apagkok, tén ma'a énxet'ák apkelxegakmo natámen xa yántéseksek nak, axta kamassegwokmok apkelpáwasso apkelaqkahasso m'a apkelmaxnéssesso nak Dios énxet'ák apagkok.

¹⁰Apkeltamhók axta Josué elxog meyke apyennegkáseyak exma m'a sẽlpextétamo nak, ekwokmoho apkeltamho sa' melésagkok elwehesha.

¹¹Apkeltamhók axta Josué kólteméssesek xama kélhaxnenchegkesso yántéseksek ekpagkanamaxche nápakhaw'ék nak tegma apwányam, keñe axta apkelmeyákxo makham ma'a apkelpakxeneykegkaxa nak, axta apnaqteyenwákxak axta'a m'a.

¹²Mók ekhem axta entáhak, axto'ók agko' la'a apxatakha'a m'a Josué, keñe apkelmaxnéssesso nak Dios énxet'ák apagkok, apmákxo m'a yántéseksek Wesse' egegkok nak apagkok.

¹³Tén ma'a siete apkelmaxnéssesso Dios énxet'ák apagkok, apkelxega m'a amonye' yántéseksek Wesse' egegkok nak apagkok axta yaqnágwokmok. Axta han elwáteságkok apkelpáwasso m'a apkelaqkahasso nak; keñe m'a énxet'ák apkelempakhe apkelxega apmonye'e nak ma'a, tén axta m'a nápakha apkelxega m'a natámen nak yántéseksek, axta kamassegwokmok apkelpáwasso m'a apkelaqkahasso nak.

¹⁴Ánet ekhem axta entáhak apkelhaxnenchágweykxo makham ma'a tegma apwányam, keñe apkelmeyákxo makham ma'a apkelpakxeneykegkaxa nak. Seis ekhem axta weykmok aptamhéyak xa ektáha nak.

¹⁵Wokmek axta siete ekhem, amonye' élseyéxma axta apnaqxétekhágko keñe apkelxega, apkelmeyákxo makham ma'a nepyáwa nak tegma apwányam, aptamhágkaxa axta m'a sekxók axta. Wánxa agkok xa ekhem nak, apkelhaxnenchágweykxeyk axta eyke makham ekweykmoho siete.

¹⁶Xama axta apkelpáwasa apkelaqkahasso ekweykmoho siete m'a apkelmaxnéssesso nak Dios énxet'ák apagkok. Aptáhak axta Josué apkeláneya énxet'ák: “¡Nágkóléságkoho kólwehesha! Wesse' egegkok apmeyásak kéxegke s'e tegma apwányam nak.

¹⁷Kólmasséssem sa' ekyókxoho aqsok ekhéyak xa tegma apwányam nak, hakte Wesse' egegkok axta apkeltémo katnehek. Sa' aqsa megkólaqhek ma'a Rahab, ekteme nak kelán'a ekyaqmagkáseyak pók énxet ektegye selyaqye, tén han ma'a énxet'ák ektáha enxoho apkelyexánegwayam ma'a axagkok, hakte cháxa kelán'a nak ektáha axta élpósso m'a énxet'ák ektáha axta nélápháseykha.

¹⁸Kóltaqmelchesaxkoho sa' kéxegke, nágkólma aqsa tén han nágkólpaknegwomho m'a aqsok ekhéyak nak ma'a tegma apwányam, hakte appenchessek apkelpagkanma Wesse' egegkok yaqwayam kólmasséssók xa aqsok nak. Sa' agkok kólyahákxak kéxegke xa, kélsexnenagko kélagko' sa' kóltéhek ma'a apkelpakxeneykegkaxa nak énxet'ák Israel, kólhágwakxak sa' ma'a ekmaso agko' nak.

¹⁹Wesse' egegkok sa' eyke kólpagkanchesek ma'a sawo élyátekto élmomnáwa, tén han sawo ekmope élmomnáwa, keñe han ma'a ekyókxoho aqsok, cham'a sawo élyexwase nak, keñe han ma'a sawo ekyentaxno, sa' kólnegkenwakxak ma'a ekheykegkaxa nak aqsok élmomnáwa apagkok.”

²⁰Apkelwehéseyha axta énxet'ák tén han apkelpáwasa apkelmaxnéssesso Dios énxet'ák apagkok ma'a apkelaqkahasso. Xama axta apkelleg'a énxet'ák Israel élpáwa m'a apkelaqkahasso nak, keñe apkeleynawo apkelyennaqtéssawo apkelwehéseykha, yetlókok axta élyaqnenéyak ma'a kélhaxtegkesso nak nápakhaw'ék tegma apwányam. Apketámegkek axta ekpayhókxa nak apkelenmexma m'a tegma apwányam, tén axta apma.

²¹Keñe axta apkelnapa m'a énxet'ák, kelán'ák, sakcha'áletkók, tén han ma'a apkelwányam nak, sókwenaqte axta chá'a apkelyetxeyk, wokmók axta han apkelnapma m'a weyke apnaqtósso, nepkések, tén han yámelyeheykok. Ekyókxoho agko' axta apmasséssekmok.

²²Aptáhak axta apkeláneya Josué m'a apqánet apkelápháseykha ektáha axta apteyánegweykmoho m'a yókxexma nak: “Kólmohok sa' axagkok ma'a kelán'a ekyaqmagkáseyak pók énxet ektegye selyaqye, kóltekkessem sa' yetlo m'a ekyókxoho ekhawóxama, kéltáhakxa axta ex'a kéxegke kéláneya m'a.”

²³Keñe axta apkelántaxnegwokmo m'a Rahab axagkok, aptekkessek axta m'a yáp, egken, yetlo kelyáxeg, keñe han ma'a ekyókxoho ektáhakxa enxoho námakkok, keñe axta apnaqlákxo m'a yókxexma meykexa nak ekyennameykha exma, teyp apkelpakxeneykegkaxa nak énxet'ák Israel.

²⁴Tén axta apwatneykxo énxet'ák Israel ma'a tegma apwányam, kenhan ekyókxoho aqsok ekhéyak nak ma'a. Wánxa axta aqsa apkelma m'a sawo ekmope élmomnáwa, kenhan ma'a sawo ekyátekto élmomnáwa, tén han sawo élyexwase, keñe han ma'a sawo élyentaxno nak, keñe axta apnegkenwákxo m'a ekheykegkaxa nak aqsok élmomnáwa apagkok ma'a Wesse' egegkok.

²⁵Wánxa axta aqsa apwagkasa teyp Josué m'a Rahab tén han ekhawóxama, hakte cháxa kelán'a nak ektáha axta élpósso m'a énxet'ák ektáha axta apkeláphasso Josué m'a Jericó. Axta keñamak ekheykmo Rahab ma'a nepyeseksa nak énxet'ák Israel, ekwokmoho makham se'e ekhem nak.

²⁶Tén axta Josué aptáha appeywa apchésa énxet'ák se'e: “Eñássesagkohok sa' Wesse' egegkok ma'a énxet ektáha enxoho apmáheyo exátekhásekxak makham se'e tegma apwányam nak Jericó. Kólpátegkesek sa' tegma apowhók ma'a apketche apwányam, keñe sa' apketche apsexyo kóláhakkasek ma'a átog.”

²⁷Appasmomchek axta Wesse' egegkok ma'a Josué, payheykekxeyk axta apwesey m'a ekyókxoho yókxexma apheykegkaxa nak.