Read Lengua Sur Josué 7 Bible Online

Josué 7 - Lengua Sur bible

Josué 7

¹Xama aphawóxama axta m'a énxet'ák nak Judá apwesey axta Acán, Carmí apketche, Zabdí aptáwen, aptáha nak han pók aptáwen ma'a Zérah, apkelmeyk axta nekha aqsok ektáha axta kélpagkanchesso yaqwayam kólmasséssók. Axta keñamak élpehewákxo apkelsexnánémap nápaqtók Wesse' egegkok ma'a apyókxoho énxet'ák nak Israel, eñama apkelma aqsok apkeltémo axta eykhe kólmasséssók. Axta keñamak aplawa Wesse' egegkok apkeltaqnaweygko m'a énxet'ák nak.

²Apkeláphássek axta Josué nápakha énxet'ák apkeleñama m'a Jericó, yaqwayam elmahagkok ma'a yókxexma nak Ai, ekpayho nak ekteyapmakxa ekhem, teyp yókxexma Betel, ketók axta m'a yókxexma nak Bet-avén, apkeláneyákpexa axta etyánegwomhok ma'a yókxexma nak. Apkelxegkek axta apteyánegwokmoho m'a yókxexma Ai,

³keñe axta apkelwákxo makham. Aptáhak axta apcháneya m'a Josué: “Megkeyméxchek elxog apyókxoho énxet'ák yaqwayam elnapakpok ma'a énxet'ák nak Ai. Dos essenhan tres mil énxet'ák aphawók emok ma'a tegma apwányam nak. Ná eláphés aqsa apyókxoho énxet'ák, hakte apqántawok ma'a ektáha nak apkeláneykha m'a tegma apwányam.”

⁴Keñe axta apkelxega tres mil énxet'ák yaqwayam elnapakpok ma'a énxet'ák nak Ai. Apmenxenchek axta eyke m'a énxet'ák nak Ai, apkexpánchessek axta han.

⁵Aptekyókek axta treinta y seis israelitas; keñe m'a nápakha nak apmenxena eyeynmo m'a átog nak tegma apwányam ekweykmoho m'a kélhexyawassamakxa nak chá'a meteymog, axta apkelnáhápweykxak ma'a ekweyweykentamxa nak xapop. Axta keñamak apkelyelqákpo m'a énxet'ák, massék axta élyenna apkelwáxok.

⁶Keñe m'a Josué tén han ma'a apkelámha apmonye'e nak énxet'ák Israel, apkelyeptégkek axta apkelántaxno, apnegkenágkek axta han néten apqatkok ma'a xapop ánek magkenatchesso ekyetna ekyentaxno agko' éllapwámeyak; keñe axta apkelháxahágko ekyetnakxa m'a yántéseksek apagkok nak Wesse' egegkok, apkeltekxeyágkek axta nápaqta'a xapop ekwokmoho ektaxnakmo.

⁷Keñe axta aptáha Josué s'e: —¡Wesse' egegkok! ¿Yaqsa ektáha apkeltamho axta elyeykhak énxet'ák apagkok ma'a wátsam Jordán? ¿Peyk enxeykel'a yohok aqsa hẽlmok ma'a amorreos yaqwayam hegmasséssók? ¡Táse' nak axta eykhe ókhegwak aqsa m'a neyp nak wátsam Jordán!

⁸¡Wesse' egegkok! ¡May'ásegkok ko'o yaqwánxa atnehek sekpeywa! Hakte apkenyahágkek kaxwók ma'a énxet'ák Israel eñama apmenxenma m'a katnaha apnámakkok.

⁹Ellegak sa' amya'a ektáhakxa m'a cananeos, tén han ma'a apyókxoho apheykha nak ma'a yókxexma, keñe sa' epaxqeykxak ma'a nélenmexma nak, hegketámegmak sa'; hensawhohok sa' han hẽlnápok. ¿Háxko sa' etnehek xeyep megyohók kólwanyohok ma'a apwesey nak?

¹⁰Apchátegmowágkek axta Wesse' egegkok: —Exnekxa néten. ¿Yaqsa ektáha aptekxeya nak nápat xapop?

¹¹Apkelánegkek melya'assáxma m'a énxet'ák Israel, massék apkelánegko m'a ekhémo mók nélpaqhetchásamáxkoho séltémo axta elanagkok. Apkelmágkek ma'a aqsok séltémo axta eykhe kólmasséssók; apkelmenyexágkek han, apkelya'ásegkók eykhe apkelánegko aqsok ekmaso, keñe han apkelpóssákxo m'a neyseksa ekheykegkaxa nak apkelnaqta.

¹²Cháxa keñamak ma'a énxet'ák nak Israel, mexók sa' elenmexek ma'a katnaha nak apnámakkok. Yenyahagkok sa' aqsa chá'a apmonye'e, hakte payhawók kaxwo' kólmasséssók ma'a énxet'ák Israel. Sa' agkok kólmasséssekmok kaxwók xa séltémo axta kéxegke kólmasséssók, maxek sa' chá'a makham kélnepyeseksa kéxegke.

¹³Yempekxa néten, eláneyha m'a énxet'ák nak, eltennés sa' yának elánekxak aptamhágkaxa yaqwayam elmeyenták ko'o emonye' m'a élsaka sa', hakte ko'o sekteme Wesse', Dios apagkok nak ma'a énxet'ák Israel, ektáhak se'e: ‘Kéxegke Israel, kélmeyk ma'a aqsok séltémo axta kólmasséssók ekyókxoho. Sa' agkok kólmasséssekmok kéxegke m'a aqsok séltémo axta kólmasséssók, megkólxohók sa' kólenmexek ma'a katnaha nak kélnámakkok.’

¹⁴Saka sa' kólwaták kélyókxoho ektáhakxa nak chá'a énxet'ák kélagkok, keñe sa' ma'a énxet'ák nak, ko'o sa' chá'a axének wának yánchásekxohok ma'a aphawóxama; keñe sa' ma'a aphawóxama nak, ko'o sa' chá'a wának yánchásekxohok ma'a apnámakkok apagko' nak; keñe m'a apnámakkok apagko' nak, ko'o sa' chá'a wának exének ma'a ektáhakxa enxoho énxet apagkok.

¹⁵Keñe m'a énxet ektáha enxoho apkelma m'a séltémo axta kólmasséssók ekyókxoho, kólwatnekxak sa' yetlo apketchek, keñe han ma'a ekyókxoho aqsok apagkok, eñama apkelane aqsok ekmaso nepyeseksa m'a énxet'ák Israel, keñe han melyaheykekxoho m'a ekhémo mók nélpaqhetchásamáxkoho eñama nak Wesse' egegkok.

¹⁶Mók ekhem axta entáhak Josué aphákxo néten axto'ók agko' la'a, keñe axta apkeltamho elmahagkok ma'a énxet'ák ektáha axta kélexpánchesso. Tén axta Wesse' egegkok apxéna m'a énxet'ák apagkok nak Judá.

¹⁷Keñe axta Josué apkeltamho elyepetchegwomhok xama chá'a m'a Judá énxet'ák apagkok, ektáhakxa nak chá'a apnámakkok apagko', keñe axta élpehewákxo apkelxénamap ma'a apnámakkok nak Zérah. Tén axta kélyetnakhasa m'a aphawóxama nak Zabdí, nepyeseksa nak Zérah énxet'ák apagkok.

¹⁸Xama axta apkelyepetchegwokmo xama xama chá'a m'a aphawóxama nak Zabdí, keñe apxénákpo m'a Acán, apketche nak Carmí, aptáwen nak ma'a Zabdí, kenhan pók aptáwen ma'a Zérah, cham'a apteme axta énxet'ák apagkok ma'a Judá.

¹⁹Aptáhak axta Josué apcháneya m'a Acán: —Eyáxeg, etnésses sa' apcheymákpoho Wesse' egegkok, Dios apagkok nak Israel. Héltennés sa' ma'a aqsok apkelane nak. ¡Ná ekpós aqsa!

²⁰Apchátegmowágkek axta Acán: —Naqsók axta ko'o sélana aqsok ekmaso énmexma nak Wesse' egegkok, Dios nak Israel. Keso sélana axta ko'o s'e:

²¹Ekwet'ak axta xama apáwa kélaqlamaxche aptaqmalma apagko' apkelánamap axta m'a Babilonia, neyseksa m'a aqsok nélmágko axta Jericó, keñe han sekwet'a doscientos selyaqye aktek élmope, tén han xama sawo ekyátekto ekmomnáwa, medio kilo axta ekyentaxno m'a. Keltásek axta eyke ko'o sélano m'a aqsok nak keñe sélma. Élátawanyeyk axta m'a kóneg sekpakxanmakxa nak, cham'a nékhegweykemxa nak, keñe selyaqye sekpekkena m'a kañók agko'.

²²Yahamok axta apkeláphasa Josué énxet'ák ma'a appakxanmakxa nak Acán, apkelwetágwokmek axta ekyókxoho aqsok apkelpósso axta Acán, yetlo selyaqye m'a kañók agko'.

²³Apkelmágkek axta, keñe kélsákxésa m'a Josué, kenhan ma'a énxet'ák nak Israel, tén axta han kélsákxésa m'a Wesse' egegkok.

²⁴Tén axta kélyentamákxo Acán ma'a yókxexma ekyapwátegweykenxa nak ma'a Acor yetlo m'a selyaqye, apchaqlamap, sawo ekyátekto ekmomnáwa, yetlo m'a apketchek apkelennay'a, apketchek kelwán'ák, keñe han ma'a weyke apnaqtósso, yámelyeheykok, nepkések, tén han apkelnaqta, ekyókxoho m'a ektáhakxa nak apagkok.

²⁵Aptáhak axta apcháneya Josué: —¿Yaqsa ektáha séghágwa'akto nak xeyep negko'o xa aqsok ekmaso nak? Wesse' egegkok sa' yának kápekxak kaxwók xép xa aqsok ekmaso séghágwa'akto nak negko'o. Natámen apteme appeywa axta Josué xa, keñe apyókxoho énxet'ák Israel apkelyetna'a meteymog apchaqha m'a Acán, yetlo m'a ekyókxoho apketchek, aptáwa', tén axta kélwatnékxoho han.

²⁶Keñe han kéláhakkáseykxo ekxámokma agko' ma'a meteymog, makhemek makham émha xa meteymog nak. Cháxa keñamak ektéma nak makham ekwesey yókxexma ekyapwate Acor ma'a. Tén axta ekmassa apkeltaqnawéyak Wesse' egegkok ma'a énxet'ák Israel.