Read Lengua Sur Jueces 10 Bible Online

Jueces 10 - Lengua Sur bible

Jueces 10

¹Aptekkek axta Tolá neptámen ma'a Abimélec yaqwayam elwagkasek teyp ma'a Israel, Tolá axta apteme apkeñama m'a nepyeseksa Isacar énxet'ák apagkok, Puá axta apketche, Dodó axta aptáwen. Axta aphak Tolá m'a Samir, meteymog élekhahéyak nak ma'a Efraín,

²veintitrés apyeyam axta weykmok apteme apkemha apmonye' m'a Israel, ekwokmoho apketsapa, kélátawanyeyk axta m'a Samir.

³Keñe axta aptépeykxo makham Jaír, apkeñama axta m'a Galaad, veintidós apyeyam axta weykmok apteme apkemha apmonye' m'a Israel.

⁴Treinta axta apyókxoho apketchek ma'a Jaír, xama xama axta chá'a apkelchánte yámelyeheykok. Yetneyk axta han chá'a xama tegma apwányam apagkok apagko' ma'a Galaad. Cháxa treinta tegma apkelyawe nak, makhemek makham kélteme “Jaír tegma apkelyawe apagkok”.

⁵Xama axta apketsapa Jaír, kélátawanyegwákxeyk axta m'a Camón.

⁶Apkeláneykegkokxeyk axta makham apkeltémakxa ekmaso israelitas nápaqtók Wesse' egegkok, apkelpeykessamók axta m'a mók ektémakxa nak kéleykmássesso Baal tén han Astarté, tén han ma'a aqsok kéláyókxa nak Siria, tén han Sidón, Moab, Amón keñe han ma'a filisteos. Apyamasmeyk axta Wesse' egegkok, massegkek axta apkelpeykessamo.

⁷Axta keñamak apkeltaqnaweykegko Wesse' egegkok ma'a, tén axta apkelmésa m'a filisteos, tén han amonitas.

⁸Dieciocho apyeyam axta apnaqtawáseykegkoho ekmaso agko' filisteos, tén han amonitas ma'a apyókxoho énxet'ák nak Israel, apheykencha'a axta m'a Galaad, neyp nak ma'a Jordán, xapop apagkok axta m'a amorreos.

⁹Apkelyeykhákxeyk axta amonitas ma'a Jordán yaqwayam elnapakpok ma'a Judá énxet'ák apagkok, Benjamín tén han Efraín. Keñe axta israelitas apkelwet'a ekyentaxno agko' apheykha.

¹⁰Keñe axta apkeltamho epasmok Wesse' egegkok. Aptáhak axta apcháneya s'e: “Dios egagkok, nenláneykegkek negko'o mólya'assáxma nénmexeykekxo exchep, negyamasmeyk nélpeykessamo m'a aqsok kéláyókxa élmowancha'a amya'a nak.”

¹¹Aptáhak axta apchátegmowágko Wesse' egegkok se'e: “Apnaqtawáseykegkók axta kéxegke egipcios, amorreos, amonitas, filisteos,

¹²sidonios, amalecitas tén han madianitas; xama axta sélwóneykencha'a ko'o kéxegke, élwagkassegkek axta teyp.

¹³Élyamasmeyk eyke ko'o makham kéxegke kélpeykásawo m'a mók aqsok kéláyókxa nak, megkólhaxanmak sélwagkasso teyp, malwagkasek sa' ko'o kaxwo' teyp kéxegke.

¹⁴¡Kólxeg kólmaxnegwakxa yaqwayam kapasmok ma'a aqsok kéláyókxa kélyéseykha axta kéxegke! ¡Sa' kalwagkasek teyp kéxegke m'a neyseksa ekyentaxno kélheykha!”

¹⁵Keñe axta israelitas aptáha apkelátegmowágkokxo Wesse' egegkok se'e: “¡Nenláneykegkek negko'o mólya'assáxma! Hentemésses negko'o ekxénakxa enxoho apwáxok henteméssesek, ¡eyke hẽlwagkas negko'o teyp se'e kaxwo' nak!”

¹⁶Tén axta israelitas apkexeygko m'a aqsok kéláyókxa éleñama nak mók nekha, yaqwayam elpeykeshok makham ma'a Wesse' egegkok. Massék axta ekyenna apwáxok Wesse' egegkok apkelano ektémakxa apkellegeykegkoho chá'a m'a israelitas.

¹⁷Apchaqnákxeyk axta amonitas, apkelpakxenwokmek axta m'a Galaad. Apchaqnákxeyk axta han israelitas, apkelpakxenwokmek axta m'a Mispá.

¹⁸Aphésawók axta han mók apkelpeywa israelitas, apheykencha'a axta m'a Galaad, tén han apkelámha apmonye'e apagkok, etnehek apkemha apmonye' apyókxoho nepyeseksa apheykha nak Galaad ma'a apteme nak apkemha apmonye' kempakhakma elenmexek ma'a amonitas.