Read Lengua Sur Jueces 11 Bible Online

Jueces 11 - Lengua Sur bible

Jueces 11

¹Jefté axta apteme xama kempakhakma yáp megyeye emhagkok eyesagkexa apkeñama axta m'a yókxexma Galaad, kelán'a ekyaqmagkáseyak pók énxet ekma ekyánmaga étche axta m'a, keñe axta apyáp ma'a Galaad,

²wetayak axta han pók étchek ma'a Galaad aptáwa', keñe axta apkektegama, kéltekkesa apxagkok ma'a Jefté, kéltennássek axta han melxewekxeyk xama aqsok apagkok ma'a apyáp, eñama apteme mók kelán'a étche.

³Apteyepmeyk axta nepyeseksa apkelyáxeg ma'a Jefté, apheykmek axta m'a yókxexma Tob, appáxaqweykmek axta énxet élmasagcha'a apkeltémakxa, elweynchamha axta chá'a xamo'.

⁴Yáma wenaqtémók axta han apketámeykegko amonitas ma'a Israel,

⁵keñe axta m'a apkelámha apmonye'e nak Galaad, apkeltamho kólyentawakxak Jefté m'a yókxexma Tob.

⁶Axta táhak amya'a apcháneyákpo s'e: —Émpoho, egmenyeyk negko'o etnehek xép apkemha apmonye' egagkok kempakhakma yaqwayam ólenmexek ma'a amonitas.

⁷Apchátegmowágkek axta Jefté: —¡Éltaqnagkamchek axta ko'o kéxegke, kéltémok axta atyapok táta apxagkok! ¿Yaqsa ektáha sélchetama nak eyesagko kélheykha?

⁸—Neykhe keñamak negketama nak xép, hakte negwet'ak ekmaso negheykha —axta aptáhak apkelátegmowágko m'a—. Néltamhók negko'o hẽlyetlakxak xép, tén han elnapakpok ma'a amonitas, apkemha apmonye' egagkok sa' etnehek negyókxoho negheykha nak Galaad.

⁹—Kéltamhók agkok kéxegke ataqhohok makham yaqwayam alnapaxchek ma'a amonitas, emallahanchessek sa' agkok ko'o Wesse' egegkok, atnehek sa' apkemha apmonye' kélagkok kéxegke —axta aptáhak apchátegmowágko Jefté.

¹⁰Tén axta apkelámha apmonye'e aptáha apkelátegmowágko s'e: —Anlának sa' ekyókxoho m'a aptáhakxa nak segáneya, Wesse' egegkok sa' etnehek apweteykegkoho.

¹¹Tén axta apkelyetlákxo Jefté m'a énxet'ák nak, apteméssessek axta han apkemha apmonye' apagkok, tén han apnaqleykha sẽlpextétamo. Apkeláneykxók axta chá'a appeywa Jefté nápaqtók Wesse' egegkok aptáhakxa axta chá'a appeywa, cham'a Mispá.

¹²Tén axta apkeláphasa apseykha amya'a aphakxa m'a wesse' apwányam amonitas apkeltamho etnehek elmaxneyha s'e: “¿Yaqsa aqsok eklókassama apwáxok apmáheyo ko'o hénmexek xép, peya nak ektámegmak seyókxa?”

¹³Aptáhak axta wesse' apwányam amonitas apkelátegmowágkokxo m'a Jefté axta apkelápháseykha: “Israelitas, ẽlyementamomchek axta negko'o xapop egagkok kélánteyapma axta kéxegke m'a Egipto, eyeynmo m'a wátsam Arnón, ekweykekxoho m'a wátsam Jaboc tén han Jordán. Hẽlmeyásekxa kaxwo' yetlo meyke ektáhakxa kélwáxok.”

¹⁴Apkelápháseykxeyk axta makham pók apseykha amya'a Jefté aphakxa m'a wesse' apwányam apagkok amonitas.

¹⁵Aptáhak axta apcháneya s'e: “Keso aptáhakxa nak apchátegmowéyak Jefté s'e: Mólyementameykegkok negko'o xapop apagkok moabitas, tén han amonitas, negko'o nentáha nak israelitas.

¹⁶Nélyeykheykekxeyk axta yókxexma meyke nak énxet ekweykekxoho m'a Wátsam Ekyexwase, nélánteyapma axta m'a Egipto, nélweykmek axta m'a Cadés.

¹⁷Tén axta néláphassama apseykha amya'a aphakxa m'a wesse' apwányam Edom, yaqwayam ólmaxnak yohok ólyeykhak ma'a xapop apagkok nak, axta eyke héghayók ólyeykhak negko'o. Nélmaxnagkamchek axta eykhe han ma'a wesse' apwányam nak Moab, axta eyke han yahayók ólyeykhak ma'a xapop apagkok nak. Axta keñamak negheykmo aqsa m'a Cadés.

¹⁸Nélxegamchek axta m'a yókxexma meykexa nak énxet, neghaxnenchámeykekxeyk axta m'a xapop nak Edom, tén han Moab, ekwokmoho nélweykmo m'a ekteyapmakxa ekhem nak ma'a teyp Moab. Nélpakxenweykmek axta m'a neyp nak wátsam Arnón. Axta eyke ólyekheykekxa', hakte axta eyeynókxa xapop Moab ma'a.

¹⁹Keñe axta néláphassama han apseykha amya'a m'a aphakxa nak Sihón, wesse' apwányam apagkok nak amorreos, aphama axta m'a Hesbón, nélmaxnagkama néltémo yohok ólyeykhekxak xapop apagkok, yaqwayam enxoho ólmeyekxak ma'a xapop egagkok nak.

²⁰Axta eyke etnéssessók naqsók nélpeywa negko'o m'a Sihón, axta yahayók ólyeykhak ma'a xapop apagkok; apcháncheseykekxeyk axta aqsa apyókxoho sẽlpextétamo apagkok, keñe apkelpakxenweykmo m'a Jahas, tén axta segketámeykegko.

²¹Ẽlmallahanchessegkek axta eyke negko'o m'a Wesse' egegkok, Dios nak Israel, negyaqmassegkek axta m'a Sihón yetlo sẽlpextétamo apagkok, negmomchek axta m'a ekyókxoho xapop apagkok nak amorreos, cháxa yókxexma nak:

²²Negmomchek axta ekyókxoho xapop apagkok nak amorreos, eyeynmo m'a wátsam Arnón ekweykekxoho m'a wátsam Jaboc, keñe han eyeynmo m'a meykexa nak énxet, ekweykekxoho m'a Jordán.

²³Keñe kaxwo' peya hegyementamok xép ma'a Wesse' egegkok axta apyementama m'a amorreos segméssama negko'o.

²⁴Méssegkek agkok xapop apagkok ma'a Quemós, aqsok apcháyókxa nak, apagkok xép etnehek, keñe negko'óxa antéhek egagkok ma'a Wesse' egegkok nak segmésso.

²⁵¿Apkenagkamcheya exchep eyeykhágweykmohok ma'a Balac, Sipor apketche nak, wesse' apwányam nak Moab? Mehegya'aweyk negko'o hẽlnapakpok ma'a.

²⁶Trescientos apyeyam negko'o táhak negheykha s'e Hesbón, Aroer keñe han ma'a tegma apketkók aphéyak nak negyáwa', tén han ma'a apyókxoho tegma apkelyawe aphéyak nak neyáwa Arnón; ¿yaqsa eyke ektéma megkólmeykekxo makham kéxegke xa xapop nak, cham'a nanók axta?

²⁷Matnéssesseykmohok ko'o exma ekmaso exchep xama enxoho. Xeyep akke asagkek aptáhakxa segketamakmo. Wesse' egegkok akke apteme segyekpelchémo. Sa' elyekpelkohok israelitas, tén han amonitas.”

²⁸Axta eyke elyahákxak wesse' apwányam amonitas ma'a Jefté axta appeywa apcháphássesso.

²⁹Tén axta apweywento Wesse' egegkok espíritu apagkok aphakxa m'a Jefté aptáha apxegexma, tén axta apmahágko m'a Galaad tén han Manasés, apyeyk'ak axta m'a Mispá nak Galaad, yaqwayam enxoho etaxnegwók ma'a amonitas nak xapop apagkok.

³⁰Keñe axta Jefté apmésa appeywa m'a Wesse' egegkok: “Emallahanchessek sa' agkok nepyeseksa m'a amonitas,

³¹awatnések sa' ko'o exchep xama ektáha enxoho apmonye' apteyapma m'a exagkok sema takha', sekwákxo sa' makham sényékto enxoho m'a émpakháxchexa'.”

³²Aptaxnegwokmek axta Jefté m'a yókxexma apagkok nak amonitas, keñe axta apketámegko, apmallahanchessek axta han ma'a Wesse' egegkok.

³³Apxámok axta apkelnapma Jefté m'a apkelenmexma, apkelmeyk axta veinte tegma apkelyawe, cham'a Aroer, Minit tén han Abel-queramin. Cháxa aptemessásekxo axta kóneg israelitas ma'a amonitas.

³⁴Xama axta apwákxo apxagkok Jefté, cham'a Mispá, kelanyexágkek axta ekma takha' m'a apketche kelwána ekteme axta wánxa xama, néweyha axta yetlo ekpáwasso nélaqtawáseykha. Méko axta han pók apketche enxoho m'a,

³⁵xama axta apwet'a, apkelyepteyk axta aptaxno mey'ásegko yaqwánxa etnehek. Aptáhak axta apcháneya s'e: —¡Hay, hatte seyásekheyo, awanhe nak la'a sélapwagkasso! ¡Xeye keñamak sekwet'a ekyentaxnamo agko' ewáxok, hakte ekméssek axta ko'o sekpeywa m'a Wesse' egegkok, alának sa' han kaxwo'!

³⁶Keñe axta ektáha eyátegmowágko: —Táta, hetnésses sa' ma'a aptáhakxa axta ex'a apkeltennasso m'a Wesse' egegkok, hakte apkelanak ma'a apxénakxa axta etnéssesek, apmésa apmallanma nepyeseksa m'a apkelenmexma amonitas.

³⁷Éltamhók eyke hegkések sekxók yaqwayam aweynchamha apqánet pelten ma'a xóp élekhahéyak nak, yetlo énámakkok, yaqwayam enxoho alekxagwaha peya watsapok neyseksa mehelyaphopma.

³⁸Apméssek axta apqánet pelten ma'a Jefté, weynchámeykha axta xóp élekhahéyak xa ekhem nak, yetlo námakkok, kelekxagweykha axta ekmáheyo katsapok neyseksa megkalyamhopma.

³⁹Kexyeykmek axta makham aphakxa yáp ekweykmo xa apqánet pelten nak, apkelanak axta han ma'a apkeltennassama axta elanaksek ma'a Wesse' egegkok. Ketsepmeyk axta Jefté apketche neyseksa megkapathetéyak xama énxet enxoho.

⁴⁰Cháxa keñamak ektéma nak nepyeseksa m'a israelitas yókxoho apyeyam, kallekxagwaha chá'a kelán'a étkók, eñama m'a Jefté axta apketche, ekweykmoho cuatro ekhem.