Read Lengua Sur Jueces 12 Bible Online

Jueces 12 - Lengua Sur bible

Jueces 12

¹Apchaqnákxeyk axta Efraín énxet'ák apagkok, keñe apkeltámeyákxo m'a Jordán apkelmahágko yókxexma nak Safón, tén axta ektáha amya'a apcháneyákpo Jefté s'e: —¿Yaqsa axta ektáha mehẽltennássekxo apketámegko amonitas yaqwayam enxoho agyetlók? ¡Agwatneyásekxak sa' kaxwo' xép apxagkok, yetlo apha exchep ma'a kañe'!

²Apchátegmowágkek axta Jefté: —Nélenmexáxchekxeyk axta negko'o m'a amonitas, ko'o tén han ma'a énxet'ák ahagkok, éláneyeykha axta eykhe ko'o kéxegke, keñe mehelpásegweykto.

³Xama axta sekwet'a kéxegke mehelya'aweykto yaqwayam hélpásegwata', keñe magweygwákxo sekmahágko eyesagkexa', étámegkek axta m'a amonitas, emallahanchessek axta han Wesse' egegkok. ¿Yaqsa ektáha kélxegakmo nak yaqwayam hélnapaxchek ko'o?

⁴Tén axta Jefté apchánchesákxo apyókxoho énxet'ák Galaad, apkelnápekpek axta m'a Efraín énxet'ák apagkok, apmenxenchek axta han. Elxénmakha axta chá'a Efraín énxet'ák apagkok apheykha nak Galaad, apkelánteyapma m'a Efraín, cham'a apheykencha'a axta m'a teyp nak Efraín halep nak Manasés.

⁵Apkelyementamomchek axta énxet'ák Galaad, Efraín ma'a apkelmalláneykekxexa axta chá'a Jordán, apwákxeyk axta agkok chá'a xama Efraín énxet'ák apagkok yenyehek ma'a, keñe elmaxneyha chá'a yaqwayam eyeykha', kólmaxneyha axta chá'a, axta katnehek chá'a amya'a yánékpok se'e: háweya exchep Efraín énxet'ák apagkok, keñe aptáha enxoho chá'a háwe',

⁶kólának axta chá'a etnehek epaqmétek se'e: “Shibolet”. Aptemék axta agkok chá'a “Sibolet”, hakte mopwanchek etnehek exének xa ektáha nak, emakpok axta chá'a, keñe emátog, cham'a nekha nak chá'a apkelyeykheykekxexa énxet'ák ma'a Jordán. Cháxa ekhem nak aptekyawakxa axta cuarenta y dos mil Efraín énxet'ák apagkok.

⁷Seis apyeyam axta apteme apkemha apmonye' apagkok israelitas ma'a Jefté. Xama axta apketsapma, kélátawanyegkek axta m'a Galaad, apchókxa axta.

⁸Ibsán axta aptemék apkemha apmonye' apagkok israelitas neptámen ma'a Jefté, apkeñama axta m'a Belén,

⁹treinta axta apyókxoho apketchek apkelennay'a, treinta han ma'a kelwán'ák, ekyókxoho axta apkelyamhakkáseykegkok apkelméssama m'a énxet'ák apkeleñama nak mók nekha. Siete apyeyam axta apteme apkemha apmonye' apagkok Israel ma'a Ibsán,

¹⁰keñe axta apketsapma, kélátawanyegkek axta m'a Belén.

¹¹Elón axta han aptemék apkemha apmonye' apagkok israelitas neptámen ma'a, apkeñama nak nepyeseksa Zabulón énxet'ák apagkok, ekweykmoho diez apyeyam,

¹²keñe axta apketsapma, kélátawanyegkek axta m'a Aialón, xapop apagkok axta m'a énxet'ák apagkok.

¹³Keñe axta han neptámen ma'a aptéma han apkemha apmonye' apagkok israelitas ma'a Abdón, Hilel axta apketche, apkeñama nak ma'a Piratón,

¹⁴ekweykmoho ocho apyeyam. Cuarenta axta apyókxoho apketchek ma'a Abdón, keñe treinta aptawán'ák, xama xama axta chá'a apkelchánte m'a yámelyeheykok.

¹⁵Keñe axta apketsapma, kélátawanyegkek axta m'a Piratón, ekyetnama axta m'a Efraín énxet'ák xapop apagkok, egkexe élekhahéyak nak Amalec.