Read Lengua Sur Jueces 13 Bible Online

Jueces 13 - Lengua Sur bible

Jueces 13

¹Apkelánegkokxeyk axta makham aqsok ekmaso nápaqtók Wesse' egegkok ma'a israelitas, keñe axta Wesse' egegkok apkeltémo elmok ma'a filisteos ekweykmoho cuarenta apyeyam.

²Aphegkek axta xama énxet apwesey axta Manoa m'a Sorá, Dan axta énxet'ák apagkok. Axta kateyk xama enxoho étche m'a aptáwa', hakte megkate étche axta.

³Apxekmowásekpók axta eyke Wesse' egegkok apchásenneykha m'a, aptáhak axta apcháneya s'e: “Megkateyk xeye étche xama enxoho, lósók sa' eyke katnehek kaxwo'. Kótak sa' xama étche apkenna'.

⁴Nágkayen aqsa m'a vino, tén han ma'a mók anmen ekyennaqte nak, nágkatow han xama enxoho m'a aqsok ekmanyása,

⁵kótak sa' xama étche apkenna', megkalyaqténchesek sa' han apwa' xama enxoho, hakte epagkanchesakpok sa' Dios xa sakcha'a nak, yaqwayam etnehek nazareo amonye' aptéyam, yaqwayam sa' etnehek apkelwagkasso teyp israelitas, neyseksa apkelma m'a filisteos.”

⁶Keltennássekxeyk axta atáwa' m'a kelán'a. Axta entáhak eyáneya s'e: “Xama Dios énxet apagkok xeyk ey'awak sekhakxa, etlakkásawók ahagko' han, hakte máxa eykhe m'a Wesse' egegkok apchásenneykha. Malmaxneyáha han yaqsak kexa énxet, meheltennásak han ko'o m'a.

⁷Wánxa aqsa aptáha seyáneya ko'o apxéna ótak xama hatte apkenna'. Keñe han apxéna keso kaxwo' nak meltamho eynek vino, tén han ma'a mók anmen ekyennaqte nak, keñe han meltamho atwok ma'a aqsok élmanyása, hakte apxénchek xeyk sakcha'a etnehek appagkanchásamap ma'a Dios yaqwayam etnehek nazareo, amonye' aptéyam, tén han ekwokmoho apketsapa.”

⁸Tén axta Manoa aptáha apcháneya Wesse' egegkok apkelmaxneya s'e: “Wesse' ahagkok, éltamhók eykhe ko'o yáphásekxak makham neghágkaxa xa énxet nak, yaqwayam enxoho hẽltennaksek eyeyméxchexa negko'o anteméssesek ma'a sakcha'a peya nak etyamok.”

⁹Apleg'ak axta Dios aptáhakxa apkelmaxnagko m'a Manoa, apxekmowásekpekxók axta makham apchásenneykha m'a kelán'a, neyseksa ekha yókxexma. Méko axta eyke Manoa m'a,

¹⁰keñe étchágkokxo éltennássekxo: —¡Exekmowásekpekxók ko'o makham énxet sekwet'a axta m'a mók ekhem axta!

¹¹Apchampákxeyk axta néten Manoa apyetlákxo aptáwa' m'a apkenmágkaxa axta m'a énxet. Aptáhak axta apcháneya s'e: —¿Xépya appaqhetchesa axta etáwa' m'a mók ekhem axta? Keñe axta aptáha apchátegmowágko m'a énxet nak: —Éhay, ko'o.

¹²Tén axta aptáha Manoa s'e: —Temék sa' agkok ma'a aptáhakxa nak xép segáneya, ¿háxko sa' anteméssesek negko'o negwánegkesso m'a sakcha'a? ¿Háxko sa' anteméssesek ma'a?

¹³Apchátegmowágkek axta Wesse' egegkok apchásenneykha: —Kalának sa' aptáwa' ekyókxoho m'a sektáhakxa exchek seyáneya:

¹⁴megkeynhek sa' vino, tén han ma'a mók aqsok élánamáxche nak anmen yámet ekyexna, keñe han ma'a mók anmen ekyennaqte nak, megkatwehek sa' han ma'a aqsok ekmanyása nak. Kalának sa' aqsa m'a séltamhókxa exchek katnehek.

¹⁵Aptáhak axta apcháneya Manoa m'a énxet nak, neyseksa mey'áseyak apteme Wesse' egegkok apchásenneykha: —Exa sa' sekxók neghágkaxa negko'o, antawagkok sa' yát'ay apketkok peya nak ko'o wahánek. Aptáhak axta Wesse' egegkok apchásenneykha apchátegmowágko s'e: —Mowanchek ko'o apasmok xép apto, megkeyxek sekheykekxa'. Apwanchek eyke exchep ewatnések Wesse' egegkok ma'a yát'ay apketkok nak.

¹⁷Tén axta Manoa aptáha apcháneya Wesse' egegkok apchásenneykha s'e: —Hẽltennés hana negko'o exchep apwesey, yaqwayam sa' agmések ekxeyenma egwáxok ektáha enxoho m'a aptáhakxa nak segáneya.

¹⁸Apchátegmowágkek axta Wesse' egegkok apchásenneykha: —¿Yaqsa ektáha apkeltamho nak ey'asagkohok sekwesey? Ekwányam agko' ko'o m'a sekwesey, megkólya'asagkehe'.

¹⁹Apmeyk axta Manoa xama yát'ay apketkok apchaqha, keñe han ma'a aqsok ekyexna kélcheneykekxa apmésso naqsa, apnegkenchek axta néten meteymog, apwatnéssek axta m'a Wesse' egegkok. Tén axta Wesse' egegkok apkelana aqsok sempelakkasso agweta', nápaqtók ma'a Manoa tén han aptáwa':

²⁰xama axta ekmeyákxo néten táxa eyáléwe m'a ekwatnamáxchexa nak aqsok, apwet'ak axta Manoa tén han aptáwa' apmeyákxo néten ma'a Wesse' egegkok apchásenneykha neyseksa táxa eyáléwe. Yetlókok axta han élháxahéyak ekwokmoho éltekxekwa'akto naqta'a xapop.

²¹Apya'ásegwokmek axta Manoa apteme Wesse' egegkok apchásenneykha xa énxet nak, massémók axta han apxekmowásamákpoho chá'a, tén han ma'a aptáwa';

²²tén axta aptáha apcháneya aptáwa' s'e: —Agmaskok sa', hakte negwet'ak ma'a Dios.

²³Axta táhak eyátegmowágkokxo aptáwa' s'e: —Apkeltamhók agkok hẽlnápok negko'o m'a Wesse' egegkok, memhehek xeyk takha' m'a aqsok negwatnésso, tén han ma'a aqsok negmésso naqsa nak, mehenxekmósek xeyk han xa aqsok nak. Mehẽltennaksek xeyk han ekyókxoho xa aptáhakxa nak segáneya.

²⁴Wet'ak axta han xama étche apkenna' m'a kelán'a nak, Sansón axta han temessásak apwesey. Apwánegyek axta m'a sakcha'a nak, appasmomchek axta han Wesse' egegkok.

²⁵Xama ekhem axta neyseksa apha Sansón ma'a apkelpakxeneykegkaxa nak Dan énxet'ák apagkok, teyp nak Sorá halep nak Estaol, cheynawók axta ektaxna apwáxok Wesse' egegkok apmopwána.