Read Lengua Sur Jueces 17 Bible Online

Jueces 17 - Lengua Sur bible

Jueces 17

¹Aphegkek axta xama énxet ma'a egkexe nak Efraín apwesey axta Micaías,

²aptáhak axta apcháneya egken se'e: —Ekleg'ak axta ko'o kélmenyexchesa mil cien sawok selyaqye aktek élmope, tén han ekyemnéncha'a m'a ektáha nak apmenyexma, ko'o ekmáha xa selyaqye nak. Ko'o axta ekmenyexchásak; almeyásekxak sa' eyke makham, hakte ekleg'ak xeyk ko'o ekxéna ekpagkanchesso Wesse' egegkok, yaqwayam kának kalanaxchek xama aqsok kéleykmássesso kélyepetchesso nak émpehek sawo ekmope ekmomnáwa. Apkelmeyásekxeyk axta makham ma'a selyaqye. Tén axta egken ektáha s'e: —¡Wesse' egegkok sa' epasmok, hatte seyásekhayo!

⁴Xama axta apkelmeyásekxo selyaqye egken ma'a Micaías, keñe élmésa doscientos sawok selyaqye aktek élmope m'a apkeláneyo nak chá'a sawo ekmope ekmomnáwa, yaqwayam enxoho elának xama kéleykmássesso kélyepetchesso nak émpehek sawo ekmope ekmomnáwa, tén axta ekpekkenchesa apxagkok ma'a Micaías.

⁵Yetneyk axta kélpeykessamókxa aqsok kéláyókxa apxagkok ma'a Micaías. Apkelanak apáwa apyaqwate efod, tén han ma'a aqsok kéleykmássesso kéláyókxa, apteméssessek axta han apkelmaxnéssesso énxet'ák agkok ma'a xama apketche.

⁶Elának axta chá'a ekxénakxa enxoho apwáxok elának énxet ma'a nanók axta, hakte méko axta makham wesse' apwányam apagkok ma'a Israel.

⁷Aphegkek axta han xama wokma'ák ma'a Belén apkeñama mók nekha, apkeñama axta nepyeseksa Judá énxet'ák apagkok, apteme axta levita.

⁸Apteyepmeyk axta Belén xa wokma'ák nak, aptegyeykencha'a mók aphakxa, apweynchámeykha axta m'a egkexe nak Efraín, keñe apweykmo m'a Micaías apxagkok.

⁹—¿Háxko apkeñamakxa'? —axta aptáhak apkelmaxneyáncha'a m'a Micaías. —Belén ko'o eñamak —axta aptáhak apchátegmowágko m'a wokma'ák—. Levita ko'o, sekhakxa eykhe ektegyáha.

¹⁰—Exna sa' se'e sekhakxa nak —axta aptáhak apcháneya Micaías—, apkelmaxnéssesso énxet'ák ahagkok sa' etnehek, tén han sepékessáseyak chá'a ko'o. Diez selyaqye aktek élmope sa' chá'a ayánmagkasek xama apyeyam, apáwa tén han apto.

¹¹Apkelyahákxók axta levita apkeltamho exek xamo' ma'a Micaías, máxa apketche axta han aptemék.

¹²Apteméssessek axta Micaías apkelmaxnéssesso énxet'ák apagkok, apheykmek axta han ma'a.

¹³Tén axta Micaías ekxeyenma apwáxok etaqmelchessesek apha m'a Dios, hakte levita axta apheykmok xamo' apteméssessama apkelmaxnéssesso énxet'ák apagkok.