Read Lengua Sur Jueces 18 Bible Online

Jueces 18 - Lengua Sur bible

Jueces 18

¹Méko axta makham wesse' apwányam Israel xa ekhem nak. Méko axta han xapop apagkok apagko' ma'a Dan nak énxet'ák apagkok, apkelweynchámeykha axta aqsa aptegyeykencha'a m'a yaqweykenxa exmakha.

²Axta keñamak Dan apkeláphassama cinco énxet'ák apagkok megyeye nak elmahagkok eyesagkexa apkeleñama m'a Sorá tén han Estaol, yaqwayam enxoho elanok yókxexma. Cháxa cinco apkelányo yókxexma nak, apkelmahágkek axta m'a egkexe nak Efraín, keñe apkelwokmo m'a Micaías apxagkok. Axta apnaqteyenwokmok han axta'a m'a.

³Apchágketchessekmek axta apxagkok Micaías, apyekpelchawók axta appeywa m'a wokma'ák levita, keñe axta apkelyo'ókmo aptáha apkelmaxneyáncha'a s'e: —¿Yaqsa axta ekyentamayam se'e? ¿Yaqsa ektéma aphaya s'e yókxexma nak? ¿Yaqsa aptegyeykencha'a?

⁴Apkeltennáseyha axta levita aptémakxa appeywa apkeláneya m'a Micaías, tén han aptémakxa apkeltémo etnehek apkelmaxnéssesso énxet'ák apagkok.

⁵Tén axta aptáha apcháneya s'e: —Elpaqhetchesakpoho hana Dios yaqwayam agya'asagkoho', tásek sa' kexa katnehek ekteyapma nélweynchámeykha.

⁶Tén axta levita apchátegmowágko, apteme axta apkelmaxnéssesso énxet'ák: —Kólxeg meyke ektamheykha kélwáxok. Wesse' egegkok sa' eltaqmelchesek kélmahágkaxa enxoho chá'a.

⁷Axta apkelchampa'awok han apkelmahágko Lais ma'a cinco apkelányo yókxexma nak. Méko axta éltamheykha apkelwáxok énxet'ák apheykha axta xa tegma apwányam nak, aptamheykegkaxa axta chá'a m'a sidonios; tásek axta apheykha, yetlo meyke ektáhakxa apkelwáxok, meyke élya'assóxma xama enxoho, méko axta han eyeyméxchexa. Tayépek axta han apheykegkaxa m'a sidonios, axta han epáxaqweykmok pók énxet'ák.

⁸Tén axta xa cinco apkelányo yókxexma nak apkelwáxok makham ma'a Sorá tén han Estaol, aphágkaxa axta m'a apkelxegexma'a. Aptáhak axta apkelmaxneyeyncha'a s'e: —¿Háxko ektáhakxa kélweynchámeykha? Aptáhak axta apkelátegmowágko:

⁹—Nélweynchámeyha negko'o m'a yókxexma nak, negwet'ak han ektaqmalma agko' ma'a xapop. ¡Nók! ¡Agketamagkok sa'! ¡Nágkólhakha aqsa xa kélhágkaxa nak, meyke kéllane xama aqsok! ¡Kéméxcheyk ólmahagkok agmok ma'a xapop nak!

¹⁰Kélwokmek sa' agkok ma'a, kólwetak sa' énxet meyke éltamheykha apkelwáxok, tén han ekxámokma xapop apagkok, méko eyeyméxchexa aqsok. Dios sa' egkések kéxegke yaqwayam kóltéhek kélagkok ma'a.

¹¹Apkelántekkek axta yókxexma Sorá tén han Estaol seiscientos Dan énxet'ák apagkok, yetlo apkelmeykha,

¹²apkelwokmek axta m'a Judá, apkelpakxenwokmek axta m'a ekpayho nak ektaxnegwánxa ekhem ma'a Quiriat-jearim, yókxexma ekwesey nak kaxwók Dan énxet'ák apagkok apkelpakxeneykegkaxa.

¹³Axta apkelchempekxohok makham apkelmahágko m'a egkexe nak Efraín, apkelwokmek axta m'a Micaías apxagkok.

¹⁴Keñe m'a cinco apkelányo axta m'a yókxexma Lais. Aptáha chá'a apkeláneya apkelxegexma'a s'e: —¿Kélya'ásegkóya kéxegke s'e tegma nak ekyetnama xama efod tén han aqsok kéláyókxa, tén han xama kéleykmássesso kélyepetchesso émpehek sawo ekmope ekmomnáwa? ¿Háxko sa' kólteméssesek?

¹⁵Tén axta m'a apkelányo axta yókxexma, apkelántepa nepyeseksa m'a nápakha nak, apkelmahágkek axta m'a apxagkok axta wokma'ák levita, cham'a Micaías apxagkok nak, apkelpeykeságkek axta.

¹⁶Keñe axta m'a seiscientos sẽlpextétamo Dan énxet'ák apagkok yetlo apkelmeykha, apkelhaxna m'a átog nak.

¹⁷Keñe m'a cinco apkelányo axta yókxexma, apkelántaxno axta apmonye'e m'a tegma, apmeyk axta m'a kéleykmássesso kélyepetchesso nak émpehek sawo ekmope ekmomnáwa, tén han efod, tén han ma'a aqsok kéláyókxa nak, keñe axta apkelmaxnéssesso énxet'ák apkenmeyncha'a m'a átog yetlo seiscientos sẽlpextétamo.

¹⁸Xama axta apwet'a apkelmaxnéssesso énxet'ák apagkok, apkelántaxna Micaías apxagkok ma'a cinco apkelányo yókxexma nak, tén han apma m'a kéleykmássesso, efod, tén han ma'a aqsok kéláyókxa. Aptáhak axta apkeláneya s'e: —¿Yaqsa kéllana?

¹⁹Keñe axta aptáha apkelátegmowágko: —¡Ewanma', hẽlyetlow sa' negko'o! ¡Néltamhok negko'o etnehek xép sẽlmaxnéssesso tén han sempékessáseyak chá'a! ¡Tásek xép etnehek apkelmaxnéssesso apyókxoho Dan énxet'ák apagkok apkeleñama nak Israel, kaxnók etnehek wánxa xama énxet!

²⁰Leyawók axta apwáxok apkelmaxnéssesso énxet'ák apagkok, apmeyk axta m'a kéleykmássesso, tén han efod, tén han ma'a aqsok kéláyókxa, apkelyetlókek axta m'a danitas.

²¹Tén axta apkelxegákxo makham, apmonye'e axta apkelxegak sakcha'a, tén han apnaqtósso, keñe han aqsok apagkok ekyetnakxa enxoho.

²²Apkelwegkekkek axta han apchaqnákxo m'a apheykha axta neyáwa Micaías apxagkok, yetlo m'a Micaías, apkelamhágkek axta.

²³Xama axta apkelleg'a apkelpáxamayam ma'a ektáha axta apkelamhéyak, apkelpeynchákpok axta neptámen ma'a danitas, keñe axta kélmaxneyáncha'a Micaías: —¿Yaqsa ektáha? ¿Yaqsa ektáha sẽlwónencha'a nak ekyennaqte?

²⁴Apchátegmowágkek axta Micaías: —Kélmeyk kéxegke aqsok séláyókxa sélane axta ko'o, kélyentegkek han apkelmaxnéssesso énxet'ák ahagkok, meyke aqsok ahagkok éltemessásak, ¡megkalnawék sélmaxneyáncha'a setnahakxa!

²⁵Aptáhak axta apkelátegmowágkokxo danitas se'e: —Ná hẽlpáxegkesha, ellók katnehek negko'o nápakha nélxegexma'a, keñe ektamagkok, yaqhek katnehek xép tén han ma'a aphawóxama nak.

²⁶Xama axta apwet'a Micaías apxáma apagko' ma'a, keñe aptaqháwo makham apxagkok; axta eyke eltaqhegwokmok ma'a danitas,

²⁷yetlo m'a aqsok ektáha axta apkelane Micaías, tén han ma'a apkelmaxnéssesso nak énxet'ák apagkok, apkelwokmek axta m'a Lais. Méko axta han éltamheykha apkelwáxok énxet'ák apheykha m'a, apkelnapchek axta apyókxoho m'a danitas apkelyetxaya chá'a sókwenaqte, apwatnékxók axta han ma'a tegma apwányam.

²⁸Méko axta han élmasma enxoho m'a, hakte tayépek axta m'a Sidón, axta epáxaqweykmok han chá'a pók énxet'ák. Axta apheykha m'a ekyapwátegweykenxa nak xapop ekyetnama nak ma'a Bet-rehob. Apxátekhásekxeyk axta makham danitas ma'a tegma apwányam nak, tén axta apheykencha'a m'a.

²⁹Lais axta ekwesey eykhe sekxók ma'a, keñe aptemessáseykekxo ekwesey Dan, ekxénweykekxoho apwáxok ma'a apyáp nano', Israel axta apketche.

³⁰Axta appekkenwomhok kéleykmássesso danitas ma'a yaqwayam elpeykesho', Jonatán axta eyke apkelmaxnéssesso énxet'ák apagkok, Guersón axta apketche, Moisés axta aptáwen. Keñe Jonatán aptawán'ák neptámen, aptamheykegko apkelmaxnéssesso énxet'ák apagkok ma'a danitas, ekweykmoho m'a kélnaqleykekxo axta megkatnahakxa apkelókxa'.

³¹Cha'a ekyetneykemxa axta nepyeseksa énxet'ák ma'a kéleykmássesso, Micaías axta apkelane, apyetnamakxa axta makham Wesse' egegkok kélpakxanma appagkanamap apagkok ma'a Siló.