Read Lengua Sur Jueces 21 Bible Online

Jueces 21 - Lengua Sur bible

Jueces 21

¹Naqsók axta apteméssessók apkelpeywa israelitas, cham'a apheykegkaxa axta Mispá, megyohok chá'a kalmagkok apketchek kelwán'ák xama enxoho m'a Benjamín nak énxet'ák apagkok.

²Tén axta apchaqnákxo m'a Betel, apháha axta nápaqtók Dios ekwokmoho ekyáqtésa, apkellekxagweyha axta, tén han apkelpaqméteyncha'a aptáha s'e:

³“¡Wesse' egegkok, Dios nak Israel! ¿Yaqsa ektáha sentáha nak negko'o xa ektáha nak? ¿Yaqsa ektáha peya nak emassegwók nápakha nak énxet'ák Israel?”

⁴Mók ekhem axta entáhak, axto'ók agko' axta apnaqxétekhágko israelitas, apkelánegkek axta xama ekwatnamáxchexa aqsok, keñe axta apkelmésa chá'a Wesse' egegkok aqsok apkelwatno, keñe han ma'a aqsok apkelnapma segwetassamo nak nélásekhamaxchekxoho.

⁵Keñe axta aptáha chá'a apkelmaxneyáncha'a pók se'e: “¿Yaqsa axta enxama negko'o mepasma negaqneykekxa axta m'a Mispá?”, hakte naqsók axta kéltemessásak chá'a peya emátog ektáha enxoho mepasmo m'a apchaqneykekxa'.

⁶Chaqhak agko' axta apkelwáxok israelitas ektáhakxa axta m'a Benjamín nak énxet'ák apagkok, tén axta aptáha chá'a apkelpeywa s'e: “Sakhem kélmasséssekmo nepyeseksa Israel ma'a Benjamín énxet'ák apagkok.

⁷¿Háxko sa' anteméssesek agwetaksek apnaqteyegka'a Benjamín énxet'ák apagkok apkeleymomap nak? Naqsók axta nenteméssessók negko'o yetlo nenxeyenma Wesse' egegkok apwesey, móghók kalmagkok egketchek kelwán'ák ma'a énxet'ák nak.

⁸¿Yetnéya xama israelitas se'e memhéyak axta nápaqtók Wesse' egegkok ma'a Mispá?” Xénwákxók axta kélwáxok méko xama enxoho appasmo apchaqneykekxa m'a apkeleñama nak Jabés nak Galaad,

⁹hakte méko axta xama enxoho apchátegmowéyak élyetsátexko axta apkelwesey apkeleñama m'a.

¹⁰Tén axta apyókxoho énxet'ák ektáha axta apchaqneykekxa apkeláphasa doce mil sẽlpextétamo apkelyennaqte, apkeltamho elnáhapwók elyetxeygkok chá'a sókwenaqte apyókxoho apheykha nak Jabés, ekweykekxoho sakcha'a, tén han kelán'a apha nak étchek.

¹²Cuatrocientos kelán'a étkók axta han kelwetáxchek nepyeseksa énxet'ák apheykha nak Jabés, metnéssesseykmoho nak makham exma xama énxet, kélnaqlánteyk axta m'a apkelpakxeneykegkaxa nak énxet, apheykencha'a nak ma'a Siló, cham'a Canaán nak.

¹³Tén axta apyókxoho énxet'ák apkeltamho kólnaqlósawakxak ma'a Benjamín énxet'ák apagkok, apheykencha'a nak ma'a émhakxa nak meteymog Rimón, kéláneyáha axta yaqwayam elwátésagkok apkelnápomap.

¹⁴Apkelwa'akteyk axta makham ma'a Benjamín énxet'ák apagkok, apkelmeyásegkek axta han israelitas ma'a kelán'a apnaqleykenta axta éleñama m'a yókxexma Jabés. Ántawók agko' axta eyke han ma'a kelán'a, axta kawákxoho'.

¹⁵Apyósekak axta apkelano israelitas ma'a Benjamín énxet'ák apagkok, hakte apkelyetnakhássek axta Wesse' egegkok nepyeseksa m'a pók Israel nak.

¹⁶Keñe axta apkelámha apmonye'e apagkok nak énxet'ák aptáha chá'a apkelmaxneyáncha'a pók se'e: “¿Háxko sa' antéhek agwetaksek kelán'ák m'a apkeleymomap nak? Hakte sawhéxcheyk ektekyawa m'a kelán'ák éleñama nak nepyeseksa m'a Benjamín énxet'ák apagkok.

¹⁷Kéméxcheyk memassegwomek Benjamín énxet'ák apagkok negyeseksa nak negko'o, eñama m'a apkeleymomap nak meletsapma, yaqwayam enxoho elanakpohok ma'a énxet'ák Israel.

¹⁸Mogwanchek eyke negko'o ólmésagkok egketchek kelwán'ák yaqwayam etnahagkok apnaqteyegka'a m'a, hakte nenxénchek axta negko'o mólmésagkehek egketchek kelwán'ák ma'a Benjamín énxet'ák apagkok, negyókxoho nentáha nak israelitas, hakte ólsexnánéxche katnehek hẽllegássesagkoho'.

¹⁹Yókxoho apyeyam eyke kéllánesso kélessawássessamo Wesse' egegkok ma'a Siló, ekpayho nak nexcheyha m'a Betel, ekpayho nak ekteyapmakxa ekhem ma'a ámay eñama nak Betel, ekweykekxoho m'a Siquem, tén han ma'a teyp nak Leboná, ekpayho nak nepyeyam.”

²⁰Keñe axta apkelámha apmonye'e Israel aptáha apcháphássesa amya'a m'a Benjamín énxet'ák apagkok: “Kólyexánegwom sa' ma'a kélcheneykekxexa nak anmen yámet keto' nak Siló,

²¹kólleyxmakha sa'. Kelántekkek sa' agkok kelán'a étkók éleñama nak Siló, yaqwayam kanéwagkok, kólántép sa' nahan kéxegke m'a kélyexánegwánxa enxoho, kólchétches sa' chá'a xama kelán'a, kólmeyekxa sa' chá'a m'a kélókxa nak.

²²Apkelwa'ak sa' agkok yapmeyk apkelmeyawa enxoho m'a kelán'a étkók, essenhan ma'a kelyapma nak, sa' negko'o antéhek agának se'e: ‘Nágkóltaqnow aqsa m'a énxet'ák nak, kólásekhekxoho sa', hakte mogwanchek axta negko'o negmako agwetaksek kelán'a apyókxoho xa yaqwayam etnahágkok apnaqteyegka'a, némpakha'a axta m'a Jabés. Megkólmeyáseykegkok han kéxegke, naqsók kélyeheykekxoho m'a nentémakxa axta neghéssamo mók nélpaqmeyesma.’”

²³Apkelyahákxók axta han Benjamín énxet'ák apagkok etnahagkok ma'a ektáhakxa axta apkeláneyákpo, xama, xama axta chá'a apkétchásak kelán'a étkok neyseksa eknéweykha, apyentamákxeyk axta chá'a. Apkeltaqháwok axta makham ma'a apkelókxa', apnaqxétekhásegkokxeyk axta makham tegma apkelyawe apagkok, keñe axta apheykencha'a makham ma'a.

²⁴Apkeltaqháwok axta han pók israelitas, xama axta chá'a apmeyákxak ma'a xapop apagkok axta chá'a, apheykegkaxa axta apnámakkok apagko', tén han aphawóxama.

²⁵Elának axta chá'a ekxénakxa enxoho apwáxok elának énxet ma'a nanók axta, hakte méko axta makham wesse' apwányam apagkok ma'a Israel.