Read Lengua Sur Jueces 3 Bible Online

Jueces 3 - Lengua Sur bible

Jueces 3

¹Keso énxet'ák apchahayo axta elhekxak Wesse' egegkok ma'a yókxexma nak, yaqwayam enxoho elyepkeynek chá'a m'a israelitas, mepalleykemxa axta makham apkelnápomákpo axta énxet'ák yaqwayam emok ma'a Canaán.

²Axta apteméssessók Wesse' egegkok xa ektáha nak, yaqwayam enxoho kaltámeyagkok apkelnápomap ma'a melnápomákpo axta makham.

³Apkeleymomákpek axta cinco apkelámha apmonye'e filisteos, tén han apyókxoho cananeos, sidonios, keñe han heveos apheykencha'a axta m'a egkexe élekhahéyak nak Líbano, eyeynamo m'a egkexe nak Baal-hermón, ekweykekxoho m'a nempéwomókxa nak antexek ma'a Hamat.

⁴Apkelásenneykekxeyk axta Wesse' egegkok xa énxet'ák nak apmáheyo elyepkeynek ma'a israelitas, yaqwayam enxoho ey'asagkohok elyahakxohok kexa m'a apkeltémókxa nak etnahagkok, apmésso axta m'a apyapmeyk nano', apchásenneykekxo axta m'a Moisés.

⁵Cháxa ektémakxa axta apheyncha'a nepyeseksa israelitas ma'a cananeos, hititas, amorreos, ferezeos, heveos tén han jebuseos,

⁶apkelmeykegkek axta han aptamheykegko apnaqteyegka'a apketchek apkelennay'a, tén han kelwán'ák israelitas, apketchek apkelennay'a tén han kelwán'ák nak xa énxet'ák nak, apkelpeykessamók axta han ma'a aqsok apcháyókxa nak.

⁷Asagkek axta eyke apkeltémakxa nápaqtók Wesse' egegkok ma'a israelitas, hakte axta kaxeyenmak apwáxok ma'a, apkelpeykessamók axta m'a mók ektémakxa nak chá'a kéleykmássesso Baal, tén han Aserá.

⁸Axta keñamak apkeltaqnaweykegko Wesse' egegkok ma'a, keñe apkelméssama m'a Cusán-risataim, wesse' apwányam axta m'a Mesopotamia. Ocho apyeyam axta apkeltemessáseykha israelitas ma'a Cusán-risataim,

⁹ekwokmoho apwóneykencha'a m'a Wesse' egegkok, keñe axta apkeltémo etyapok xama yaqwayam elwagkasek teyp. Otoniel axta m'a yaqwayam elwagkasek teyp, Quenaz axta apketche, apyáxeg apsexyók axta m'a Caleb:

¹⁰aptaxnegwa'ak axta han apwáxok Wesse' egegkok espíritu apagkok ma'a Otoniel, cha'a aptáha axta han apkemha apmonye' apyennaqte apagkok ma'a israelitas; apkelmallanchek axta neyseksa kempakhakma, apkelwagkassek axta teyp ma'a Wesse' egegkok neyseksa apkelma m'a Cusán-risataim.

¹¹Tén axta natámen xa, ektaqmeleykekxo makham apheykha énxet'ák ma'a yókxexma, ekweykmoho cuarenta apyeyam. Keñe axta natámen apketsapma Otoniel,

¹²apkeláneykegkokxo makham aqsok ekmaso nápaqtók Wesse' egegkok ma'a israelitas. Axta keñamak apméssama Wesse' egegkok Eglón, wesse' apwányam axta m'a Moab, apyennaqte apagko', mexnawo nak ma'a Israel.

¹³Aphésawók axta mók apkelpaqhetchásamákpoho Eglón ma'a amonitas, tén han ma'a amalecitas, tén axta apketámegko m'a Israel, apmeyk axta m'a tegma apwányam élámhakxa nak áxa.

¹⁴Dieciocho apyeyam axta weykmok apkelásenneykha israelitas ma'a Eglón,

¹⁵ekwokmoho apwóneykencha'a m'a Wesse' egegkok, keñe axta apkeltémo etyapok xama yaqwayam elwagkasek teyp. Nepsagqalwa axta xa yaqwayam nak elwagkasek teyp apwesey axta Ehud, Guerá axta apketche, apkeñama axta nepyeseksa m'a Benjamín énxet'ák apagkok. Xama ekhem axta apcháphássesa israelitas selyaqye apkelmésso axta chá'a m'a Eglón, Ehud axta eyke apchásenneykxa'.

¹⁶Apkelanak axta Ehud sókwenaqte ánet ahamtek, náxet metro ekwenaqte, apkexneyk axta nepxet apketchesa kóneg aptaxno ekpayho nak apkelya'assamakxa;

¹⁷tén axta apxega apsákxésa selyaqye eknegkenamaxche Eglón, apmel'awók apagko' axta han ma'a Eglón.

¹⁸Natámen apmésso axta selyaqye eknegkenamaxche Eglón, keñe aptepa makham Ehud yetlo m'a ektáha axta apkelyetlo.

¹⁹Xama axta apkelwokmo m'a eyaqneykegkaxa axta kéleykmássesso, keto' nak Guilgal, apmeyánteyk axta makham Ehud ma'a aphakxa nak Eglón, keñe aptáha apcháneya s'e: —Yetneyk xama amya'a yaqwayam altennaksek xép wesse', apxakkók sa' eyke. Tén axta wesse' apwányam apkeltamho elwanmeyekxak sekxók ma'a ektáha axta apkeltamheykha aphakxa', tén han elántépok ma'a aphakxa nak.

²⁰Xama axta aphákxo apxakkók Ehud yetlo m'a Eglón, cham'a aphakxa nak chá'a ekmáxaqxamakxa nak exma, apyepetchegwokmók axta m'a keñe aptáha apcháneya s'e: —Amya'a seksántegkesa nak xép wesse', keñamak ma'a Dios. Yetlókok axta han apkempeykekxa néten Eglón néten aptaháno apleg'a xa,

²¹keñe axta Ehud apya'ásekxo apmek ekpayho nak apkelya'assamakxa, hakte nepsagqalwa axta m'a, aplekwákxeyk axta sawo apagkok, keñe axta apkelyetxaya apwokmo m'a Eglón.

²²Aptaxnéssekmók axta apkelyetxaya, taxnegwokmók axta m'a apakxak nak sawo apagkok, chápeykxeyk axta aphápetek ma'a sawo, hakte apmel'ak axta m'a Eglón, axta han elchak sawo m'a Ehud.

²³Keñe axta Ehud apkelápegkokxo átog apkelyennaqteyásegkokxo, keñe aptepa átog étkok.

²⁴Xama axta aptaqháwo makham ma'a, tén axta wesse' apwányam apkeláneykha apkelmeyánto makham ma'a, xama axta apkelwetágwa'akto átog kélápeykegkokxa', apkeneykek axta elápegkokxak átog wesse' apwányam aphakxa m'a kañe' ekmáxaqxamakxa nak exma, apkeneykek axta etyáseyha.

²⁵Keñe axta ekwegqa apkelhaxanma, yetlókok axta élyetnakhayo apkelwáxok apkelwet'a metyapa m'a wesse' apwányam. Apketchessek axta ketchessam'átog apleya, xama axta apmeykesa, apwet'ak axta wesse' apagkok apyetna náxop.

²⁶Apkenyeyk axta han Ehud apkelyentamákpoho apkelhaxnakxa etyapok wesse' apagkok ma'a énxet'ák, xama axta apyeykhágweykxo élaqneykegkaxa axta kéleykmássesso m'a Guilgal, keñe apyexánegwákxo m'a yókxexma nak Seirat.

²⁷Xama axta apwákxo m'a yókxexma apagkok nak ma'a israelitas, apchaqkahássessek axta apchaqkahasso m'a egkexe nak Efraín, yaqwayam enxoho elwónmakha m'a israelitas, apyókxoho axta han apkelweywenták apkeleñama m'a egkexe nak, Ehud axta eyke apxega apmonye'.

²⁸Apkeltamhók axta kólyetlók ma'a Ehud, hakte Wesse' egegkok sa' elmallanchesek neyseksa apkelenmexma m'a moabitas. Keñe axta xa énxet'ák nak apkelyetlawa, apchaqnágwokmek axta m'a éttakhexa nak Jordán, apmeyk axta m'a, axta han ya'awok chá'a eyeykhak xama énxet enxoho.

²⁹Cháxa ekhem apkelnapakxa axta han diez mil moabitas, sẽlpextétamo apkelyennaqte axta han apyókxoho, tén han megyeye elmahagkok eyesagkexa'. Méko axta xama enxoho apkeymomap.

³⁰Axta temék israelitas apmoma m'a Moab. Natámen axta xa ektaqmeleykekxo makham apheykha m'a yókxexma nak, ekweykmoho ochenta apyeyam.

³¹Samgar axta apteyapmak pók apkemha apmonye' apyennaqte, Anat axta apketche, cham'a apkelnapma axta seiscientos filisteos apmeykha xama yámet láwa naw'a. Samgar axta han apkelwagkasso teyp ma'a énxet'ák Israel.