Read Lengua Sur Jueces 7 Bible Online

Jueces 7 - Lengua Sur bible

Jueces 7

¹Amonye' élseye axta apxatakha'a Gedeón, cham'a kéltéma nak han kaxwók Jerubaal, tén han ma'a apyókxoho ektáha axta apkelxegexma'a, apkelmahágkek axta apkelpakxenwokmo m'a ekpayho axta ekteyapmakxa yegmen ma'a Harod. Nexcheyha axta han pehewákxak apkelpakxeneykegkaxa m'a madianitas, xóp ekyapwate ekpayhókxa axta émhakxa m'a egkexe Moré.

²Aptáhak axta Wesse' egegkok apcháneya Gedeón: “Apxámok apagko' apnaqláyam énxet, éltamhók sa' ko'o emenxenek ma'a madianitas, elxénmakha sa' nahaqtók ko'o apkenagko apkelwagkásamap apagko' teyp.

³Eltennés sa' kaxwók énxet'ák ektáha enxoho apkeye apwanchek emyekxak makham ma'a apxagkok.” Aptemék axta Gedeón xa ektáha nak apkeltamho elyepkeynek, apkeltaqháwok axta veintidós mil énxet'ák, keñe axta apkeleymékpo diez mil énxet'ák.

⁴Aptáhak axta makham Wesse' egegkok apcháneya m'a Gedeón: “Apxámok makham. Enaqlakxa sekxók yaqwayam énagkok yegmen, sa' ko'o alyepkeynek ma'a, altennaksek sa' ko'o exchep yaqwayam elyetlók, tén han yaqwayam melyetlewe'.”

⁵Apnaqlákxeyk axta Gedeón énxet'ák yaqwayam énagkok yegmen, keñe Wesse' egegkok aptáha apcháneya s'e: “Elyetnakhés sa' ma'a aptamhéyak nak apyenéyak yegmen ma'a ektémól'a semheg keynek yegmen, apkeltekxeyéyak nak aptapnák apyenéyak yegmen.”

⁶Trescientos axta apyókxoho m'a aptamhéyak nak apyenéyak yegmen ma'a ektémól'a semheg keynek yegmen. Keñe axta m'a nápakha nak apkeltekxeyágko chá'a aptapnák apyenágko yegmen.

⁷Tén axta aptáha apcháneya Wesse' egegkok ma'a Gedeón: “Alwagkasek sa' ko'o teyp kéxegke alásenneykxak xa trescientos énxet nak, amenxenek sa' ma'a madianitas. Keñe sa' ma'a nápakha nak, eltaqhekxak sa'.”

⁸Apkeláphássek axta eltaqhohok Gedeón apkelpakxeneykegkaxa m'a nápakha nak; apkelmákxeyk axta eyke amonye' apkeltaqhémo m'a yátegwáxwa apagkok, tén han nepkések apkennawo' apkepet'ák. Wánxa axta aqsa apkelhákxo m'a trescientos énxet kélyéseykha axta, apkelpakxenágkek axta m'a néten nak, kóneg axta pehewákxak ma'a apkelpakxeneykegkaxa axta m'a madianitas, ekyapwátegweykenxa nak xapop.

⁹Cháxa axta'a nak, aptáhakxa axta Wesse' egegkok apcháneya m'a Gedeón: “Exnekxa néten, keñe sa' exog ektámenták ma'a madianitas, hakte almések sa' ko'o exchep ma'a.

¹⁰Apchekak sa' agkok ektamagkok ma'a, emhók sa' sekxók ma'a apkelpakxeneykegkaxa nak yetlo m'a Purá, apchásenneykha nak xép,

¹¹yeyxho sa' ma'a aptáhakxa enxoho apkelpeywa. Tén sa' natámen emáwhok apagko' yaqwayam ektamagkok.” Keñe axta apxega Gedeón yetlo apchásenneykha Purá, ekwokmoho apchágketchessekmo m'a apkelpakxeneykegkaxa nak apkelenmexma.

¹²Appayhekxeyk axta madianitas, amalecitas tén han apkeleñama nak teyepmakxa ekhem ma'a ekyókxoho nak ekyapwátegweykenxa. Máxa sawa' apxámokma axta aptamhágkok. Apxámók apagko' axta han ma'a yányátnáxeg, máxa m'a xapop ánek ekhéyak nak neyáwa wátsam ekwányam.

¹³Xama axta apwokmo Gedeón ketók ma'a apkelpakxeneykegkaxa nak apkelenmexma, apleg'ak axta apkeltennáseyncha'a pók xama sẽlpextétamo ektáhakxa apwanmagko. Aptáhak axta s'e: —Ewanméssek xeyk ko'o xama pán apyettelegwokmo apmeyókmo nélpakxeneykegkaxa, xama axta aptégwokmo xama kélpakxanma, apyaqnegkessek axta.

¹⁴Aptáhak axta apchátegmowágko pók se'e: —Gedeón sókwenaqte apagkok xa, Joás nak apketche, apteme nak israelita. Dios sa' yának elmok Gedeón ma'a madianitas, keñe han ma'a ekyókxoho nélpakxenéyak nak.

¹⁵Xama axta apleg'a ektáhakxa apkeltenneykha tén han appékessáseykekxa pók ektáhakxa apwanmagko, apkelpeykásawók axta Gedeón ma'a Wesse' egegkok. Keñe axta aptaqháwo makham ma'a apkelpakxeneykegkaxa axta israelitas, aptáhak axta apkeláneya s'e: —¡Kólnaqxétekhák, Wesse' egegkok sa' hegmések negko'o m'a apkelpakxeneykegkaxa nak madianitas!

¹⁶Yetlókok axta han apkexpánchesso ántánxo apkelyaqyeyáseyak ma'a trescientos énxet'ák, apkelmeyásegkek axta han nepkések apkennawók apkepet'ák ma'a apyókxoho, tén han yátegwáxwa meyke aqsok kélyeta kañe' apwáxok, kélatchesso axta kañe' m'a yántápak eyáléweykha naw'a.

¹⁷Aptáhak axta apkeláneya s'e: —Ekwokmek sa' agkok ko'o m'a teyp nak apkelpakxeneykegkaxa nélenmexma, kólenmexho sa' sénmágkaxa, kólhéshok sa' chá'a m'a sektáhakxa enxoho chá'a.

¹⁸Nélpáwássek sa' agkok negko'o nepkések apkepet'ák, kólpáwes sa' kéxegkáxa m'a neyáwa nak ekyókxoho apkelpakxeneykegkaxa, sa' kóltéhek kólyennaqtések kélpeywa s'e: ‘¡Wesse' egegkok keñamak tén han Gedeón!’

¹⁹Apwokmek axta Gedeón yetlo cien apkelxegexma'a m'a teyp apkelpakxeneykegkaxa nak, chaqhawók axta apmakókxa axta eyaqmagkasek pók apkelhaxneykha m'a axta'a eysekso'. Tén axta apkelpáwasa m'a nepkések apkennawo' apkepet'ák, apkelpáxqatchek axta han ma'a yátegwáxwa apkelseykha axta,

²⁰apheyásawók axta han mók apkelpáwasso nepkések apkennawo' apkepet'ák ma'a ántánxo apkelyaqyeyáseyak nak, apkelpáxqatchek axta han yátegwáxwa. Nepsagqalwa axta han apkelsáwak ma'a yántápak táxa eyáléwe naw'ék, keñe axta nepkések apkennawo' apkepet'ák ma'a apkelya'assamakxa nak, keñe axta aptáha apkelyennaqtésa apkelpeywa s'e: “¡Kólhaxyawasák axanák sókwenaqte! ¡Eñama Wesse' egegkok tén han Gedeón!”

²¹Apchaqnáha axta aqsa han israelitas ma'a neyáwa nak apkelpakxeneykegkaxa, cham'a apchaqnágkaxa axta chá'a, apkelpáxamáha axta apyókxoho sẽlpextétamo madianitas, apkelántekkek axta apkenyahágko.

²²Apkelpáwássek axta aqsa han nepkések apkennawo' apkepet'ák ma'a trescientos israelitas, apkeltamhók axta elnapakpekxak aqsa chá'a pók Wesse' egegkok ma'a madianitas, keñe han elántépok yenyahagkok ekweykekxoho m'a Bet-sitá, ámay nak Sererá, ekweykekxoho m'a néxa yókxexma nak Abel-meholá, ekpayho nak ma'a Tabat.

²³Keñe axta apkeláneyákpo emenxenek madianitas ma'a israelitas, Neftalí énxet'ák apagkok, Aser, keñe han ma'a apyókxoho Manasés énxet'ák apagkok.

²⁴Apkeláphássek axta han Gedeón apkelásenneykha m'a ekyókxoho egkexe nak Efraín, apkeltamho elnapakpok han ma'a madianitas, apkeltamhók axta yahaxtegkásekxak apmonye' m'a negmowagkexa nak agyeykhekxak ma'a wátsam ekpayho nak Bet-bará tén han ma'a Jordán, amonye' apkelwayam ma'a. Aptamhágkek axta han Efraín énxet'ák apagkok xa ektáha nak,

²⁵apkelmeyk axta han apqánet apkelámha apmonye'e madianitas, cham'a Oreb tén han Zeeb. Apmatñék axta han Oreb ma'a émhakxa nak meteymog ekyawe, éltamhomaxchexa nak kaxwók meteymog ekyawe Oreb. Tén axta Zeeb apmatñà m'a yókxexma kélhéssamókxa axta han apwesey, cham'a élteyammomaxchexa axta chá'a anmen yámet, yaqwayam kalanaxchek vino. Kélsákxéssek axta han Gedeón ma'a Oreb apqátek tén han Zeeb, natámen apmenxenma axta m'a madianitas, cham'a aphakxa axta m'a neyp wátsam Jordán.